សន្តិសុខសង្គម

តំណាងអយ្យការ សម្រេចចោទប្រកាន់ លោកចៅសង្កាត់ចោមចៅទី ២ និងស្ត្រីអ្នកលក់គ្រឿងញៀនម្នាក់ ២ បទល្មើស

បានផុស

១ សប្តាហ៍ មុន

នៅ

ថ្ងៃសៅរ៍ ៣០ វិច្ឆិកា ២០២៤

ដោយ

អ្នកនាំពាក្យ នៃអយ្យការអមសាលាដំបូងរាជធានីភ្នំពេញ កាលពីរសៀលថ្ងៃទី ២៩ ខែវិច្ឆិកា ឆ្នាំ ២០២៤ បានបញ្ជាក់ថា តំណាងអយ្យការ បានសម្រេចចោទប្រកាន់លើបុគ្គល ២ រូប ៖ ១-ឈ្មោះ វ៉ា សារ៉ង ភេទប្រុស ជាចៅសង្កាត់ចោមចៅទី ២ ពីបទ គំរាមកំហែងដោយមានបញ្ជាឲ្យបំពេញលក្ខខណ្ឌអ្វីមួយ និងបទមិនប្តឹងបរិហារពីបទឧក្រិដ្ឋ ឬបទមជ្ឈិមដោយអ្នករាជការសាធារណៈ តាមមាត្រា ២៣២ និងមាត្រា ៥២៨ នៃក្រមព្រហ្មទណ្ឌ និង ឈ្មោះ ស៊ុយ ជីវ៉ា ភេទស្រី ពីបទ ប៉ុនប៉ងជួញដូរដោយខុសច្បាប់នូវសារធាតុញៀន តាមមាត្រា ២៧ នៃក្រមព្រហ្មទណ្ឌ និងមាត្រា ៤០ នៃច្បាប់ស្ដីពីការត្រួតពិនិត្យគ្រឿងញៀន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមបញ្ជាក់ថា កម្លាំងសមត្ថកិច្ច នៃស្នងការដ្ឋាននគរបាលរាជធានីភ្នំពេញ បានចាប់ខ្លួនចៅសង្កាត់ចោមចៅទី ២ ខណ្ឌពោធិ៍សែនជ័យ និងស្ត្រីម្នាក់ជួញដូរគ្រឿងញៀន បន្ទាប់ពីបែកធ្លាយសារសំឡេងចៅសង្កាត់ចោមចៅទី ២ ទារលុយពីស្ត្រីជួញដូរគ្រឿងញៀនម្នាក់នោះ ហើយដែលសារសំឡេងសន្ទនាត្រូវបានបង្ហោះលើបណ្ដាញសង្គមធ្វើឲ្យមានការភ្ញាក់ផ្អើលយ៉ាងខ្លាំង។

លោក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ បានឲ្យដឹងកាលពីរសៀលថ្ងៃទី ២៨ វិច្ឆិកា ថា ជុំវិញការបែកធ្លាយសំឡេងចៅសង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញ ដែលទាមទារប្រាក់ចំនួន ១ លានរៀល ពីស្ត្រីម្នាក់ ដែលសង្ស័យជួញដូរគ្រឿងញៀន ហើយត្រូវបានបង្ហោះនៅលើបណ្ដាញសង្គម និងតាមបណ្ដាញសារព័ត៌មានមួយចំនួននោះ គឺចៅសង្កាត់រូបនេះត្រូវបានឃាត់ខ្លួនបញ្ជូនមកស្នងការដ្ឋាននគរបាលរាជធានីភ្នំពេញ និងស្ត្រីថតសំឡេងចៅសង្កាត់ ហើយមានការបង្ហោះបែកធ្លាយសំឡេងពាក់ព័ន្ធនឹងការទាមទារប្រាក់របស់ចៅសង្កាត់ចោមចៅទី ២ ក៏ត្រូវបានឃាត់ខ្លួនដែរ យកមកសាកសួរនៅស្នងការដ្ឋាននគរបាលរាជធានីភ្នំពេញ កាលពីថ្ងៃទី ២៧ ខែវិច្ឆិកា ឆ្នាំ ២០២៤។

អ្នកនាំពាក្យស្នងការដ្ឋាននគរបាលរាជធានីភ្នំពេញ បានបញ្ជាក់ថា កិច្ចការងារនេះ អនុវត្តតាមបទបញ្ជារបស់ លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងបទបញ្ជារបស់ លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងត្រូវកសាងសំណុំរឿងបញ្ជូនទៅកាន់អយ្យការ នៃសាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់។ ចំពោះចៅសង្កាត់ចោមចៅទី ២ ក៏បានទទួលសារភាពថា សំឡេងនោះពិតជាសំឡេងរបស់ខ្លួនពិតប្រាកដមែន ដែលមានការទំនាក់ទំនងតាមទូរស័ព្ទជាមួយស្ត្រីម្នាក់សង្ស័យជួញដូរគ្រឿងញៀន។

បច្ចុប្បន្ន ជនត្រូវចោទប្រុស-ស្រី ២ នាក់ នេះ កំពុងស្ថិតក្នុងដំណាក់កាលចៅក្រមស៊ើបសួរបន្តនីតិវិធី៕

អត្ថបទ ៖ សុខា