ឃ្លាំងជួសជុលរថយន្តមួយកន្លែងត្រូវបានអគ្គិភ័យឆាបឆេះយ៉ាងសន្ធោសន្ធៅបង្កការភ្ញាក់ដល់ប្រជាពលរដ្ឋ និងសមត្ថកិច្ចកាលពីវេលាម៉ោង២និង៣០នាទីរំលងអធ្រាត្រឈានចូលថ្ងៃទី១៤ ខែមីនា ឆ្នាំ២០២៣ នៅយានដ្ឋានជួសជុលរថយន្តយីហោ ហ្គោលធិច ស្ថិតតាមបណ្តោយផ្លូវលេខ៦០៨ ក្នុងបឹងកក់ទី២ ខណ្ឌទួលគោក ។

តាមរបាយការណ៍សមត្ថកិច្ចបានឲ្យដឹងថា ម្ចាស់ទីតាំងឈ្មោះ គិត ចន្ថា ភេទប្រុស អាយុ៤១ឆ្នាំ ជនជាតិខ្មែរ មុខរបរជួសជុលរថយន្ត។ ទីតាំងដែលត្រូវបានអគ្គិភ័យឆាបឆេះនោះប្រភេទថ្មបេតុង ប្រក់ស័ង្កសី ទំហំទទឹង១៥ម៉ែត្រ បណ្តោយ៣០ម៉ែត្រ ។

ក្នុងហេតុការណ៍អគ្គិភ័យឆាបឆេះខាងលេីនេះ គឺបណ្តាលមកពីការឆ្លងចរន្តអគ្គីសនីបង្កជាអគ្គិភ័យ ក្នុងនោះបានបណ្តាលឲ្យឆាបឆេះខូចខាតរថយន្ត Toyota Pruise០១គ្រឿង ម៉ាក Ford Transit ១៩ ពណ៌ស ចំនួន ០១គ្រឿង, ម៉ូតូម៉ាក Honda Wave ចំនួន ០១គ្រឿង និងប្រេងម៉ាស៊ីន Castrol ចំនួន ៣០កេស និងពុំបណ្តាលឲ្យរាលដាលដល់ផ្ទះអ្នកជិតខាងឡេីយ ។

នៅវេលាម៉ោង៣និង៥០នាទីទៀបភ្លឺនាថ្ងៃខែឆ្នាំដដែល អគ្គិភ័យនេះត្រូវបានពន្លត់បានទាំងស្រុងដោយប្រើប្រាស់រថយន្តការិយាល័យអគ្គិភ័យ រាជធានីភ្នំពេញ ចំនួន១២គ្រឿង ប្រើប្រាស់ទឹកអស់១៥ឡាន ស្មើរនឹង៦០ម៉ែត្រគូប និងរថយន្តជំនួយមកពីក្រុមហ៊ុនស្រាបៀរកម្ពុជា ចំនួន ១គ្រឿងប្រើប្រាស់ទឹកអស់១ឡាន ស្មើរនឹង០៦ម៉ែត្រគូប៕

អត្ថបទ៖ សុខា