Real Madrid អាចបាត់កម្លាំងសំខាន់ដល់ទៅ ២ នាក់ ពេលជួប Man City ក្នុងពាន UCL

ក្រុមអធិរាជស Real Madrid អាចជួបបញ្ហា នៅពេលជួបក្រុមមេឃខៀវ Manchester City ក្នុងវគ្គ ១៦ ក្រុមចុងក្រោយពានរង្វាន់ UEFA Champions League នាខែ មីនា ឆ្នាំ ២០២៦ នេះ។

ថ្មីៗនេះក្លិបអធិរាជស Real Madrid បញ្ជាក់ជាផ្លូវការ ថា Mbappe បានរងរបួសជង្គង់ខាងឆ្វេង។ ស្ថានភាពនេះបានធ្វើឱ្យ Mbappe អវត្តមាន ២ ប្រកួតហើយ គឺការប្រកួតជម្រុះ playoff ពាន UCL ជើងទី ២ ទល់ Benfica និងការប្រកួតក្របខណ្ឌ La Liga ទល់នឹង Getafe នាយប់រំលងអាធ្រាត្រឈានចូលថ្ងៃ អង្គារិ៍ ទី ៣ ខែ មីនា នេះ។

ទោះបីជាយ៉ាងណា Real Madrid មិនទាន់បានបញ្ជាក់នៅឡើយទេ ថា Mbappe នឹងត្រូវអវត្តមានរយៈពេលប៉ុន្មានសប្តាហ៍ ប៉ុន្តែបើតាមគ្រូបង្វឹកលោក Álvaro Arbeloa បានបញ្ជាក់ គឺ Mbappe កំពុងស្ថិតក្នុងភាពសង្ស័យសម្រាប់ការប្រកួតទល់នឹង Man City ដោយស្ថានភាពរបួសរបស់គេមិនមែនស្ថិតក្នុងរយៈពេលខ្លីទេ ប៉ុន្តែស្ថិតក្នុងរយៈពេលវែង។

ដោយឡែក Jude Bellingham វិញ បានអវត្តមានប៉ុន្មានប្រកួតមកហើយ ដោយសារមានបញ្ហារបួសសាច់ដុំភ្លៅ។ យោងតាមសារព័ត៌មាន El Laguero បានឱ្យដឹង ថា ខ្សែបម្រើសញ្ជាតិ អង់គ្លេស នឹងអវត្តមានការប្រកួតវគ្គ ១៦ ក្រុមចុងក្រោយទាំង ២ ជើងតែម្តងទល់ Man City។ Bellingham អាចនឹងត្រឡប់មកកាន់ទីលានវិញបាន នាចុងខែ មីនា ឬ ដើមខែ មេសា ខាងមុខ។

គួរបញ្ជាក់ ថា ការប្រកួតជើងទី ១ វគ្គ ១៦ ក្រុមចុងក្រោយពាន UCL រវាង Real Madrid និង Man City នឹងធ្វើឡើងជើងទី ១ នៅកីឡដ្ឋាន Santiago Bernabeu នៅថ្ងៃទី ១២ ខែ មីនា ឆ្នាំ ២០២៦។ ចំណែកការប្រកួតជើងទី ២ នឹងធ្វើឡើងនៅកីឡដ្ឋាន Eitihad ក្នុងប្រទេស អង់គ្លេស នាថ្ងៃទី ១៨ ខែ មីនា ឆ្នាំ ២០២៦៕

អត្ថបទ៖ សេម កុសល