សមត្ថកិច្ចផ្ទុះអាវុធជាច្រើនគ្រាប់ក្នុងការបង្ក្រាប​ជនសង្ស័យ​ជាមុខសញ្ញាកាច់សោ-កម៉ូតូ

កម្លាំងសមត្ថកិច្ចផ្ទុះអាវុធជាច្រើនគ្រាប់ក្នុងប្រតិបត្តិការបង្ក្រាប​និង​ឃាត់ខ្លួនជនសង្ស័យចំនួន ៣ នាក់ ជាមុខសញ្ញាកាច់​សោករ​ម៉ូតូពលរដ្ឋយ៉ាងសកម្ម។

ហេតុការណ៍នេះបានបង្កឲ្យមានការភ្ញាក់ផ្អើលឡើងកាលពីម៉ោង ២ រំលងអធ្រាត្រឈានចូលថ្ងៃទី២៤ ខែកុម្ភៈ ឆ្នាំ២០២៤ ចំណុច​ក្បែរឃ្លាំងអេតចាយមួយកន្លែង ស្ថិតនៅលើកំណាត់ផ្លូវ ភ្នំពេញហាណូយ ក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញ។

ប្រភពព័ត៌មានពីសមត្ថកិច្ចមូលដ្ឋានឲ្យដឹងដែរថា មុនពេលឈានដល់ការឃាត់ខ្លួន សមត្ថកិច្ចកំពុងតែល្បាតក្នុងមូលដ្ឋាន ស្រាប់​តែប្រទះឃើញជនសង្ស័យទាំង ៣ នាក់ ជិះម៉ូតូឌុបគ្នា ម៉ាកស៊ុយស៊ូគីវីវ៉ាពណ៌ខ្មៅ ពាក់ស្លាកលេខ ភ្នំពេញ 1HL-7029 ធ្វើដំណើរតាមបណ្តោយផ្លូវហាណូយ ដោយមានការសង្ស័យ ទើបសមត្ថកិច្ចហៅសួរនាំស្រាប់តែជនសង្ស័យទាំង ៣ នាក់ ធ្វើសកម្មភាពជិះរត់គេចតែម្តង ព្រមទាំងបើកម៉ូតូកៀរម៉ូតូសមត្ថកិច្ចថែមទៀត រហូតដួលម៉ូតូខ្លួនឯង ត្រូវសមត្ថកិច្ច​ឃាត់ខ្លួនបាន ឆែកមើលក៏ឃើញមានវត្ថុតាងមួយចំនួន សង្ស័យជាឧបករណ៍សម្រាប់ធ្វើសកម្មភាពកាច់សោករម៉ូតូផងដែរ។

បន្ទាប់ពីកើតហេតុសមត្ថកិច្ចបាននាំខ្លួនជនសង្ស័យទាំង ៣ នាក់ រួមទាំងម៉ូតូ និងវត្ថុតាងមួយចំនួនទៅប៉ុស្តិ៍នគរបាលដើម្បី​សាកសួរ និងអនុវត្តតាមនីតិវិធីបន្ត៕

អត្ថបទ៖សុខា