សន្តិសុខសង្គម

ខឹងជនរងគ្រោះចេះធ្មប់ ទាញកាំបិតកាប់ចិញ្ច្រាំ បំណងសម្លាប់ចោល

បានផុស

១១ ខែ មុន

នៅ

ថ្ងៃសុក្រ ៤ មីនា ២០២២

ដោយ

ឃាត់ខ្លួនជនសង្ស័យម្នាក់ ករណីកាប់ចិញ្ច្រាំទៅលើជនរងគ្រោះម្នាក់ បណ្ដាលឲ្យរបួសធ្ងន់(ដង្ហើមចង្រិត) ដោយសារខឹងនឹងជនរងគ្រោះចេះអាបធ្មប់។ ហេតុនេះបានកើតឡើងនៅវេលាម៉ោង ២២ និង ០០ នាទី កាលពីថ្ងៃទី ៣ ខែមិនា ឆ្នាំ ២០២២ នៅចំណុចលើផ្លូវក្រួសក្រហម ក្នុងភូមិតាយ៉ែក ឃុំតាយ៉ែក ស្រុកសូទ្រនិគម ខេត្តសៀមរាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ទោ សុខ ម៉េងអ៊ាង នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តសៀមរាប បានឲ្យដឹងថា បន្ទាប់ពីទទួលបានសេចក្តីរាយការណ៍ពីពលរដ្ឋ កម្លាំងចំណុះឲ្យអធិការនគរបាលស្រុកសូទ្រនិគម សហការជាមួយកម្លាំងព្រហ្មទណ្ឌកម្រិតធ្ងន់នៃស្នងការដ្ឋានខេត្តសៀមរាប ចុះទៅដល់កន្លែងកើតហេតុ និងធ្វើការឃាត់ខ្លួនជនសង្ស័យឈ្មោះ ប៉ាវ សាន ភេទប្រុស អាយុ ៣៦ ឆ្នាំ មុខរបរកសិករ រស់នៅភូមិតាយ៉ែក ឃុំតាយ៉ែក ស្រុកសូទ្រនិគម ខេត្តសៀមរាប ពាក់ព័ន្ធករណីប៉ុនប៉ងមនុស្សឃាត ដោយចេតនា។ លោកបន្ថែមថា ជនរងគ្រោះ ឈ្មោះ ធឿន វ៉ាន ភេទស្រី អាយុ ៥០ ឆ្នាំ ទីលំនៅភូមិតាយ៉ែក ឃុំតាយ៉ែក ស្រុកសូទ្រនិគម ខេត្តសៀមរាប។

លោកវរសេនីយ៍ទោបញ្ជាក់ថា យោងតាមការបំភ្លឺរបស់សាក្សី ឈ្មោះ ផាត ផល្លី ភេទស្រី អាយុ ៤៥ឆ្នាំ ទីលំនៅភូមិឃុំខាងលើ ដែលឃើញហេតុការណ៍ជាក់ស្ដែង បានប្រាប់ឲ្យដឹងថា នៅពេលកើត ខ្លួនកំពុងតែអង្គុយនៅលើផ្ទះ រៀបចំគេង ស្រាប់តែលឺសំឡេងមានគេស្រែកហៅឲ្យជួយនៅមុខផ្ទះ រួចខ្លួនក៏ស្ទុះទៅមើល ក៏ឃើញជនរងគ្រោះដួលផ្កាប់មុខនឹងដី ហើយជនសង្ស័យកំពុងកាប់ពីលើចិញ្ច្រាំជាច្រើនកាំបិត។ ភ្លាមៗនោះ ខ្លួនក៏ជួយស្រែកហៅគេឯងឲ្យជួយ បន្តិចក្រោយមកក៏មានអ្នកជិតខាងបួនប្រាំនាក់ និងកូនប្រុសរបស់ជនរងគ្រោះមកជួយឃាត់បំបែក និងរាយការណ៍ជូនសមត្ថកិច្ចតែម្ដង។ ក្រុមគ្រួសារ បានយកជនរងគ្រោះទៅមណ្ឌលសុខភាពឃុំតាយ៉ែក តែដោយសារស្ថានភាពរបួសធ្ងន់ពេក មណ្ឌលសុខភាពបានបញ្ជូនបន្តមកស្រុក និងទៅខេត្តទៀត។

លោកនាយការិយាល័យបានបន្ថែមទៀតថា នៅចំពោះមុខសមត្ថកិច្ច ជនសង្ស័យឈ្មោះ ប៉ាវ សាន បានឆ្លើយសារភាពថា រូបគេពិតជាបានកាប់ចិញ្ច្រាំក្នុងគោលបំណងសម្លាប់ជនរងគ្រោះខាងលើប្រាកដមែន ដោយសារខឹងជនរងគ្រោះចេះធ្មប់។ បច្ចុប្បន្នកម្លាំងជំនាញនៃស្នងការដ្ឋាននគរបាលខេត្តសៀមរាប កំពុងរៀបចំសំណុំរឿងបញ្ជូនខ្លួនជនសង្ស័យទៅតុលាការដើម្បីចាត់ការតាមផ្លូវច្បាប់៕

អត្ថបទ៖ កុសល

Related Topics:ឃាតកម្ម