នាយកដ្ឋានបង្ការ និងពន្លត់អគ្គិភ័យ ស្នើឲ្យពល​រដ្ឋហៅទៅលេខ Hotline 118 ពេលកើតមានគ្រោះអគ្គិភ័យដើម្បីទប់ស្កាត់ទាន់ពេលវេលា

ដើម្បីអន្តរាគមន៍ទប់ស្កាត់ករណីគ្រោះអគ្គិភ័យដែលកើតមានឡើងនៅតាមមូលដ្ឋានឲ្យបានទាន់ពេលវេលា ប្រធាននាយកដ្ឋានបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ លោកឧត្ដមសេនីយ៍ឯក នេត វន្ថា បានស្នើឲ្យប្រជាពលរដ្ឋទំនាក់ទំនងទៅ Hotline 118 ដែលជាលេខ Hotline របស់អគ្គស្នងការដ្ឋាននគរបាលជាតិ ប្រចាំការ២៤ម៉ោង លើ២៤ម៉ោង។

លោកឧត្ដមសេនីយ៍ឯក នេត វន្ថា បញ្ជាក់ថា ក្រៅពីលេខ Hotline 118 នៅតាមបណ្ដាស្នងការដ្ឋាននគរបាលរាជធានី ខេត្ត និងការិយាល័យបង្ការពន្លត់អគ្គិភ័យ អង្គភាពនីមួយៗ ក៏មានលេខទំនាក់ផ្ទាល់ដែលកម្លាំងជំនាញតែងផ្សព្វផ្សាយតាមវេទិការសាធារណៈ តែទោះយ៉ាងណា លោកលើកទឹកចិត្តឲ្យពលរដ្ឋប្រើសេវា Hotline 118 ព្រោះងាយស្រួល លឿនរហ័ស និងមិនត្រូវបានកាត់ថ្លៃសេវានោះទេ។

ប្រធាននាយកដ្ឋានបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ បន្ថែមថា នៅរដូវប្រាំងខាងមុខនេះ ក្នុងនាមកម្លាំងជំនាញបានត្រៀមមធ្យោបាយសរុប និងកម្លាំងសរុបប្រចាំការ២៤ម៉ោង លើ២៤ម៉ោង នៅតាមអង្គភាព ដើម្បីរង់ចាំទទួលបទបញ្ជាពីថ្នាក់ដឹកនាំ ក៏ដូចជាការឆ្លើយតបពីប្រជាពលរដ្ឋ ឬម្ចាស់គោលដៅដែលកើតមានករណីគ្រោះអគ្គិភ័យកើតឡើង តែមិនអាចគ្រប់គ្រងបាន។ ការទំនាក់ទំនងតាមលេខHotline 118 ប្រជាពលរដ្ឋអាចទទួលបានអន្តរាគមន៍ទាន់ពេលវេលា តម្លាភាព និងយុត្តិធម៌។

លោក នេត វន្ថា លើកទឹកចិត្តឲ្យប្រជាពលើរដ្ឋត្រូវយកសេវាសាធារណៈនេះមកប្រើនៅពេលកើតមានគ្រោះអគ្គិភ័យ ដើម្បីមន្ត្រីជំនាញចុះអន្តរាគមន៍ទាន់ពេលវេលា ចៀសវាងការទំនាក់ទំនងទៅបណ្ដាស្ថានីយវិទ្យុផ្សេងៗ​ដែលធ្វើឲ្យខាតពេល ហើយភ្លើងឆេះលឿនធ្វើឲ្យការអន្តរាគមន៍មិនសូវបានជោគជ័៧៕

អត្ថបទ៖ សុខុម