លើកដំបូង! ​ឆ្កែចចកព្រៃមួយ​ក្បាល​ចេញខាំ​ពលរដ្ឋ​បណ្ដាល​ឱ្យរងរបួស​ ៧ នាក់​នៅកំពង់ឆ្នាំង​

សត្វចចកព្រៃមួយក្បាលត្រូវបានប្រជាពលរដ្ឋក្នុងភូមិដេញវាយស្លាប់ បន្ទាប់ពីដេញខាំប្រជាពលរដ្ឋបណ្ដាលឱ្យរងរបួសប្រមាណ ៧ នាក់ កាលពីវេលម៉ោង ៦ ព្រឹកថ្ងៃទី ២៤ ខែឧសភា ២០២២ នៅក្នុងភូមិស្នោរ ឃុំខុនរ៉ង ស្រុកបរិបូណ៌ ខេត្តកំពង់ឆ្នាំង។

សមត្ថកិច្ចនគរបាលមូលដ្ឋានបានឲ្យដឹងថា នៅមុនពេលកើតហេតុពេលព្រឹកព្រលឹមមានប្រជាពលរដ្ឋនាំគ្នាទៅយកចង្រិតនៅតាមអន្លង់ដែលពួកគាត់បានដាក់ នៅចុងភូមិស្នោរ ពេលនោះមានឆ្កែចចកព្រៃមួយក្បាលសម្បុរ ស លឿង បានស្ទុះចេញពីព្រៃមកខាំប្រជាពលរដ្ឋម្នាក់ ហើយម្នាក់ទៀតព្រមទាំងហើយបានរត់ចូលភូមិដេញខាំប្រជាពលរដ្ឋមិនរើសមុខបណ្ដាលឲ្យរងរបួសប្រជាពលរដ្ឋ ៧ នាក់។ បន្ទាប់មកប្រជាពលរដ្ឋបាននាំគ្នាដេញវាយសម្លាប់តែម្ដង។

តាមសម្ដីសមត្ថកិច្ច ភូមិស្នោរ ឃុំខុនរ៉ង មិនមែនជាភូមិមានព្រៃប៉ុន្មានទេគ្រាន់តែមានព្រៃរបោះ និងគម្ភឫ ស្សី នៅជាប់ជើងភូមិច្រើន តែប៉ុណ្ណោះ មិនដឹងថាឆ្កែចចកព្រៃមួយក្បាលនេះចេញពមកណាទេ។

ចំពោះប្រជាពលរដ្ឋដែលរងរបួសស្រាលៗបានទៅព្យាបាលតាមផ្ទះដោយខ្លួនឯង។ ប៉ុន្តែអ្វីមិនធ្លាប់មាមនោះ គឺជាលើកទីមួយហើយដែលមានឆ្កែចចកព្រៃចេញមកខាំប្រជាពលរដ្ឋក្នុងភូមិនេះ៕

អត្ថបទ៖ ឈៀងថារិទ្ធ