ឆ្លងចរន្តអគ្គិសនីឆេះរថយន្តសាំយ៉ុងមួយគ្រឿងនិងរាលដាលដល់រថយន្ដពីរគ្រឿងទៀត

រថយន្តសាំយ៉ុងមួយគ្រឿងដឹកសម្ភារៈ ខណៈកំពុងបើកសុខៗស្រាប់តែឆ្លងចរន្តអគ្គិសនីឆាបឆេះយ៉ាងសន្ធោសន្ធៅ ខូច​ខាត​អស់ទាំងស្រុង និងរាលដាលដល់រថយន្តពីរមួយគ្រឿងទៀត បង្កឲ្យមានការភ្ញាក់ផ្អើលដល់ប្រជាពរដ្ឋ និងសមត្ថកិច្ចចេញរថយន្តពន្លត់អគ្គិភ័យជួយអន្តរាគមន៍។

ហេតុការណ៍គ្រោះអគ្គិភ័យឆេះរថយន្ដនេះ បានកើតឡើងកាលវេលាម៉ោង១១និង៥០នាទីយប់ ថ្ងៃីទី៤ ខែតុលា ឆ្នាំ២០២២ ស្ថិតតាមបណ្ដោយផ្លូវ២៦៥ ចំណុចជិតផ្សារសំណង់១២ ក្នុងសង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។

យោងតាមប្រភពពីអ្នកបើករថយន្តបានឲ្យដឹងថា ពួកគាត់មានគ្នាបីនាក់បានបើករថយន្តសាំយ៉ុង ពណ៌សមួយគ្រឿងដឹកតុនិងកៅអីពេញ ចេញពីខេត្តតាកែវយកមកឲ្យម៉ូយនៅរាជធានីភ្នំពេញ ខណះមកដល់ហើយស្រាប់តែឆាបឆេះចេញជាអណ្ដាលភ្លើងពីខាងក្រោមរថយន្តយ៉ាងខ្លាំង ភ្លាមៗនោះគាត់ទាំងបីនាក់ឈប់រថយន្តហើយបានយកទឹក​មក​ចាក់ពន្លត់ដែរតែមិនរលត់ ឆេះកាន់ខ្លាំងឡើងៗ ទើបស្រែកឲ្យគេជួយ និងផ្អើលដល់ប្រជាពរដ្ឋរាយការណ៍ទៅសមត្ថកិច្ចចេញរថយន្តពន្លត់អគ្គិភ័យជាច្រើនគ្រឿងមកបាញ់ពន្លត់ និងបានឆេះរាលដាលដល់រថយន្តពីរគ្រឿងទៀតខូតខាតផងដែរ ចំណែករថយន្តសាំយ៉ុងខូតខាតទាំងស្រុង ។

ក្នុងហេតុការណ៍គ្រោះអគ្គិភ័យនេះប្រើប្រាស់រថយន្តអគ្គិភ័យចំនួន៦គ្រឿងទើបរលត់ទាំងស្រុង។ តែមិនបណ្ដាលឲ្យមានអ្នកណារងរបួសនោះឡើយ៕

អត្ថបទ៖ សុខា