សន្តិសុខសង្គម

គណៈបញ្ជាការឯកភាពខណ្ឌកំបូល ចុះបង្ក្រាបទីតាំងល្បែងស៊ីសងខុសច្បាប់ ហាមអ្នកសារព័ត៌មានមិនឲ្យផ្ដិតរូបភាព

បានផុស

៦ ខែ មុន

នៅ

ថ្ងៃសុក្រ ២៨ មករា ២០២២

ដោយ

គណៈបញ្ជាការឯកភាពរដ្ឋបាលខណ្ឌកំបូល សហការជាមួយកម្លាំងអាវុធហត្ថ ចុះបង្ក្រាបទីតាំងបើកល្បែងស៊ីសងខុសច្បាប់មួយកន្លែង ដែលបើកដោយជនជាតិចិនឃាត់មនុស្សប្រុសស្រីជាច្រើននាក់ និងដកហូតសម្ភារៈតែមិនឲ្យអ្នកសារព័ត៌មានផ្ដិតយករូបភាពឡើយ។

ការចុះបង្ក្រាបនេះ បានធ្វើឡើងកាលពីវេលាព្រឹកថ្ងៃទី២៨ ខែមករា ឆ្នាំ២០២២ ទីតាំងស្ថិតនៅផ្ទះលេខ១៥៦ ផ្លូវលេខ៣ ក្នុងបុរីពិភពថ្មីកំបូល ភូមិត្រពាំងគល់ សង្កាត់កន្ទោក ខណ្ឌកំបូល រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពពីប្រជាពលរដ្ឋដែលគាត់រស់នៅជុំវិញផ្ទះដែលលួចបើកល្បែងដោយជនជាតិចិនខាងលើបានឱ្យដឹងដែរថា ការបើកល្បែងស៊ីសងដោយខុសច្បាប់គឺបើកលេងយ៉ាងរលូនជាយូរណាស់មកហើយ ប៉ុន្តែមិនដែលឃើញមានកម្លាំងចម្រុះណាចុះបង្ក្រាបឡើយ ទើបមកដល់ព្រឹកថ្ងៃទី២៨ ខែមករា នេះ ទើបកម្លាំងគណៈបញ្ជាការឯកភាពរដ្ឋបាលខណ្ឌកំបូល សហការជាមួយកម្លាំងអាវុធហត្ថខណ្ឌកំបូល ចុះបង្ក្រាបនិងឃាត់ខ្លួនជនជាតិចិនប្រុសស្រីជាច្រើននាក់ ថែមទាំងដកហូតសម្ភារជាច្រើន។ ប្រភពដដែលបានបន្តទៀតថា ក្នុងមូលដ្ឋានខណ្ឌកំបូល គឺតែងតែកើតមានឡើងបទល្មើសជាហូរហែមិនថាករណីឆក់ លួច កាច់កម៉ូតូ -ល- ជាហេតុនាំឲ្យប្រជាពលរដ្ឋមានការភ័យខ្លាច។

ក្នុងប្រតិបត្តិការចុះបង្ក្រាបល្បែងស៊ីសងដោយខុសច្បាប់ខាងលើនេះ មានអ្នកសារព័ត៌មានចុះទៅផ្តិតយករូបភាពដើម្បីធ្វើការផ្សព្វផ្សាយ ប៉ុន្តែបែរជាខាងអាជ្ញាធរក៏ដូចជាកម្លាំងអាវុធហត្ថ មិនអនុញ្ញាតឲ្យផ្ដិតយករូបភាពដើម្បីធ្វើការផ្សព្វផ្សាយឡើយ មិនដឹងថាមកជាមូលហេតុអ្វីទើបមានការលាក់បាំងបែបនេះ។

ក្រោយប្រតិបត្តិការចុះបង្ក្រាប ជនសង្ស័យទាំងអស់រួមទាំងវត្ថុតាង ត្រូវបាននាំយកទៅផ្នែកជំនាញដើម្បីបន្តនិតិវិធី ចំណែកទីតាំងបិទបណ្តោះអាសន្ន៕

អត្ថបទ៖ សុខា