Update៖ អគ្គិភ័យដែលឆេះរោងចក្រនៅខណ្ឌពោធិ៍សែនជ័យ បានរលត់ហើយ តែខូចខាតទាំងស្រុង

រោងចក្រកាត់ដេរដែលត្រូវអគ្គិភ័យឆាបឆេះកាលពីម៉ោង៣រសៀល ថ្ងៃទី៦ ខែមិនា នៅសង្កាត់កាកាបទី២ ខណ្ឌពោធិ៍សែនជ័យ បានរលត់ហើយ តែត្រូវបានអណ្ដាតភ្លើងឆេះអស់ទាំងស្រុង និងមិនមានអ្នករងរបួសនោះទេ មូលហេតុគឺមកពីឆ្លងចរន្ដអគ្គិនី។

តាមប្រភពព័ត៌មានពីកន្លែងកេីតហេតុបានឲ្យដឹងថា មុនពេលកេីតហេតុ ខណៈកម្មករកំពុងធ្វេីការស្រាប់តែមានការឆ្លងចរន្តអគ្គិស​នីចេញពីម៉ាស៊ីនម៉ូទ័រ តុកាត់ ភ្លាមនោះក្រុមកម្មករក៏នាំគ្នារត់ចេញមកខាងក្រៅ និងអ្នកខ្លះយកបំពង់ពន្លត់អគ្គិភ័យមកបាញ់ពន្លត់ តែភ្លេីងបានឆាបឆេះកាន់តែខ្លាំងឡេីងៗមិនអាចគ្រប់គ្រងបានក៏រាយការណ៍ទៅអាជ្ញាធរមានសមត្ថកិច្ចហៅក្រុមរថយន្តពន្លត់អគ្គិភ័យមកអន្តរាគមន៍។

ក្រោយពីទទួលបានព័ត៌មានភ្លាមក្រុមរថយន្តពន្លត់អគ្គិភ័យជាច្រេីនអង្គភាពបានចុះមកអន្តរាគមន៍បាញ់ពន្លត់ចៀសវាង​រាល​ដាលដល់រោងចក្រដែលនៅជាប់ៗគ្នានោះទៀត។ រោងចក្រខាងលេីមានទំហំទទឹង៣០ម៉ែត្រ បណ្តោយ៥០ម៉ែត្រ មានថៅកែជាជនជាតិចិន រងការខូចខាតទាំងស្រុង ដោយមិនមានមនុស្សរងរបួសនោះទេ។

ករណីអគ្គិភ័យនេះ បានបង្កការភ្ញាក់ផ្អេីលកាលពីវេលាម៉ោង៣រសៀល ថ្ងៃទី៦ ខែមិនា ឆ្នាំ២០២៣ នៅចំណុចរោងចក្រយីហោ តុងហ្វាង ក្នុងភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ៕

អត្ថបទ៖ សុខា