អាជីវករផ្សារក្តាមស្នើឲ្យរួមគ្នារៀបចំសណ្តាប់ធ្នាប់ និងការលក់ដូរឲ្យល្អប្រសើដើម្បីទាក់ទាញទេសចរ

អាជីវករលក់ដូរនៅផ្សារក្ដាម ខេត្តកែប បានស្នើទៅអាជ្ញាធរ និងក្រុមអាជីវករដូចគ្នាត្រូវរួមគ្នារៀបចំសណ្តាប់ធ្នាប់ និងការលក់ដូរឲ្យល្អប្រសើដើម្បីទាក់ទាញទេសចរ និងរក្សាកិត្តិសយរបស់ខេត្ត។ ការលើកឡើងនេះធ្វើឡើងបន្ទាប់ពីមើលឃើញពីក្រុមអាជីវករមួយចំនួននៅតែបន្តដេញចាប់ភ្ញៀវឲ្យបែបអាណាធុិបតេយ្យ ធ្វើឲ្យប៉ះពាល់ដល់សណ្តាប់ធ្នាប់នៃការលក់ដូរ និងលក់ដូរគ្មានតម្លាភាពជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការឲ្យដឹងពីលោក ឃន វុទ្ធី អភិបាលក្រុងកែប កាលពីថ្ងៃទី៣ ខែមិនា ឆ្នាំ២០២៦ បានប្រាប់ឲ្យដឹងថា អាជីវករលក់ដូរនៅផ្សារក្តាមខេត្តកែបដែលមានឈ្មោះល្បី ថាជាកន្លែងលក់គ្រឿងសមុទ្រស្រស់ ពេលនេះបាននិងកំពុង សាងសង់ធ្វើថ្មី ហើយអំឡុងពេលសាងសង់ផ្សារ អាជីវករត្រូវប្តូរឲ្យទៅលក់នៅទីតាំងថ្មីបណ្តុះអាសន្ន ទៅខាងក្រោយទីតាំងចាស់ ប៉ុន្តែអាជីវករភាគច្រើនមិនព្រមទៅ ហើយនៅតែបន្តដេញចាប់ភ្ញៀវឲ្យទិញដដែល ធ្វើឲ្យប៉ះពាល់ដល់សណ្តាប់ធ្នាប់នៃការលក់ដូរ និងលក់ដូរគ្មានតម្លាភាពជាដើម។

បើតាមការលើកឡើងពីអាជីវករលក់ដូរនៅផ្សារក្តាមទីតាំងបណ្តុះអាសន្នថ្មី ខាងក្រោយផ្សារក្តាមចាស់ បានបញ្ជាក់ថា ដោយសារផ្សារក្តាមថ្មីសាងសង់មិនទាន់រួច អាជ្ញាធរក្រុង និងម្ចាស់ផ្សារបានសាងសង់ផ្សារក្តាមបណ្តុះអាសន្នថ្មី នៅខាងក្រោយផ្សារក្តាមចាស់ប្រហែល១០០ម៉ែត្រ សម្រាប់ឲ្យអាជីវករងាយស្រួលលក់ដូរ ប៉ុន្តែអាជីវករជាច្រើននៅតែបន្តលក់នៅផ្សារក្តាមចាស់ដដែល មិនស្តាប់ការណែនាំរបស់រដ្ឋបាលក្រុង និងម្ចាស់ក្រុមហ៊ុនសាងសង់ផ្សារឡើយ។ លើសពីនេះទៅទៀត អ្នកលក់នៅផ្សារក្តាមចាស់ មានអ្នកចាំដេញចាប់ភ្ញៀវ មិនឲ្យចូល​មកទិញនៅផ្សារថ្មីខាងក្រោយ ឬតូបអាជីវករផ្សេងទេ ដោយពួកគេលក់ចញ្ចុះតម្លៃ ប៉ុន្តែលួចស៊ីភ្នែកជញ្ជីង(មិនគ្រប់គីឡូ)។ ពួកគាត់សំណូមពរដល់អាជ្ញាធរ និងអាជីវក​រ​ទាំងអស់សូមរួមគ្នារៀបចំសណ្តាប់ធ្នាប់ផ្សារ និងការលក់ដូរឲ្យបានល្អ លុបបំបាត់ការដេញចាប់ភ្ញៀវ ការលក់អីវ៉ាន់មិនគ្រប់ភ្នែកជញ្ជីង ការក្លែងបន្លំគ្រឿងសមុទ្រធម្មជាតិជាដើម។

ជុំវិញការលើកឡើងរបស់អាជីវករខាងលើ អភិបាលក្រុងកែប លោក ឃន វុទ្ធី បានប្រាប់ឲ្យដឹងថា អាជ្ញាធរកំពុងខិតខំ សម្របសម្រួលរវាងអាជីវករ និងអ្នកវិនិយោគផ្សារ ធ្វើយ៉ាងណាដើម្បីទទួលបានអត្ថប្រយោជន៍រួមទាំងអស់គ្នា ពិសេសលុបបំបាត់រាល់ភាពអសកម្មរក្សាបាននូវសេចក្តីថ្លៃថ្នូរ និងកិត្តិយសមុខមាត់របស់ខេត្តកែប៕

អត្ថបទ៖ សឹង រ៉ាត់