ប្រទះឃើញសពបុរសម្នាក់ ស្លាប់ទាំងដៃជាប់ខ្នោះ

សពបុរសម្នាក់ត្រូវបានគេប្រទះឃើញស្លាប់ដោយដៃជាប់ខ្នោះ កាលពីវេលាម៉ោង១៨និង០០នាទីល្ងាច ថ្ងៃទី១៨ ខែកញ្ញាឆ្នាំ២០២២ នៅក្បែរចំណុចបង្គោលសេវ៉ា០៩៧ ស្ថិតក្នុងភូមិរិទ្ធីសែនជយ័២ ឃុំអូរស្វាយ ស្រុកបុរីអូរស្វាយសែនជយ័ ខេត្តស្ទឹងត្រែង។

បុរសដែលស្លាប់នោះត្រូវបានប្រជាពលរដ្ឋប្រទះឃើញស្លាប់ដោយដៃជាប់ខ្នោះដែលមានអាយុប្រហែលជាង២០ឆ្នាំ មានពាក់អាវដៃវែងពណ៌ផ្ទៃមេឃ ស្លៀក់ខោពណ៌បៃតង ក្រវ៉ាត់ខ្សែក្រវ៉ាត់ពណ៌ខ្មៅ ក្បែរសាកសពមានស្បែកជើងផ្ទាត់មួយគូរ។

សមត្ថកិច្ចបានឱ្យដឹងថា ជនរងគ្រោះឈ្មោះ ថេន សុមិត្ត ភេទប្រុសអាយុ១៩ឆ្នាំ រស់នៅភូមិកោះកី ឃុំកោះស្នៃង ស្រុកបុរីអូរស្វាយសែនជយ័។

សមត្ថកិច្ចបានបន្តអោយដឹងទៀតថា តាមការឱ្យដឹងពីសាច់ញាត្តិបានប្រាប់ថា ជនរងគ្រោះជិះម៉ូតូម៉ាកវ៉េវអាល់ហ្វា កញ្ចាស់ពណ៌ត្រួយចេក ចេញពីផ្ទះតាំងពីថ្ងៃទី១៦ ខែកញ្ញាមកម្លះ ពុំបានត្រឡប់ទៅផ្ទះវិញនោះទេ ទើបនៅល្ងាចថ្ងៃទី១៨ ត្រូវបានគេប្រទះឃើញស្លាប់ទាំងដៃជាប់ខ្នោះនៅចំណុចខាងលើ។ ចំណែកម៉ូតូកញ្ចាស់របស់ជនរងគ្រោះក៏មិនឃើញដែរ។

ស្ថិតក្រោមការត្រួតពិនិត្យ និងធ្វើកោសល្យវិច័យរបស់សមត្ថកិច្ច ជនរងគ្រោះត្រូវបានគេរកឃើញថា ស្លាប់ដោយអំពើឃាតកម្ម ព្រោះឃើញមានស្នាកស្នាមផុងលលាដ៍ក្បាលផ្នែកខាងក្រោយនិងបាក់ក ។ សមត្ថកិច្ចសន្និដ្ឋានថា ករណីនោះជាអំពើឃាតកម្ម ច្រើនជាងអំពើប្លន់សម្លាប់ហើយជនរងគ្រោះអាចនិងស្គាល់គ្នាជាមួយជនដៃដល់ និងពេលធ្វើសកម្មភាពជនដៃដល់អាចមានគ្នាលើសពី២នាក់ឡើងទៅ ព្រោះបើមួយទល់នឹងមួយជនដៃដល់ពុំអាចមានឱកាសដាក់ខ្នោះដៃជនរងគ្រោះបាននោះទេ។

សូមបញ្ជាក់ថា ក្រោយការពិនិត្យសាកសព និងធ្វើកំណត់ហេតុរួចរាល់ និងដោយមានការសម្របសម្រួលពីព្រះរាជអាជ្ញាអមសាលាដំបូងខេត្ត សពត្រូវបានប្រគល់អោយសាច់ញ្ញាតិយកទៅធ្វើបុណ្យតាមប្រពៃណី៕

អត្ថបទ៖ ងិនលីម