ឆេះផ្ទះលក់ចាប់ហួយមួយកន្លែង ខាតបង់ទឹកប្រាក់រាប់ម៉ឺនដុល្លារ

ផ្ទះលក់ចាប់ហួយមួយកន្លែង ត្រូវបានអគ្គិភ័យឆាបឆេះគ្មានសល់​ដោយសារតែឆ្លងចរន្តអគ្គិសនី បើគិតជាទឹកប្រាក់​ខូចខាត​​អស់​​​រាប់ម៉ឺន​ដុល្លារ។

ហេតុការណ៍ដ៏រន្ធត់នេះ បានកើតឡើងនៅថ្ងៃទី ២៨ ខែមិថុនា ឆ្នាំ២០២២  នៅវេលាម៉ោង ១១ និង ១០នាទីយប់ ស្ថិតនៅចំណុចក្រុមទី១៤ ភូមិច្រាំងបាក់ ឃុំឃ្លាំងមាស ស្រុកបវេល ខេត្តបាត់ដំបង។

ករណីអគ្គិភ័យ ដែលបានកើតឡើងចំនួន ០១ លើកនេះគឺបណ្តាលឲ្យឆេះផ្ទះលក់អីវ៉ាន់ចាប់ហួ៊យ ១ ខ្នង ទំហំ ២០មx​៣០​ម ធ្វើអំពីឈើប្រក់ស័ង្កសី​របស់ម្ចាស់ឈ្មោះ សំ ហុង  ភេទប្រុសអាយុ ៦៣ ឆ្នាំ រស់នៅក្នុងភូមិឃុំឃ្លាំងមាស ស្រុកបវេល ខេត្តបាត់ដំបង។

យោងតាមការបញ្ជាក់ពីម្ចាស់ផ្ទះ គឺសម្ភារ:ដែលខូចខាតរួមមាន៖  ឆេះផ្ទះលក់ចាប់ហួយ ១ ខ្នងទាំងស្រុង។ រងរបួសមនុស្ស ១នាក់ (ម្ចាស់ផ្ទះ) ឆេះប្រាក់ខ្មែរអស់ ៣០.០០០ ០០០ រៀល (សាមសិបលានរៀល) និង​ខូចខាត​សម្ភារ:​ក្នុង​ផ្ទះទាំងស្រុងសរុបប្រហែល ៥០.០០០ ដុល្លា (ប្រាំម៉ឺនដុល្លារ) ដោយមូលហេតុគឺដោយសារឆ្លងចរន្តអគ្គិសនី។

ភ្លាមៗនោះដែរ រថយន្តរបស់សមត្ថកិច្ចចំនួន ៣ គ្រឿង និង រថយន្តក្រុមហ៊ុនឯកជន ចំនួន ១ គ្រឿង បានចេញអន្តរាគមន៍ ដើម្បីទប់ស្កាត់មិនអោយរាលដាលទៅផ្ទះពលរដ្ឋដទៃ៕

អត្ថបទ៖ សោ និយមរ័ត្ន