មិនធម្មតា! រដូវកាលនេះ វឿន វាសនា លេង ៧ ប្រកួត ជាប់ជាកីឡាករល្អប្រចាំការប្រកួត ៤ លើក

កីឡាករបាល់ទះជម្រើសជាតិ កម្ពុជា វឿន វាសនា ត្រូវបានជ្រើសរើសជាកីឡាករល្អបំផុតប្រចាំការប្រកួត ២ ប្រកួតជាប់គ្នា សម្រាប់ការប្រកួត ២ លើកចុងក្រោយជាមួយក្រុម Win Streak ក្នុងលីគបាល់ទះអាជីព​តៃវ៉ាន់​រដូវ​កាល​នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃ សៅរិ៍ ទី ២៥ ខែ តុលា ឆ្នាំ ២០២៥ ក្រុមបាល់ទះ Win Streak បានយកឈ្នះលើក្រុម TSG Sky Hawks ក្នុងលទ្ធផល ៣ សិតទល់ ២ និង​នៅ​ថ្ងៃ អាទិត្យ ទី ២៦ ខែ តុលា បានបន្តយកឈ្នះលើក្រុម East Power ដែលជាការប្រកួតទី ៧ ក្នុងលទ្ធផល ៣ សិតទល់ ២។

ជ័យជម្នះ ៧ ប្រកួតជាប់ៗគ្នានៅរដូវកាលនេះ ជាពិសេសការប្រកួត ២ ប្រកួតចុងក្រោយ គឺសុទ្ធតែមានការចូលរួមសាងគុណសម្បត្តិយ៉ាងធំធេងដោយកីឡាករម្ចាស់អាវលេខ ៩ វឿន វាសនា។ រឿងដ៏អស្ចារ្យបំផុត គឺ ២ ប្រកួតចុងក្រោយនេះ រូបគេត្រូវបានជ្រើសរើសជាកីឡាករល្អបំផុតប្រចាំការប្រកួត​ទាំង​ ២ លើកជាប់គ្នា។ ការប្រកួតទល់នឹងក្រុម TSG Sky Hawks កីឡាកររកបាន ២៤ ពិន្ទុ និងការប្រកួតទល់ក្រុម East Power រកបាន ២៥ ពិន្ទុ។

នេះជាលើកទី ៤ ហើយសម្រាប់ វឿន វាសនា ដែលជាប់ជាកីឡាករល្អបំផុតប្រចាំការប្រកួតនៅរដូវកាលនេះជាមួយក្រុមបាល់ទះ Win Streak បន្ទាប់ពីឆ្លងកាត់ការប្រកួតចំនួន ៧ ប្រកួត។ តាមរយៈស្ថិតិទាំងនេះ បានធ្វើឱ្យកីឡាករ កម្ពុជា វ័យ ២៤ ឆ្នាំ កម្ពស់ ១.៩៦ ម៉ែត្រ កំពុងក្លាយជាកីឡាករដ៏លេចធ្លោបំផុតម្នាក់របស់ Win Streak និងនៅលីគបាល់ទះ តៃវ៉ាន់ ទាំងមូល។

គួរឱ្យដឹងថា វឿន វាសនា ​គ្រោង​នឹង​ធ្វើដំណើមកកាន់ប្រទេសកំណើត​ នៅខែ វិច្ឆិកា ឆាប់ៗនេះ ដើម្បីមកចូលរួមក្នុងជំរុំហ្វឹកហាត់របស់ក្រុមបាល់ទះជម្រើសជាតិ កម្ពុជា ត្រៀមការប្រកួតព្រឹត្តិការណ៍កីឡាស៊ីហ្គេមនៅប្រទេស ថៃ នាខែ ធ្នូ ឆ្នាំ ២០២៥។

លោក អាំង សិរីពិសិដ្ឋ អគ្គលេខាធិការ និង​ជា​អនុប្រធាន​សហព័ន្ធ​កីឡា​បាល់ទះ កម្ពុជា បានបញ្ជាក់ ថា ការមកចូលរួមជាមួយក្រុម កម្ពុជា គឺ វាសនា សុខចិត្តលះបង់ប្រាក់ខែរបស់ខ្លួនខ្ទង់ ៣ ម៉ឺនដុល្លារអាមេរិកក្នុងមួយខែជាមួយ Win Streak៕

អត្ថបទ៖ សេម កុសល