សន្តិសុខសង្គម

ឃាត់ខ្លួនបុរសម្នាក់យកទៅសួរនាំ ក្រោយដឹកនារីម្នាក់ចេញពីផ្ទះទៅចូលរួមខួបកំណើតមិត្តភ័ក្ដិ ដោយមិនប្រាប់សាច់ញាតិ

បានផុស

៣ ខែ មុន

នៅ

ថ្ងៃពុធ ៨ មករា ២០២៥

ដោយ

បុរសម្នាក់ត្រូវបានក្រុមគ្រួសារសាច់ញាតិរបស់នារីជាមិត្តភ័ក្ដិប្ដឹងកម្លាំងសមត្ថកិច្ចឲ្យឃាត់ខ្លួនយកទៅសួរនាំ បន្ទាប់ពីជិះម៉ូតូទៅដឹកចេញពីផ្ទះទៅចូលរួមពិធីខួបកំណើតមិត្តភ័ក្ដិដោយមិនប្រាប់ឲ្យអ្នកផ្ទះដឹង។ ករណីនេះបានកើតឡើងកាលពីវេលាម៉ោង១រំលង អធ្រាត្រឈានចូលថ្ងៃទី៨ ខែមករា ឆ្នាំ២០២៥ នៅផ្ទះជួលមួយកន្លែង ភូមិតាងួន១ សង្កាត់កាកាបទី១ ខណ្ឌពោធិសែនជ័យ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការបញ្ជាក់ពីក្រុមគ្រួសារនារីខាងលើបានអោយដឹងថា នៅមុនពេលកេីតហេតុវេលាម៉ោង៩និង០០យប់ថ្ងៃទី៧ខែមករា ឆ្នាំ២០២៥ ដោយឃើញបុរសម្នាក់ជិះម៉ូតូមួយគ្រឿងមិនចាំម៉ាកមកឌុបប្អូនស្រីរបស់ខ្លួនចេញពីផ្ទះទៅបាត់អស់ជាច្រើនម៉ោងមិនឃើញត្រឡប់មកវិញ។ ដោយមានការសង្ស័យខ្លាចចាញ់បោកការលួងលោមខាងប្រុសយកទៅធ្វើបាប ក៏ទៅប្ដឹងសមត្ថកិច្ចមូលដ្ឋានអោយជួយអន្តរាគមន៍ស្វែង។ ប្រភពដដែលបានឲ្យដឹងទៀតថា បន្ទាប់ពីទំនាក់ទំនងតាមទូរស័ព្ទ និងឆែកតាម Location ក៏ឃើញបាត់នៅចំណុចផ្ទះជួលមួយកន្លែងស្ថិតនៅភូមិតាងួន១ សង្កាត់កាកាបទី១ ខណ្ឌពោធិសែនជ័យ។

ប្រភពបន្តថា បន្ទាប់ពីឆែកឃើញទីតាំងរួចក៏ស្នើសុំអោយម្ចាស់ផ្ទះជួលចូលរួមសហការ ហើយក៏ឃើញប្អូនស្រីរបស់ខ្លួនកំពុងតែនៅក្នុងបន្ទប់ជួបជុំគ្នាជាមួយមិត្តភ័ក្ដិ មានប្រុសស្រី។

តាមការឆ្លើយបំភ្លឺពីនារីរូបនោះបានឆ្លើយបញ្ជាក់ថា មូលហេតុដែលខ្លួនចាកចេញពីផ្ទះមិនបានប្រាប់ឲ្យបងប្អូនដឹង ដោយសារមិត្តភ័ក្ដិស្រីដែលស្គាល់គ្នាគេហៅមកចូលរួមខួបកំណើត ហើយគំរាមថា បេីមិនបានមកចូលរួមកម្មវិធីនេះទេនឹងមានរឿងថ្ងៃក្រោយជាក់ជាមិនខាន ព្រោះដូច្នេះហើយទើបនាងចាកចេញដោយមិនបានប្រាប់។ តាមការបញ្ជាក់ពីបុរសអ្នកទៅដឹក ក៏ដូចជានារីរូបនោះបានឆ្លើយបដិសេធថា ពួកគេមិនបានធ្វើអ្វីខុសពីសីលធម៌នោះឡើយ ហើយក៏មិនមែនជាសង្សារនឹងគ្នាដែរ គឺជាមិត្តភ័ក្ដិរាប់អានគ្នាប៉ុណ្ណោះ។