បុរស​ម្នាក់​យក​កាំភ្លើង AK បាញ់​សម្លាប់​ឪក្មេក និងម៉ែក្មេក រួចបាញ់សម្លាប់ខ្លួនឯង

​ត្បូងឃ្មុំ ៖ បុរស​ម្នាក់​ បាន​បាញ់​សម្លាប់​ឪពុកក្មេក និងម្ដាយក្មេក បណ្ដាលឱ្យស្លាប់នៅនឹងកន្លែង ហើយ​បន្ត​បាញ់​ប្រពន្ធ និង​បងថ្លៃឱ្យរងរបួសធ្ងន់​ បន្ទាប់មក​ទើប​បាញ់សម្លាប់ខ្លួនឯងតាមក្រោយ។

ហេតុការណ៍នេះ​បានកើតឡើង នាយប់​ថ្ងៃទី០៧ ខែកុម្ភៈ ឆ្នាំ២០២៥នេះ នៅចំណុច​ភូមិអំពុក ឃុំក្រែក ស្រុកពញាក្រែក ខេត្តត្បូងឃ្មុំ។

ប្រភព​ព័ត៌មាន​បាន​ឱ្យ​ដឹង​ថា ជនសង្ស័យដែលធ្វើសកម្មភាពនេះ ឈ្មោះ ហ៊ីង សុវណ្ណរិទ្ធ មុខរបរជាមន្ត្រីអាវុធហត្ថ បានបាញ់សម្លាប់ឪពុកក្មេង និងម្ដាយក្មេក បណ្ដាលឱ្យស្លាប់នៅនឹងកន្លែង ហើយបានបន្តបាញ់ប្រពន្ធ និងបងថ្លៃ ព្រមទាំងប្រជាការពារម្នាក់ទៀតឱ្យរងរបួសធ្ងន់ ទើបសម្រេច បាញ់សម្លាប់ខ្លួនឯងតាមក្រោយ។

សូមបញ្ជាក់ថា ហេតុការណ៍បាញ់ប្រហារទាំងគ្រួសារខាងលើនេះ បានបណ្ដាលឱ្យមានមនុស្សស្លាប់៣នាក់ និងរងរបួសធ្ងន់៣នាក់។ មកទល់ម៉ោងនេះ សមត្ថកិច្ចមិនទាន់បញ្ជាក់ឱ្យបានដឹងពីមូលហេតុនៅឡើយទេ ព្រោះកំពុងដុតដៃដុតជើង​ធ្វើ​ការ​សាកសួរអ្នកពាក់ព័ន្ធ និងស្រាវជ្រាវនៅទីតាំងកើតហេតុ ក្នុងផ្ទះរបស់ជនរងគ្រោះ៕