សន្តិសុខសង្គម

ជម្លោះរវាងម្ចាស់តាក់ស៊ី និងអ្នកដំណើរ នៅខេត្តកំពង់ចាម ជាករណីហិង្សា ពុំមែនប្លន់ទេ

បានផុស

៨ ខែ មុន

នៅ

ថ្ងៃព្រហស្បតិ៍ ៩ តុលា ២០២៥

ដោយ

តាមការស្រាវជ្រាវបឋមលើអង្គហេតុ បន្ទាប់ពីជំនាញធ្វើការសម្ភាសន៍ជនរងគ្រោះទាំង ២ នាក់ និងផ្អែកតាមការពិនិត្យនៅលើរថយន្ត គឺពុំមានបាត់បង់អ្វីនោះឡើយ។ ករណីនេះ ជាករណីហិង្សា ដែលកើតឡើងរវាងភ្ញៀវជាអ្នកដំណើរ និងម្ចាស់តាក់ស៊ី ពុំមែនជាករណីប្លន់ទេ។ នេះបើតាមលោកឧត្ដមសេនីយ៍ទោ ហេង វុទ្ធី ស្នងការនគរបាលខេត្តកំពង់ចាម បញ្ជាក់ឲ្យដឹងនៅព្រឹកថ្ងៃទី ០៩ ខែតុលា ឆ្នាំ ២០២៥ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្ដមសេនីយ៍ទោ ហេង វុទ្ធី បានឲ្យដឹងទៀតថា ផ្អែកតាមការសាកសួរចម្លើយជនរងគ្រោះទាំង ២ រូប បានបញ្ជាក់ថា ពួកគាត់បានសន្យាគ្នា (អ្នកជិះ និងអ្នករត់តាក់ស៊ី) ក្នុងតម្លៃមួយ ដើម្បីធ្វើដំណើរ មកដល់ខេត្តកំពង់ចាម។ លុះពេលធ្វើដំណើរមកដល់ចំណុចខាងលិចស្ពានស្ទឹងប្រយោល ស្រុកព្រៃឈរ ខេត្តកំពង់ចាម ជនសង្ស័យ ក៏បានឲ្យជនរងគ្រោះជូនខ្លួនទៅកាន់ស្រុកពញាក្រែក ខេត្តត្បូងឃ្មុំវិញ ប៉ុន្តែអ្នករត់តាក់ស៊ីមិនយល់ព្រម ក៏កើតមានអំពើហិង្សានាពេលនោះតែម្ដង។

តាមរបាយការណ៍កាលពីវេលាម៉ោង ១០ និង ១៨ នាទីយប់ ថ្ងៃទី ០៨ ខែតុលា ឆ្នាំ ២០២៥ កម្លាំងសមត្ថកិច្ចទទួលបានព័ត៌មានស្វែងរកជំនួយពីបុរសជាអ្នករត់តាក់ស៊ីម្នាក់ថា ជនសង្ស័យ បានបង្កអំពើហិង្សាមកលើខ្លួន ដោយប្រើប្រាស់កាំបិតចុងស្រួចចាក់ពីក្រោយបណ្ដាលឲ្យរងរបួស។ ក្រោយទទួលព័ត៌មាន សមត្ថកិច្ចបានធ្វើការស្វែងរក និងប្រទះឃើញរថយន្តរបស់ជនរងគ្រោះម៉ាកព្រូស នៅចំណុចភូមិទួលពោន ឃុំមៀន ស្រុកព្រៃឈរ។ រីឯ ជនរងគ្រោះ ត្រូវក្រុមគ្រួសារយកទៅព្យាបាល នៅមន្ទីរពេទ្យខេត្តកំពង់ចាម។

តាមសាក្សីជាព្រូឡានដែលធ្វើដំណើរជាមួយគ្នា ប្រាប់ថា មូលហេតុដែលនាំឲ្យប៉ះទង្គិចពាក្យសម្ដី ដោយសារការតថ្លៃតម្លៃមិនត្រូវគ្នា។ ដំបូងជនសង្ស័យបាននិយាយឲ្យជនរងគ្រោះជូនខ្លួនទៅដល់ខេត្តកំពង់ចាម ក្នុងតម្លៃ ១០ ដុល្លារ។ លុះធ្វើដំណើរដល់ចំណុចស្ពានស្ទឹងប្រយោល ក្នុងស្រុកព្រៃឈរ ជនសង្ស័យបានឲ្យជនរងគ្រោះជូនទៅស្រុកពញាក្រែកខេត្តត្បូងឃ្មុំ ហើយក៏កើតការប៉ះសម្ដីគ្នា និងធ្វើសកម្មភាពដកកូនកាំបិតចាក់តែម្ដង។ មកដល់ពេលនេះ កម្លាំងសមត្ថកិច្ចបានធ្វើការបង្ក្រាប និងឃាត់ខ្លួនជនសង្ស័យ ដើម្បីអនុវត្តបន្តតាមនីតិវិធី៕

អត្ថបទ និង រូបភាព ៖ ឡេក ចាន់ពេជ្រ

Related Topics:ខេត្តកំពង់ចាម ករណីហិង្សា

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា