សមត្ថកិច្ចបង្ក្រាបទីតាំងល្បែងចាក់អាប៉ោងនៅផ្សារបន្លែ ច្បារអំពៅ ចំណែកអ្នកលេងរត់គេចអស់

ទីតាំងបើកលេងអាប៉ោងមួយកន្លែងស្ថិតនៅជាប់ផ្សារបន្លែ ផ្សារច្បារអំពៅ ត្រូវបានសមត្ថកិច្ច និងអាជ្ញាធរសង្កាត់ច្បារអំពៅទី២ បង្ក្រាប ប៉ុន្តែជាលទ្ធផលគឺរឹបអូសបានតែសម្ភារៈអាប៉ោង រីឯអ្នកលេងរត់បាត់អស់។

តាមការអះអាងពី លោក យុិន វុធ ចៅសង្កាត់ច្បារអំពៅទី២ បានឱ្យដឹងថា ករណីបង្ក្រាបទីតាំងល្បែងអាប៉ោងនេះបានធ្វើឡើងនៅវេលាម៉ោង ១១ និង១៥ នាទីព្រឹក ថ្ងៃទី៦ ខែមករានេះ នៅចំណុចក្បែរផ្សារបន្លែ ផ្សារច្បារអំពៅ ស្ថិតក្នុងភូមិកណ្តាល សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ។

លោកចៅសង្កាត់ បានបញ្ជាក់ថា នៅពេលសមត្ថកិច្ចប៉ុស្តិ៍ច្បារអំពៅទី២ ចុះទៅដល់ទីបើកល្បែង គឺរកឃើញតែសម្ភារៈអាប៉ោង ចំណែកអ្នកលេងបានរត់គេចអស់។

ទាក់ទិនទៅនឹងករណីបង្ក្រាបទីតាំងបនល្បែងខាងលើនេះ លោក សាន់ ប៊ុនណា ប្រធានផ្សារបន្លែ បានឱ្យ “កម្ពុជាថ្មី” ដឹងថា ទីតាំងល្បែងនេះគឺបើកលេងដូចផ្លេកបន្ទោរ។ និយាយរួមគឺបើកលេងតែអំឡុងពេលដែលសមត្ថកិច្ច និងអាជ្ញាធរជាប់បំពេញការងារ ហើយទីតាំងល្បែងនេះហើយដែលពង្វក់អ្នកមកទិញម្ហូបនៅផ្សារ ឆ្លៀតពេលចូលចាក់អាប៉ោង។ ពេលខ្លះឈ្នះបានលុយទិញម្ហូបឆ្ងាញ់ៗ តែចំថ្ងៃស៊យរកលុយទិញម្ហូបមិនបាន ដែលភាគច្រើនប៉ះចំថ្ងៃស៊យ។

ទីតាំងនេះគឺលោកប្រធានផ្សារបានរបាយការណ៍ជូនទៅសមត្ថកិច្ចចម្រុះឱ្យមកបង្ក្រាប ប៉ុន្តែម្ចាស់ទីតាំងនៅតែគឃ្លើនមិនដឹងពួកគេអាងអ្វី៕

អត្ថបទ៖ នរា