នយោបាយ

ប្រទេសទីម័រឡេស្ដេនឹងបំពាក់គ្រឿងឥស្សរិយយសកម្រិតខ្ពស់បំផុតជូនសម្ដេចតេជោ

បានផុស

២៦ វិនាទី មុន

នៅ

ថ្ងៃអាទិត្យ ៤ ឧសភា ២០២៥

ដោយ

ប្រធានាធិបតី ប្រទេសទីម័រឡេស្ដេ លោក ចូហ្សេ រ៉ាមូស អរតា នឹងបំពាក់គ្រឿងឥស្សរិយយស Grand Collar of Order of Timor-Leste ដែលជាឥស្សរិយយសកម្រិតខ្ពស់បំផុតជូនប្រធានព្រឹទ្ធសភាកម្ពុជា សម្ដេចតេជោ ហ៊ុន សែន ក្នុងពេលសម្ដេចអញ្ជើញធ្វើទស្សនកិច្ចនៅប្រទេសនេះក្នុងសប្ដាហ៍ក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្ដីប្រកាសព័ត៌មានថ្ងៃទី៤ ខែឧសភា ឆ្នាំ២០២៥នេះ អគ្គលេខាធិការដ្ឋានរដ្ឋសភាឱ្យដឹងថា ការផ្ដល់គ្រឿងឥស្សរិយយសខ្ពស់បំផុតរបស់ប្រទេសទីម័រជូនដល់សម្ដេចតេជោនេះគឺជាការតបស្នងគុណបំណាច់ និងវិភាគទានរបស់សម្ដេចតេជោក្នុងការជួយគាំទ្រដល់ទីម័រឡេស្ដេជាង២ទស្សវត្សរ៍កន្លងមក ជាពិសេសចំពោះការជំរុញទីម័រឡេស្ដេចូលជាសមាជិកពេញសិទ្ធិរបស់អាស៊ាន។

តាមការកត់សម្គាល់នេះគឺជាលើកទី២ហើយដែលសម្ដេចតេជោអញ្ជើញធ្វើទស្សនកិច្ចនៅប្រទេសទីម័រឡេស្ដេបន្ទាប់ពីឆ្នាំ២០០៦។ ក្នុងដំណើរទស្សនកិច្ចនេះសម្ដេចតេជោ ហ៊ុន សែន នឹងមានជំនួបដាច់ដោយឡែកជាមួយប្រធានាធិបតីប្រទេសទីម័រឡេស្ដេលោក ចូហ្សេ រ៉ាមូស អរតា នាយករដ្ឋមន្ត្រី និងប្រធានសភាប្រទេសនេះផងដែរ។

សម្ដេចតេជោ និងប្រធានាធិបតីទីម័រលោក ចូហ្សេ រ៉ាមូស អរតា ក្នុងកិច្ចប្រជុំមួយនៅវិមានសន្ដិភាពកាលពីតុលា ឆ្នាំ២០២២

ក្នុងដំណើរទស្សនកិច្ចនេះសម្ដេចក៏នឹងឡើងថ្លែងសន្ទរកថានៅរដ្ឋសភាទីម័រឡេស្ដេ ព្រមទាំងផ្ដល់បាឋកថាលើប្រធានបទស្ដីពី៖ «មេរៀនរបស់ ហ៊ុន សែន៖ ពីរបបប្រល័យពូជសាសន៍ និងភាពក្រីក្រឆ្ពោះទៅកាន់សេរីភាព និងវិបុលភាព» នៅវិមានប្រធានាធិបតីផងដែរ៕

អត្ថបទដោយ ហ៊ុន សិរីវឌ្ឍន៍