អ្នកនាំពាក្យរដ្ឋាភិបាល ថា ចលនាតស៊ូរបស់លោក សម រង្ស៊ី កំពុងដើរបញ្ច្រាសទិសពីប្រជាធិបតេយ្យ

ការបង្កើតចលនាតស៊ូនៅក្រៅប្រទេសរបស់លោក សម រង្ស៊ី គឺបានបង្ហាញច្បាស់ថា អតីតមេបក្សប្រឆាំងរូបនេះ កំពុងដើរបញ្ច្រាសទិសពីលទ្ធិប្រជាធិបតេយ្យ និងនីតិរដ្ឋ ពោលគឺបុគ្គលនេះ មិនមែនជាអ្នកប្រជាធិបតេយ្យទេ តែជាអ្នកប្រឆាំងនឹងប្រជាធិបតេយ្យ។ នេះជាការលើកឡើងរបស់អ្នកនាំពាក្យរាជរដ្ឋាភិបាល លោក ប៉ែន បូណា។

លោក ប៉ែន បូណា លើកឡើងថា លោក សម រង្ស៊ី បានអួតខ្លួនជាអ្នកប្រជាធិបតេយ្យ ក៏ប៉ុន្តែ លោកបានសម្រេចបង្កើតចលនាតស៊ូខុសច្បាប់ ក្រៅប្រព័ន្ធបោះឆ្នោត ដែលខុសពីគោលការណ៍លទ្ធិប្រជាធិបតេយ្យសេរីពហុបក្ស ខណៈប្រទេសប្រជាធិបតេយ្យនៅលើពិភពលោក បានប្រកាន់យក និងកំពុងអនុវត្តយន្តការបោះឆ្នោតសម្រាប់ការជ្រើសរើសមេដឹកនាំ។ លោក ចាត់ទុកការបង្កើតចលនាតស៊ូរបស់លោក សម រង្ស៊ី ក្នុងកាលៈទេសៈនេះ ថា ជាការប៉ុនប៉ងអូសប្រទេសជាតិឱ្យដើរថយក្រោយវិលទៅរកអតីតកាលដ៏ជូរចត់វិញ តាមរយៈនយោបាយប្រើប្រាស់ប្រជាពលរដ្ឋ ជាពិសេសសកម្មជន អ្នកគាំទ្ររបស់ខ្លួន ធ្វើជាឈ្នាន់ ដើម្បីឈោងចាប់អំណាច។

ការលើកឡើងរបស់អ្នកនាំពាក្យរាជរដ្ឋាភិបាលកម្ពុជា បែបនេះ ក្រោយលោក សម រង្ស៊ី បានប្រកាសបង្កើតចលនាតស៊ូនយោបាយក្រៅស្រុក ដើម្បីប្រឆាំងនឹងរាជរដ្ឋាភិបាលស្របច្បាប់នៅក្នុងប្រទេសកម្ពុជា ក្រោមលេសទាមទារលទ្ធិប្រជាធិបតេយ្យ សិទ្ធិសេរីភាព និងយុត្តិធម៌សង្គម ជាអាទិ៍។

ឆ្លើយតបនឹងការបង្កើតចលនាតស៊ូនយោបាយនេះ អ្នកនាំពាក្យរាជរដ្ឋាភិបាល បានលើកឡើងតាមរយៈកិច្ចពិភាក្សាតុមូលស្តីពី«ការបង្កើតចលនាតស៊ូនយោបាយក្រៅស្រុក» ដែលរៀបចំឡើងដោយរាជបណ្ឌិត្យសភាកម្ពុជា នាព្រឹកថ្ងៃទី០៦ ខែធ្នូ ឆ្នាំ២០២៤នេះ ថា នេះជារបៀបធ្វើនយោបាយចាស់កំរិល ហួសសម័យ និងអាក្រក់បំផុត ហើយជាចលនាបដិវត្តពណ៌។ ក្នុងន័យនេះ លោក អះអាងថា សារនយោបាយរបស់លោក សម រង្ស៊ី បានបង្ហាញយ៉ាងច្បាស់ថា ជានយោបាយហឹង្សា បង្កើតឱ្យកំហឹងពលរដ្ឋ ហើយឈានទៅផ្ដួលរំលំរដ្ឋាភិបាល តាមបែបបដិវត្តពណ៌។

បើតាមលោក ប៉ែន បូណា ចលនាបដិវត្តពណ៌ គឺជាចលនាប្រឆាំងនឹងសន្តិភាព ប្រឆាំងការអភិវឌ្ឍ ប្រឆាំងនឹងភាពសុខសាន្តរបស់ប្រជាពលរដ្ឋ។ ផ្ទុយទៅវិញ ការធ្វើនយោបាយទាន់សម័យ គឺការបង្កើតនយោបាយ ដាក់គោលនយោបាយ ហើយប្រកួតប្រជែង តាមរយៈសន្លឹកឆ្នោត។

ទន្ទឹមនេះ លោក ក៏បានអំពាវនាវឱ្យប្រជាពលរដ្ឋបន្តចូលរួមជាមួយរដ្ឋាភិបាល ការពារសុខសន្តិភាព ការអភិវឌ្ឍជាតិ ជាជាពិសេសរួមគ្នាលុបបំបាត់មនោគមន៍វិជ្ជាជ្រុលនិយមពីកម្ពុជា ខណៈរដ្ឋាភិបាល ដែលដឹកនាំគណបក្សប្រជាជនកម្ពុជា មានសម្ដេតេជោ ហ៊ុន សែន ជាអតីតនាយករដ្ឋមន្ត្រី និងសម្ដេចធិបតី ហ៊ុន ម៉ាណែត ជានាយករដ្ឋមន្ត្រីបន្តវេន បានប្ដូរផ្ដាច់មិនអនុញ្ញាតជាដាច់ខាតឱ្យមានចលនាណាមួយ ក្រុមណាមួយ ឬបុគ្គលណាមួយ មកបំផ្លាញសុខសន្តិភាពបានឡើយ ទោះក្នុងតម្លៃណាក៏ដោយ៕