សន្តិសុខសង្គម
អាជ្ញាធរខេត្តសៀមរាប កំពុងតាមដាន និងឃ្លាំមើលសកម្មភាពកៀរគរមនុស្សរបស់លោក ខឹម វាសនា
មនុស្សប្រុស ស្រី ក្មេង ចាស់ ប្រមាណជិត២ម៉ឺននាក់ហើយបាននាំគ្នាទៅប្រមូលផ្តុំនៅចំការរបស់លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ នៅក្នុងភូមិថ្មជល់ ឃុំត្បែង ស្រុកបន្ទាយស្រី ខេត្តសៀមរាបតាមការឃោសនារបស់លោក។ លោក ខឹម វាសនា នាប៉ុន្មានថ្ងៃជាប់គ្នានេះ បានបង្ហោយហៅអ្នកគាំទ្ររបស់ខ្លួនទាំងក្នុង និងក្រៅប្រទេសទៅជួបជុំគ្នានៅទីនោះ ជាទីដែលលោកអះអាងដោយខ្លួនឯងថា មានសុវត្ថិភាពពីការលិចលង់ផែនដីដោយបាតុភូត Black Hole។ អាជ្ញាធរខេត្តសៀមរាប ទាំងថ្នាក់ខេត្ត និងស្រុកបន្ទាយស្រី កំពុងតែតាមដានយ៉ាងយកចិត្តទុកចំពោះសកម្មភាពនេះ។
លោក តេង ច័ន្ទណាត ស្នងការនគរបាលខេត្តសៀមរាប បានឲ្យដឹងនៅរសៀលថ្ងៃទី២៦ សីហា នេះថា កម្លាំងសមត្ថកិច្ចកំពុងតាមដានរាល់សកម្មភាពប្រមូលមនុស្សរបស់ប្រធានគណបក្សសម្ព័ន្ធដើម្បីប្រជាធិបតេយ្យ លោក ខឹម វាសនា។ លោកបន្តថា លឺថា ពលរដ្ឋខ្មែរដែលជាពលករនៅកូរ៉េខាងត្បូង ក៏វិលត្រឡប់មកកម្ពុជាវិញដែរ ទោះបីពួកគេកំពុងធ្វើការ និងដឹងថា ខាតប្រយោជន៍ជាច្រើនក៏ដោយ។ បើតាមលោក តេង ច័ន្ទណាត កងកម្លាំងរបស់លោកកំពុងតែតាមដានសកម្មភាពបន្តរបស់ក្រុមលោក ខឹម វាសនានេះ។
ចំណែក លោកឃឹម ហ្វីហង់ អភិបាលស្រុកបន្ទាយស្រីវិញ បានគូសបញ្ជាក់ឲ្យដឹងដែរថា ក្នុងនាមអាជ្ញាធរគឺកំពុងតាមដាននូវរាល់សកម្មភាពនៃការប្រមូលផ្តុំមនុស្សរបស់លោក ខឹម វាសនា នេះ។ លោកថា ការប្រមូលផ្ដុំនេះ មានចំនួនមនុស្សច្រើន ដោយមិនបានស្នើសុំការអនុញាតឡើយ។ ដូច្នេះហើយ លោកបញ្ជាក់ថា អាជ្ញាធរកំពុងធ្វើការ ហើយបើជារឿងជំនឿសាសនា វាជារឿងធម្មតា ប៉ុន្តែ បើជារឿងនយោបាយវិញ គឺជារឿងធំ ដែលនឹងត្រូវគិតគូ មិនអាចបណ្តែតបណ្តោយបានទេ។
សូមបញ្ជាក់ថា លោក ខឹម វាសនា តាមរយៈទំព័រហ្វេសប៊ុករបស់លោកបានអធិប្បាយជាបន្តបន្ទាប់ពីការកើតមានបាតុភូតBlacK Hole ដែលអះអាងថា នឹងកម្ទេចផែនដីនេះ ដោយការលិចលង់ដោយទឹកសមុទ្រ ហើយមានតែកន្លែងរបស់លោកទេដែលមានសុវត្ថិភាព។ ជាមួយគ្នានេះ លោកបានឃោសនាអំពាវនាវដល់អ្នកគាំទ្រទាំងក្នុង និងក្រៅប្រទេសឲ្យធ្វើដំណើរទៅកាន់តំបន់នោះ។
ជាលទ្ធផល មានអ្នកដែលជឿហើយនាំគ្នាទាំងកូន ទាំងចៅ សម្រុកទៅតាមឃោសនារបស់លោក ខឹម វាសនា។ ប៉ុន្តែ ទន្ទឹមគ្នានេះ ក៏មានការចេញមកអំពាវនាវកុំប្រជាពលរដ្ឋជឿតាមការបាន់ស្មានដែលគ្មានលក្ខណៈវិទ្យាសាស្រ្តរបស់លោកខឹម វាសនា ពីសំណាក់ក្រសួង ស្ថាប័នពាក់ព័ន្ធមួយចំនួនផងដែរ។ លើសពីនេះទៅទៀត ប្រជាពលរដ្ឋខ្មែរខ្លះ ក៏បានប្រតិកម្ម និងបានរិះគន់លោក ខឹម វាសនា ថាកំពុងបោកប្រាស់អ្នកគាំទ្រ និងធ្វើឲ្យមានចលាចលក្នុងសង្គម។ ពួកគេខ្លះថែមទាំងបានស្នើឲ្យអាជ្ញាធរមានសមត្ថកិច្ចចាត់វិធានការចំពោះសកម្មភាពឃោសនាគៀរគរមនុស្សរបស់លោក ខឹម វាសនានេះ ថែមទៀតផង៕
ដោយ៖ កុសល
-
កីឡា១ សប្តាហ៍ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៧ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ១ សប្តាហ៍ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៦ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ១ សប្តាហ៍ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានជាតិ៦ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
ជីវិតកម្សាន្ដ២ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»