ក្រុម​ការងារ​ចម្រុះ​ CHARLIE21​ ត្រូវបានបង្កើត ស៊ើបអង្កេត​ករណីឃាតកម្ម​ទៅលើកុមារីអាយុ ៧ឆ្នាំ ​នៅ​​ក្រុងប៉ោយប៉ែត

កាលពីវេលាម៉ោង ៦៖៥០ នាទីព្រឹកថ្ងៃទី ៩ ខែមីនា ក្មេងស្រីអាយុ ៧ឆ្នាំម្នាក់បាន​ធ្វើដំណើរ​ចេញ​ពីផ្ទះ​ឆ្ពោះទៅសាលារៀន។ លុះដល់ម៉ោង ១១៖៣០ ឪពុករបស់ក្មេងស្រីនេះបាន​រាយការណ៍​ថា​ មិនបានឃើញកូនស្រីរបស់ខ្លួនចេញពីសាលារៀនត្រលប់មកផ្ទះវិញ។

មន្ត្រីនគរបាលមូលដ្ឋានបានទៅពិនិត្យបញ្ជីវត្តមានរបស់ក្មេងស្រីរងគ្រោះនៅសាលា ហើយបានឃើញថា ក្មេងស្រីនេះមិនមានវត្តមានចូលរៀនទេនៅពេលព្រឹកក្នុងថ្ងៃកើតហេតុ។

មន្ត្រីនគរបាលមូលដ្ឋានរួមជាមួយអ្នកភូមិបានចាប់ផ្តើមស្វែងរកកុមាររងគ្រោះ។ នៅវេលាម៉ោង ១០៖៣០នាទីយប់ សាកសពរបស់ក្មេងស្រីត្រូវបានគេរកឃើញ ដោយកត់់សំគាល់ថា មានការប៉ុនប៉ងកប់លាក់បាំងសាកសព។

អង្គភាពការពារកុមារ (CPU) បានទទួលដំណឹង ហើយបានបញ្ជូនក្រុមការងារស៊ើបអង្កេតបទល្មើសឃាតកម្ម (HIT) និងក្រុមការងារបច្ចេកទេសវិទ្យាសាស្រ្ត (FST) ទៅកន្លែងកើតហេតុ។

ការពិនិត្យកោសល្យវិច័យ និងការពិនិត្យកន្លែងកើតហេតុត្រូវបានធ្វើឡើង ហើយជាលទ្ធផល ក្រុមការងារចម្រុះ CHARLIE22 ក៏ត្រូវបានបង្កើតឡើងដោយមានកិច្ចសហប្រតិបត្តិការរវាងអង្គភាពការពារកុមារ (CPU) ស្នងការដ្ឋាននគរបាលខេត្តបន្ទាយមានជ័យ អគ្គស្នងការដ្ឋាននគរបាលជាតិកម្ពុជា ក្រសួងមហាផ្ទៃ និងនាយកដ្ឋានបច្ចេកទេស និងវិទ្យាសាស្រ្ត។

នាយកប្រតិបត្តិ អង្គភាពការពារកុមារ (CPU) លោក James McCabe បានឱ្យដឹងថា ស្នងការដ្ឋាននគរបាលខេត្តបន្ទាយមានជ័យ បានបំពេញភារកិច្ចបានយ៉ាងល្អត្រឹមត្រូវ ក្នុងការស៊ើបសួរពត៌មានបឋម និងការការពារកន្លែងកើតហេតុ ដូច្នេះធ្វើឱ្យមន្ត្រីជំនាញកោសល្យវិច័យអាចប្រម៉ូលភស្តុតាងសំខាន់ៗបានជាច្រើន។

បេសកកម្មនេះនៅមានសំណួរជាច្រើនមិនទាន់មានចម្លើយ ប៉ុន្តែលោកជឿជាក់ថា ក្រុមការងារចម្រុះនឹងស្វែងរកចម្លើយទាំងឡាយពាក់ព័ន្ធទៅនឹងសកម្មភាពដែលបានកើតឡើងទៅលើក្មេងស្រីរងគ្រោះនេះ។

លោកស្នើសុំដល់មហាជនទាំងអស់គ្នា ប្រសិនបើមានពត៌មាន ឬបានឃើញជនរងគ្រោះពេលកំពុងដើរទៅសាលា សូមផ្តល់ពត៌មាននេះទៅកាន់ស្នងការដ្ឋាននគរបាលខេត្តបន្ទាយមានជ័យ ឬអង្គភាពការពារកុមារ (CPU)៕