លន បញ្ញា ត្រូវជួបលំដាប់ A ជា​ជើងឯកបារាំង នៅទឹកដី បារាំង ចុងខែនេះ

កីឡាករកម្រិត A របស់ កម្ពុជា រហស្សនាមនាគចម្បាំង លន បញ្ញា នឹងត្រូវចេញទៅប្រកួតនៅប្រទេស​បារាំង ក្នុងកម្មវិធី Rahu Fight IV នាចុងខែ កុម្ភៈ ឆ្នាំ ២០២៦ ដោយត្រូវជួបកីឡាករម្ចាស់ផ្ទះបារាំង Mohamed Cheikh ដែលជាលំដាប់ A ក្នុងទម្ងន់ ៦៧ គីឡូក្រាម។

លន បញ្ញា នឹងត្រូវធ្វើការងារធ្ងន់ សម្រាប់ភារកិច្ចទៅប្រកួតនៅកម្មវិធីនេះ ដោយសារដៃគូរបស់គេកីឡាករ​ Mohamed Cheikh ជាកីឡាករមួយរូបចូលចិត្តលេងក្បាច់ និងធន់មិនចាញ់កូនសិស្សលោកគ្រូ ធន់ សុភា រូបនេះប៉ុន្មានឡើយ។

កីឡាករ Mohamed Cheikh ជាកីឡាករមួយរូប ដែលហាត់ប្រដាល់សេរីតាំងពីយូរមកហើយ ហើយកីឡាករអាចវាយបានចន្លោះពីទម្ងន់ ៦៧ ទៅ ៧០ គីឡូក្រាម។ សមិទ្ធផលដ៏ធំបំផុតរបស់គេ គឺបានឈ្នះជើងឯក ក្នុងកម្មវិធីប្រកួតប្រដាល់សេរីជើងឯកថ្នាក់ជាតិ បារាំង កាលពីឆ្នាំ ២០២៥ ដែលបានធ្វើឱ្យគេចាត់ថ្នាក់កីឡាកររូបនេះ ជាកីឡាករលំដាប់ A ក្នុងគីឡូ ៦៧ ប្រចាំប្រទេស បារាំង។

កីឡាករ Mohamed Cheikh ចូលចិត្តប្រកួតក្បាច់ មានចង្វាក់មួយៗ និងពូកែលេងជង្គង់។ បើនិយាយអំពីប្រវត្តិប្រកួតវិញ គឺមិនមានទិន្ន័យណាមួយបញ្ជាក់ច្បាស់លាស់នោះទេ ប៉ុន្តែបើតាមកំណត់ត្រា ដែល WKN ធ្លាប់បង្ហោះកាលពីខែ វិច្ឆិកា ឆ្នាំ ២០២៥ គឺរូបគេប្រកួតអាជីព ៥ លើកចុងក្រោយ ឈ្នះ ៤ និងចាញ់ ១។

ការប្រកួតរវាង លន បញ្ញា និង Mohamed Cheikh នាចុងខែ កុម្ភៈ នេះ នឹងក្លាយជាកីឡាករប្រកួត ដែលអ្នកគាំទ្រទន្ទឹងរង់ចាំ ព្រោះកីឡាករម្ចាស់ផ្ទះ បារាំង ជាលំដាប់ A ក្នុងគីឡូ ៦៧។ ចំណែក បញ្ញា វិញ ជាកីឡាករកំពូលម្នាក់របស់ កម្ពុជា ក្នុងគីឡូ ៦៧ នេះផងដែរ ខណៈមួយរយៈចុងក្រោយនេះ រូបគេមិនទាន់បរាជ័យនោះទេ ហើយថែមទាំងដណ្តើមបានខ្សែក្រវាត់ជាច្រើនដូចជា WKN គុនខ្មែរពិភពលោក និង ISKA គុនខ្មែរពិភពលោក។

គួរឱ្យដឹង ថា ក្រៅពីលន បញ្ញា នៅមានកីឡាករគុនខ្មែរឆ្នើមៗ ៤ រូបទៀតចេញទៅប្រកួតនៅកម្មវិធីនោះដែរដូចជា ពេជ្រ សម្បត្តិ បឺត សង្ឃឹម ពេជ្រ អទិទេព និង គ្រូក្មេង ស៊ាងហៃ ។ ក្នុងនោះ បឺត សង្ឃឹម ត្រូវជួបជាមួយកីឡាករ Martin Steven។ ពេជ្រ អទិទេព ត្រូវជួបជាមួយក្រុម Mbye Samb។ គ្រូក្មេង ស៊ាង ហៃ ត្រូវជួបជាមួយកីឡាករ Niad Nassidou និងមួយគូទៀត ពេជ្រ សម្បត្តិ ត្រូវជួបជាមួយកីឡាករម្ចាស់ផ្ទះ Maxime Combes៕

អត្ថបទ​៖ សេម កុសល