នគរបាលខេត្តកណ្ដាល​ បញ្ជាក់ពីមូលហេតុបឋម​ពាក់ព័ន្ធ​នឹង​ករណី​លិច​ទូក​បណ្ដាល​ឲ្យ​បាត់​ខ្លួន​សិស្ស​ជាង១០នាក់

កណ្ដាល ៖ ស្នងការដ្ឋាន​នគរបាលខេត្តកណ្ដាល បាន​ធ្វើការបញ្ជាក់ពីមូលហេតុបឋម ​ពាក់ព័ន្ធ​នឹង​ករណី​លិចទូក​ដរ ​បណ្ដាល​ឲ្យ​សិស្សជាង១០នាក់បាត់ខ្លួន​។

នៅយប់ថ្ងៃព្រហស្បតិ៍ ៣រោច ខែ អស្សុជ​ ឆ្នាំខាល​ ចត្វាស័ក​ ព.ស២៥៦៦ ត្រូវនឹងថ្ងៃទី១៣ ខែតុលា ឆ្នាំ២០២២ វេលាម៉ោង២២និង៣០នាទី​ លោកឧត្តមសេនីយ៍ទោ ឈឿន សុចិត្ត ស្នងការ​នគរបាល​ខេត្តកណ្ដាល​បានដឹកនាំកម្លាំងចុះត្រួតពិនិត្យ ករណីលិចទូកដរទទឹង ដែលបានកើតហេតុកាលពីវេលាម៉ោង១៩និង០០នាទី​ ស្ថិត​នៅ​ចំណុច ទូកដរទទឹងស្ថិតនៅ ភូមិកោះចំរើន ឃុំកំពង់ភ្នំ ស្រុកលើកដែក។

ករណីខាងលើនេះ បណ្ដាលឱ្យលិចទូកដរទទឹង បាត់​ខ្លួន​សិស្សសាលា ប្រហែល ១៤ ទៅ ១៥ នាក់ ដែលមានទីលំនៅកន្លែង ភូមិ ឃុំកើតហេតុខាងលើ ហើយកម្លាំងអធិការដ្ឋាននគរបាលស្រុកលើដែក យើងបានចុះសហការជាមួយ កម្លាំងប៉ុស្តិ៍រដ្ឋបាលកំពង់ភ្នំ ប្រជាការពារ និង ប្រជាពលរដ្ឋ ចុះស្វែងរក និង ជួយសង្គ្រោះ សិស្សសាលា បាន​ចំនួន ០៤ នាក់ ស្រី០១នាក់ ហើយ​បានបញ្ជូនទៅសង្គ្រោះតាមរថយន្តសាមុយ នៅមន្ទីរពេទ្យបង្អែកស្រុកលើកដែក ពេលទៅដល់មន្ទីរពេទ្យបានស្លាប់ចំនួន០២នាក់ ដោយមិនទាន់ស្គាល់អត្តសញ្ញាណពិតប្រាកដ។

ករណីនេះបណ្ដាលមកពី ម្ចាស់ទូកដាក់លើសចំណុះ ធ្វេសប្រហែស និងមិនប្រុងប្រយ័ត្ន ហើយគ្មានអាវពោង សម្រាប់ការពារ។

បច្ចុប្បន្ន កម្លាំងយើង កំពុងតែបន្ត ស្វែងរក ដោយប្រើប្រាស់មធ្យោបាយទូកចំនួន ០៥ គ្រឿង៕