សង្ស័យទីតាំងអាគារខុនដូមួយកន្លែង នៅភ្នំពេញ បង្កប់ល្បែងស៊ីសង

ដោយមានការបញ្ជាផ្ទាល់ពី លោក ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ លោក សុខ ពេញវុធ អភិបាលរងរាជធានីភ្នំពេញ នៅយប់ថ្ងៃទី១៩ ខែកញ្ញានេះ បានដឹកនាំកម្លាំងចម្រុះរដ្ឋបាលរាជធានីភ្នំពេញ ចុះពិនិត្យទីតាំងអាគារខុនដូមួយកន្លែងជាន់ទី១៩-២០ ផ្លូវលេខ៦៥ ដែលស្ថិតក្នុងសង្កាត់ស្រះចក ខណ្ឌដូនពេញ សង្ស័យបង្កប់ល្បែងស៊ីសង។

ក្នុងប្រតិបត្តិការនេះ មានការសហការសម្របសម្រួលពី លោក គឹម ហុងសាន ព្រះរាជអជ្ញារងសាលាដំបូងរាជធានីភ្នំពេញ, លោក សុង លី ស្នងការរងនគរបាលរាជធានីភ្នំពេញ, លោក ជា ខេមា អភិបាលខណ្ឌដូនពេញ, លោក ទៀង ច័ន្ទសារ អធិការនគរបាលខណ្ឌដូនពេញ, លោក ថោង ពិសិដ្ឋ មេបញ្ជាការកងរជអាវុធហត្ថខណ្ឌដូនពេញ។

សមត្ថកិច្ចបានឱ្យដឹងថា ពេលចុះដល់ទីតាំង ក្រុមការងារបានឃេីញថា អ្នកគ្រប់គ្រងទីតាំង និងបុគ្គលិកជនជាតិចិន អ្នកបកប្រែភាសា បានរៀបចំវេចខ្ចប់សម្ភារៈដែលសង្ស័យប្រព្រឹត្តល្បែងសុីសងខុសច្បាប់រួចរាល់អស់ហើយ។

ក្រោយពិនិត្យរួចរាល់ ក្រុមការងារចម្រុះបានសម្រេចអនុញ្ញាតឱ្យអ្នកគ្រប់គ្រងប្រមូលសម្ភារៈទាំងនោះ ចេញពីទីតាំងឱ្យអស់ និងបានធ្វើការណែនាំដល់អ្នកគ្រប់គ្រងដូចជា៖

ទី១. ហាមប្រព្រឹត្តិល្បែងសុីសងខុសច្បាប់គ្រប់ប្រភេទ

ទី២. ហាមជួញដូរ ឬប្រេីប្រាស់គ្រឿងញៀនជាដាច់ខាត 

ទី៣. ត្រូវចូលរួមសហការឱ្យបានល្អជាមួយអាជ្ញាធរមានសមត្ថកិច្ចគ្រប់លំដាប់ថ្នាក់ 

និងទី៤. ក្នុងករណីមិនអនុវត្តតាមខ្លឹមសារខាងលេី ម្ចាស់ទីតាំងត្រូវទទួលខុសត្រូវចំពោះមុខច្បាប់ជាធរមាន៕

អត្ថបទ៖ ឃិត សុខា