ក្រោយលើកពានលីគ សឿយ វិសាល ថា ខ្លួននៅតែដក់ជាប់​ចិត្តនឹងពាន ACL3

ប្រធានក្រុម សឿយ វិសាល របស់ក្រុម ព្រះខ័នរាជស្វាយរៀង បានបង្ហាញអារម្មណ៍មោទកភាព ដែលបានជួយក្រុមបំបែកកំណត់ត្រាជាក្រុមដំបូងគេ ឈ្នះពានលីគកំពូល កម្ពុជា ៣ រដូវកាលជាប់គ្នា ប៉ុន្តែទន្ទឹមនឹងនេះ កីឡាករក៏សោកស្តាយខ្លាំងផងដែរ ដែលមិនអាចលើកពានកម្រិតទ្វី​​ប អាស៊ី AFC Challenge League បាន។

ខ្សែការពារចាស់វស្សាវ័យ ៣០ ឆ្នាំ បានដើរ​តួយ៉ាងសំខាន់ក្នុងការជួយក្រុមក្នុងរយៈពេលកន្លងមក ជាពិសេស ៣ រដូវកាលចុងក្រោយនេះ ដែលបានឈ្នះពានលីគកំពូល កម្ពុជា ៣ រដូវកាលជាប់គ្នា និងឡើងដល់វគ្គផ្តាច់ព្រ័ត្រពាន AFC Challenge League ២ រដូវកាលជាប់គ្នា។

ជុំវិញការឈ្នះពានលីគនៅរដូវកាលនេះ វិសាល បានបង្ហាញ​បានសារព័ត៌មាន «កម្ពុជាថ្មី» ថា៖ «ខ្ញុំមានអារម្មណ៍សប្បាយចិត្ត និងមោទកភាព ដែលក្រុមយើងបានឈ្នះពានលីគកំពូល កម្ពុជា ៣ រដូវកាលជាប់គ្នា។ កំណត់ត្រា​នេះ​មិនងាយមានក្រុម​ណានៅ កម្ពុជា អាចធ្វើបាន​ទេ។ ឆ្នាំនេះ ពួកយើងអាចធ្វើបាន ៣ ឆ្នាំជាប់គ្នា ដូច្នេះ ខ្ញុំគឺមានមោទកភាពចំពោះក្រុមយើងទាំងមូល»។

ទោះបីជាយ៉ាងណា វិសាល នៅតែសោកស្តាយខ្លាំង ដែលមិនអាចសម្រេចផែនការលើកពាន AFC Challenge League បាន បន្ទាប់ពីចាញ់ក្រុម Kuwait SC នៅប្រទេស គុយវ៉ែត ក្នុងលទ្ធផល ៣-៤។ កីឡាករបានថ្លែង ថា៖ «រដូវកាលនេះ ពួកយើងមានចំណុចល្អច្រើន ហើយក៏មានចំណុចខ្វះខាតច្រើនដែរ។ ដូចទាំងអស់គ្នាដឹងហើយ គឺពួកយើងទើបខកចិត្តរឿង AFC Challenge League។ យើងពិតជាសោកស្តាយខ្លាំង។ ខ្ញុំនៅតែដិតអារម្មណ៍ជាមួយរឿងនេះជាប់ជានិច្ច»៕

គួរឱ្យដឹងថា សឿយ វិសាល បានរួមរស់ជាមួយក្រុម ព្រះខ័នរាជស្វាយរៀង អស់រយៈពេល ១២ ឆ្នាំហើយ ក្នុងនោះបានឈ្នះពានសម្តេចតេជោ ៣ លើក និងពានលីគកំពូល កម្ពុជា ៤ លើក ព្រម​ទាំង​ជើង​ឯក​រង AFC Challenge League ពីរ​លើក៕

អត្ថបទ៖ សេម កុសល