សន្តិសុខសង្គម

កម្លាំងសមត្ថកិច្ចខេត្តកំពង់ស្ពឺ ប្រើពេល៧២ម៉ោងបំបែកសំបុកមុខសញ្ញាមេក្លោងបក្ខពួកទិញ-លក់ គ្រឿងញៀនជិត២គីឡូ

បានផុស

១ ខែ មុន

នៅ

ថ្ងៃសៅរ៍ ១៤ មីនា ២០២៦

ដោយ

កម្លាំងជំនាញបើកប្រតិបត្ដិការបង្រ្កាបគ្រឿងញៀន ឃាត់ខ្លួនមនុស្សប្រុសស្រី៧នាក់ ជាមុខសញ្ញាមេក្លោងបក្ខពួកសម្ងំក្នុងទីតាំងសុវត្ថិភាពបញ្ជាទិញ-លក់ គ្រឿងញៀនជិត២គីឡូ( ១៦៩៧.២៧ក្រាម)

អនុវត្តបញ្ជាដ៏ម៉ឺងម៉ាត់របស់ លោកនាយឧត្តមសេនីយ៍ ស ថេត អគ្គស្នងការនគរបាលជាតិ និងការបញ្ជាដឹកនាំផ្ទាល់ពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ កម្លាំងនគរបាល ផែនការងារប្រឆាំងគ្រឿងញៀន ស្នងការដ្ឋាននគរបាលខេត្ដ និងបានការណែនាំពីលោកឧត្ដមសេនីយ៍ត្រី ម៉ាត់ ធុច ស្នងការរង និងលោកវរសេនីយ៍ទោ ហ៊ាង ឈាងលី ស្នងការរងទទួលដឹកនាំការិយាល័យប្រឆាំងគ្រឿងញៀន បានដឹកនាំកម្លាំងចុះសហការស្រាវជ្រាវរហូតឈានទៅធ្វើការបង្រ្កាបដកហូតបានវត្ថុតាងជាគ្រឿងញៀនមួយចំនួនធំ ដែលជនសង្ស័យជាបក្ខពួកបានបញ្ជាអោយយកមកលាក់ទុកដើម្បីធ្វើសកម្មភាពចែកចាយលក់បន្ដអោយទៅអ្នកផ្សេង។

ប្រតិបត្ដិការរយៈពេល៧២ម៉ោង គិតត្រឹមថៃ្ងទី១៣ ខែមីនា ឆ្នាំ២០២៦នេះ កម្លាំងនគរបាលនៃស្នងការដ្ឋាននគរបាលខេត្ដកំពង់ស្ពឺ ដោយការដឹកនាំផ្ទាល់ពីលោកវរសេនីយ៍ទោ ហ៊ាង ឈាងលី ស្នងការរង និងបានការសម្របសម្រួលនីតិវិធីពី លោក សុិន វិរៈ ព្រះរាជអាជ្ញា នៃអយ្យការអមសាលាដំបូងខេត្ដកំពង់ស្ពឺ កម្លាំងបានបន្ដចុះឆែកឆេររកឃើញវត្ថុតាងជាគ្រឿងញៀន និងឃាត់ខ្លួនមុខសញ្ញាពាក់ព័ន្ធ ៧នាក់ ស្រី ២នាក់ ដកហូតវត្ថុតាងរួមមាន៖ ១-ម្សៅក្រាមពណ៌សថ្លា សង្ស័យជាគ្រឿងញៀនចំនួន ១៥កញ្ចប់(ធំ១០,មធ្យម២,តូច៣) ទម្ងន់ ១៦៩៧.២៧ក្រាម, ២-សារធាតុមិនច្បាស់ ១កញ្ចប់មធ្យម ទម្ងន់ ២,៩៣ក្រាម, ៣-ទូរស័ព្ទចំនួន ៩គ្រឿង, ៤-ម៉ូតូ ២គ្រឿង, ៥-ជញ្ជីងថ្លឹងគ្រឿងញៀន ១, ៦-ថង់វេចខ្ចប់គ្រឿងញៀន និងឧបករណ៍សម្រាប់ប្រើប្រាស់គ្រឿងញៀនមួយចំនួន។

កម្លាំងប្រតិបត្ដិការបានសហការពីកម្លាំងអធិការដ្ឋាននគរបាលស្រុកសំរោងទង ឃាត់ខ្លួនមនុស្សបានជាបន្តបន្ទាប់ចំនួន៧នាក់ ឈ្មោះ ខឹម សុផា ហៅ វ៉ា ភេទប្រុស អាយុ៤៧ឆ្នាំ ,ឈ្មោះ រឿន គឹមសាន្ត ហៅ មុំ ភេទប្រុស អាយុ ៣១ឆ្នាំ ,ឈ្មោះ ស៊ិប ដន ហៅ គោ ភេទប្រុស អាយុ ៣៤ឆ្នាំ, ឈ្មោះ យឿន យ៉េង ភេទស្រី អាយុ ៣៣ឆ្នាំ , ឈ្មោះ ឌឹម ឡាញ់ ភេទស្រី , ឈ្មោះ នួន សុខុន ហៅ នីន ភេទប្រុស អាយុ ៤០ឆ្នាំ, ឈ្មោះ សា រ៉ាថាន់ ភេទប្រុស អាយុ៣៤ឆ្នាំ ដោយឡែកមានជនសង្ស័យម្នាក់ទៀតកំពុងរត់គេចខ្លួន។

បច្ចុប្បន្នជនសង្ស័យបក្ខពួកទាំង៧នាក់ រួមជាមួយវត្ថុតាងគ្រឿងញៀន បានបញ្ជូនមកស្នងការដ្ឋាននគរបាលខេត្ដកំពង់ស្ពឺ បន្ដនីតិវិធី កសាងសំណុំរឿងបញ្ជូនទៅអយ្យការអមសាលាដំបូងខេត្ដ ចាត់ការនីតិវិធីបន្ដ៕