សន្តិសុខសង្គម

ឃាត់ខ្លួនជនសង្ស័យម្នាក់ធាក់នគរបាលចរាចរណ៍កំពុងដាក់គោលដៅ រឹតបន្តឹងការអនុវត្តច្បាប់

បានផុស

១ year មុន

នៅ

ថ្ងៃសុក្រ ២៣ ឧសភា ២០២៥

ដោយ

ជនសង្ស័យម្នាក់ ដែលធ្វើសកម្មភាពធាក់ប៉ូលិសចរាចរណ៍កំពុងដាក់គោលដៅរឹតបន្តឹងការអនុវត្តច្បាប់ចរាចរណ៍ផ្លូវគោក រួចគេចខ្លួន ត្រូវកម្លាំងព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តសៀមរាប ស្រាវជ្រាវឃាត់ខ្លួនបានហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្ដមសេនីយ៍ទោ ហួត សុធី ស្នងការនគរបាលខេត្តសៀមរាប បានឲ្យដឹងនៅព្រឹកថ្ងៃទី ២៣ ខែឧសភា នេះថា កាលនៅថ្ងៃទី ១៨ ខែឧសភា ឆ្នាំ ២០២៥ វេលាម៉ោង ១៤ និង ០០ នាទី កម្លាំងនគរបាលចរាចរណ៍ផ្លូវគោក បានដាក់គោលដៅរឹតបន្តឹងការអនុវត្តច្បាប់ចរាចរណ៍ផ្លូវគោក នៅត្រង់ចំណុចខាងលិចស្ពានព្រះឥន្ទកោសី ស្ថិតនៅក្នុងភូមិមណ្ឌល ៣ សង្កាត់ស្លក្រាម ក្រុងសៀមរាប ខេត្តសៀមរាប។ លុះដល់វេលាម៉ោង ១៥ និង ២០ នាទី ជនសង្ស័យឈ្មោះ ទី គឹមហួរ ភេទប្រុស អាយុ ១៧ ឆ្នាំ មុខរបរមិនពិតប្រាកដ មានទីលំនៅបច្ចុប្បន្នភូមិតាវៀន សង្កាត់សាលាកំរើក ក្រុងសៀមរាប ខេត្តសៀមរាប បានធ្វើដំណើរឆ្លងកាត់គោលដៅរឹតបន្តឹងការអនុវត្តច្បាប់ចរាចរណ៍ផ្លូវគោក ដោយពុំបានពាក់មួកការពារសុវត្ថិភាព ក៏ត្រូវកម្លាំងសមត្ថកិច្ចបញ្ជាឲ្យឈប់ តែជនសង្ស័យខាងលើមិនព្រមឈប់ ហើយបានធ្វើសកម្មភាពលើកជើងខាងឆ្វេងរបស់ខ្លួនធាក់ទៅលើកម្លាំងនគរបាលចរាចរណ៍ ដែលកំពុងអនុវត្តច្បាប់ចរាចរណ៍ផ្លូវគោក។

ក្រោយកម្លាំងសមត្ថកិច្ចធ្វើការឃាត់ខ្លួនមកធ្វើការសួរនាំ តាមចម្លើយសារភាពជនសង្ស័យ ឈ្មោះ ទី គឹមហួរ ហៅទុយ បានឆ្លើយសារភាពថា រូបខ្លួនពិតជាបានធ្វើសកម្មភាពលើកជើងខាងឆ្វេងរបស់ខ្លួន ធាក់ទៅលើនគរបាលចរាចរណ៍ដែលកំពុងរឹតបន្តឹងការអនុវត្តច្បាប់ចរាចរណ៍ផ្លូវគោកពិតប្រាកដមែន។ ជនសង្ស័យខាងលើ ត្រូវបានកម្លាំងការិយាល័យជំនាញកសាងសំណុំរឿងបញ្ជូនទៅសាលាដំបូងខេត្តសៀមរាប ដើម្បីអនុវត្តឲ្យបានត្រឹមត្រូវតាមនីតិវិធីច្បាប់។

បច្ចុប្បន្ន ជនត្រូវចោទរូបនេះ ត្រូវបានចៅក្រមស៊ើបសួរ នៃសាលាដំបូងខេត្តសៀមរាប ចេញដីកាបង្គាប់ឲ្យឃុំខ្លួននៅពន្ធនាគារខេត្តសៀមរាប។

សូមជម្រាបផងដែរថា ករណីបទល្មើសចរាចរណ៍គឺជាបទលហុ តែបើឈានដល់ការប្រឆាំង ឬមួយក៏បង្កហិង្សាដល់សមត្ថកិច្ចដែលកំពុងអនុវត្តច្បាប់គឺនឹងត្រូវធ្លាក់ចូលក្នុងបទល្មើសព្រហ្មទណ្ឌ៕

អត្ថបទ ៖ ជុន កុសល