ប្រាប់តៗគ្នាផង ប្រយ័ត្នអស់ ១០ ម៉ឺនរៀល នៅព្រំប្រទល់ ភ្នំពេញ ក្រុងតាខ្មៅ ខេត្តកណ្ដាល

បងប្អូនប្រជាពលរដ្ឋ ឬមន្ត្រីរាជការដែលខ្ជិលខ្លាចខាតពេល និងចូលចិត្តជិះបញ្ច្រាសផ្លូវ នៅខាងលិចផ្សារតាខ្មៅថ្មី ប្រយ័ត្ន​ចូលដើម ដោយត្រូវពិន័យ ១០ ម៉ឺនរៀល។

អធិការដ្ឋាននគរបាលក្រុងតាខ្មៅ បានជូនដំណឹងដល់​ប្រជាពលរដ្ឋ​ដែលធ្វើ​ដំណើរបញ្ច្រាសទិស ចំណុចផ្លូវខាងលិច ផ្សារតាខ្មៅថ្មី សូមសហការបញ្ឈប់ជិះបញ្ច្រាសបន្តទៀត ដើម្បីអាយុជីវិតខ្លួនឯង និងសុវត្ថិភាពខ្លួនអ្នកទទៃ ជាពិសេសចូលរួមគោរពច្បាប់ចរាចរណ៍ផ្លូវគោក​នៃព្រះរាជាណាចក្រកម្ពុជា។

ចាប់ពីពេលនេះទៅ សមត្ថកិច្ចចរាចរណ៍ក្រុងតាខ្មៅ និងដាក់គោលដៅចាំត្រួតពិនិត្យ និង ផាក​ពិន័យនៅចំនុចខាងលើ និងធ្វើការផាកពិន័យតាមច្បាប់ចរាចរណ៍លើបងប្អូនណា​ដែល​ប្រព្រឹត្ត​ខុសច្បាប់ បន្ទាប់ពីអប់រំណែនាំបងប្អូនជាច្រើនលើកច្រើនសាររួចមកហើយនៅចំនុចខាងលិច ផ្សារតាខ្មៅថ្មី នេះ។

ចំពោះចាត់ការនេះ បងប្អូនប្រជាពលរដ្ឋដែលធ្វើដំណើរពីភ្នំពេញតាមបណ្ដោយផ្លូវជាតិលេខ២ ចំណុចពីរង្វង់ព្រះនរាយ ទៅរង្វង់មូលតាខ្មៅ មានការសាទរចំណាត់ការនេះ ព្រោះកន្លងមកករណី​ជិះបញ្ច្រាសនេះបង្កឱ្យមានគ្រោះថ្នាក់ ច្រើនករណីហើយ៕