សន្តិសុខសង្គម

មានករណីស្ទាក់ប្លន់ម៉ូតូពីស្ត្រីម្នាក់បានសម្រេច នៅជាយក្រុងដូនកែវ

បានផុស

១ សប្តាហ៍ មុន

នៅ

ថ្ងៃពុធ ៩ កក្កដា ២០២៥

ដោយ

ប្រជាពលរដ្ឋរស់នៅតាមបណ្ដោយផ្លូវខេត្តលេខ ១២៤ មានការព្រួយបារម្ភជាខ្លាំង ស្របពេលករណីស្ទាក់ប្លន់ម៉ូតូបានសម្រេចពីអ្នកដំណើរកើតឡើងផ្ទួនៗ ពីរដង រួចមកហើយ រយៈពេល ២ ខែនេះ ក្នុងក្រុងដូនកែវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកាលពីព្រឹកថ្ងៃទី ៨ ខែកក្កដា ឆ្នាំ ២០២៥ ម្សិលមិញនេះ មានករណីស្ទាក់ប្លន់ម៉ូតូពីស្ត្រីម្នាក់ ជាថ្មីទៀត បានសម្រេចដោយសុវត្ថិភាព ស្ថិតនៅផ្លូវខេត្តលេខ ១២៤ សង្កាត់រកាក្នុង ក្រុងដូនកែវ ខេត្តតាកែវ។

តាមប្រភពពីប្រជាពលរដ្ឋដែលរស់នៅតាមបណ្ដោយផ្លូវខាងលើនេះ បញ្ជាក់ថា ករណីស្ទាក់ប្លន់ម៉ូតូពីអ្នកដំណើរនេះ កាលពីពាក់កណ្តាលខែមិថុនា កន្លងទៅ កើតឡើងមួយករណីដែរ ហើយនេះជាលើកទី ២ ហើយ គឺ ២ ខែមកនេះ កើតមានករណីស្ទាក់ប្លន់បានសម្រេចជាបន្តបន្ទាប់លើដងផ្លូវនេះ មិនទាន់ឃើញសមត្ថកិច្ចបង្ក្រាបបាននៅឡើយទេ។ អ្វីដែលពលរដ្ឋមិនអស់ចិត្តនោះ គឺនៅដើម នៃដងផ្លូវនេះ ខាងកើតរង្វង់មូលអូរចំបក់ ជាគោលដៅត្រួតពិនិត្យរបស់សមត្ថកិច្ចនគរបាលចរាចរណ៍ទាំងយប់ទាំងថ្ងៃទៀតផង ហេតុអ្វីក៏ករណីស្ទាក់ប្លន់ហាក់គ្មានក្រែងសមត្ថកិច្ចនគរបាលអីបន្តិចសោះ?។

ប្រជាពលរដ្ឋ បានសំណូមពរទៅលោកឧត្ដមសេនីយ៍ទោ ម៉ែន លី ស្នងការនគរបាលខេត្តតាកែវ សូមមេត្តាមានវិធានការណ៍ និងទប់ស្កាត់ករណីស្ទាក់ប្លន់អ្នកដំណើរកើតឡើងដដែលៗ ក្នុងក្រុងដូនកែវ នេះផង ដើម្បីជាក្តីកក់ក្ដៅពលរដ្ឋក្នុងមូលដ្ឋាន កុំរវល់តែមានវិធានការណ៍ក្តៅលើរថយន្តដឹកទំនិញសំពីងសំពោង ភ្លេចមើលក្រុមក្មេងស្ទាវ និងក្រុមឆក់ឱកាសស្ទាក់ប្លន់អ្នកដំណើរតាមដងផ្លូវ៕

អត្ថបទ ៖ វីរៈ