កាប់សម្លាប់ប្អូនថ្លៃ ហើយព្យាយាមហែលទឹកឆ្លងទន្លេមេគង្គគេចពីសមត្ថកិច្ច

បុរសជាបងថ្លៃរបស់នារីជនរងគ្រោះ ត្រូវបានកម្លាំងនគរបាលព្រហ្មទណ្ឌស្រុកសំបូរ ខេត្តក្រចេះ ដេញតាមចាប់ខ្លួនដល់ពាក់កណ្ដាលទន្លេមេគង្គ បន្ទាប់ពីធ្វើសកម្មភាពកាប់សម្លាប់នារីរងគ្រោះត្រូវជាប្អូនថ្លៃមួយពូថៅ​បណ្ដាល​ឲ្យ​​ស្លាប់​​ភ្លាមៗ​​នៅកន្លែងកើតហេតុ។

តាមរបាយការណ៍ពីសមមត្ថកិច្ចបានឲ្យដឹងថា ជនដៃដល់ក្នុងអំពើឃាតកម្ម ដែលព្យាយាមហែលទឹកកាត់ទន្លេដើម្បីគេចខ្លួន​បន្ទាប់ពីធ្វើសកម្មភាពយកពូថៅកាប់លើស្រ្តីរងគ្រោះ​ដែលត្រូវជាប្អូនថ្លៃចំកញ្ចឹងកខាងក្រោយបណ្តាលអោយស្លាប់មួយរំពេច គឺត្រូវបានកម្លាំងនគរបាលព្រហ្មទណ្ឌស្រុកសំបូរ ស្ទាក់ចាប់បាននៅកណ្តាលទន្លេមេគង្គ ក្រោយកើតហេតុភ្លាមកាលពីព្រឹកថ្ងៃទី១១ ខែកក្កដា នៅចំណុចភូមិកោះដំបង​ ឃុំបឹងចារ​ ស្រុកសំបូរ​ ខេត្តក្រចេះ​ ។

របាយការណ៍សមត្ថកិច្ចបានបន្ថែមថា នារីរងគ្រោះមានឈ្មោះ​ ទីង​ ស្រីម៉ៅ អាយុ២៧ឆ្នាំ​ ចំណែកជនដៃដល់ជាបងថ្លៃឈ្មោះ​ ថា​ លីណា​ន​ អាយុ៣៤ឆ្នាំ​ ជាមនុស្សធ្លាប់កើតជំងឺសសៃប្រសាទ មានទីលំនៅជាមួយគ្នាក្នុងភូមិកោះដំបង​ ឃុំបឹងចារ​ ស្រុកសំបូរ​ ខេត្តក្រចេះ​៕

អត្ថបទ៖ សុខុម