គ្រាន់តែសំបុត្រចូលមើល Ronaldo លេងប្រកួតដំបូងឲ្យ Man Utd អាចទិញឡានល្មមៗមួយគ្រឿងបានជិះ

អ្នកគាំទ្របាល់ទាត់ បានចាប់ផ្តើមស្វះស្វែងរកទិញសំបុត្រដើម្បីចូលមើលការប្រកួតដំបូងរបស់កីឡាករ Cristiano Ronaldo នៅក្លិប Manchester United នៅចុងសប្តាហ៍ក្រោយ។

តារាឆ្នើមសញ្ជាតិព័រទុយហ្គាល់រូបនេះ បានវិលមកកាន់ទឹកដី Old Trafford សាជាថ្មីហើយនឹងបង្ហាញខ្លួននៅថ្ងៃសៅរ៍ទី១១ខែកញ្ញានៅពេលបិសាចក្រហម ទទួលភ្ញៀវសារិកាព្រៃ Newcastle របស់លោក Steve Bruce។

ការវិលត្រឡប់របស់ Ronaldo បានធ្វើឲ្យតម្រូវការទិញសំបុត្រចូលទស្សនាហក់ឡើងយ៉ាងខ្លាំង ខណៈគេហទំព័រលក់ក្រៅផ្លូវការឥឡូវនេះ បានដំឡើងថ្លៃ ៧០០ ផោន (៩៧០ដុល្លារ)។

យោងតាមរបាយការណ៍មួយនៅក្នុងកាសែត The Times បានបង្ហាញថា តម្លៃសំបុត្រនៅលើកម្មវិធីលក់ Stubhub បានឈានដល់ ២,៥០០ ផោន (៣,៥០០ដុល្លារ) ក្នុងមួយសន្លឹក។

ទោះបីជាយ៉ាងណាក៏ដោយ ក្លិបបិសាចក្រហមបានទទូចដល់អ្នកគាំទ្រ កុំឲ្យទិញសំបុត្រពីគេហទំព័រទាំងនេះដើម្បីចៀសវាងលទ្ធភាពទុកចោល ឬប្រឈមមុខនឹងផលវិបាកក្នុងការទទួលសំបុត្ររបស់ពួកគេ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ២គ្រាប់យប់មិញ ធ្វើឲ្យ Ronaldo បំបែកកំណត់ត្រាពិភពលោក