កីឡា

អបអរសាទរ វិសាខា គ្រងជើងឯក Hun Sen Cup ២០២១

បានផុស

៥ years មុន

នៅ

ថ្ងៃព្រហស្បតិ៍ ២៥ វិច្ឆិកា ២០២១

ដោយ

ក្រុមវិសាខាបានគ្រងជើងឯកពានរង្វាន់សម្តេចតេជោ ហ៊ុន សែន (Hun Sen Cup) ឆ្នាំ២០២១ បន្ទាប់ពីបានយកឈ្នះព្រះខន្ធរាជស្វាយរៀងដោយទាត់បាល់ប៉េណាល់ទីកាត់សេចក្តីក្នុងលទ្ធផល ៥-៤ បន្ទាប់ពីស្មើគ្នា២-២នៅវគ្គផ្តាច់ព្រ័ត្រនៅកីឡដ្ឋានស្មាត អ.អេស.អិន។

ការប្រកួតយ៉ាងស្វិតស្វាញនៅវគ្គទី១ពុំមានគ្រាប់បាល់ទម្លាយសំណាញ់ទីគ្នាបានទេ បើទោះជាមានឱកាសសម្រុកគ្នាទៅវិញទៅមក។ ចូលវគ្គទី២ទើបគ្រាប់បាល់កើតមានឡើងនៅពេល ប្រាក់ មុន្នីឧត្តម ស៊ុតរំលងដៃអ្នកចាំទី កែវ សុខសិលា នៅនាទី៥៣ដើម្បីនាំមុខ ១-០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីព្រះខន្ធរាជស្វាយរៀងនាំមុខ ក្រុមវិសាខាបានព្យាយាមសម្រុកខ្លាំង តែក៏មានការទប់ស្កាត់យ៉ាងល្អពីព្រះខន្ធរាជស្វាយរៀង ហើយមានការប៉ះទង្គិចគ្នារហូតមានការតវ៉ាគ្នា។ បន្ទាប់មកព្រះខន្ធរាជស្វាយរៀងនៅតែមានឱកាសវាយសម្រុកខ្លាំង។

យ៉ាងណាដល់នាទី៧១ វុធ តុលា បានតែតបញ្ចូលទីឲ្យវិសាខាតាមស្មើ ១-១ បន្ទាប់ពី ទៀត គឹមហេង លើកបាល់ពីជ្រុងដើម្បីបន្តសង្ឃឹមឡើងវិញ។ នៅចុងវគ្គទី២ ខ្សែការពាររបស់ព្រះខន្ធរាជស្វាយមានបញ្ហាច្រើន ប៉ុន្តែខ្សែប្រយុទ្ធ វិសាខាធ្វើមិនបានសម្រេច។

គ្រាប់បាល់១-១ស្មើបន្តរហូតចប់៩០នាទីដែលតម្រូវឲ្យបន្ថែមម៉ោង១៥នាទីពីរដង។ សម្រាប់១៥នាទីដំបូងមានគ្រាប់បាល់កើតឡើង២គ្រាប់គឺ ជូ ស៊ីនទិ រកគ្រាប់បាល់ឲ្យព្រះខន្ធរាជស្វាយរៀងនាំមុខ ២-១ នៅនាទីទី១០០ ប៉ុន្តែ៥នាទីក្រោយមក អ៊ុក សុវណ្ណ ស៊ុតហ្វ្រីឃីកបានសម្រេចតាមស្មើ ២-២ នៅនាទីទី ១០៥+១។ ចំពោះ១៥នាទីលើកទី២គ្មានគ្រាប់បាល់កើតឡើងទេ ដូច្នេះត្រូវទាត់ប៉េណាល់ទីកាត់សេចក្តី។ នេះជាការការពារជើងឯកឆ្នាំចាស់របស់ខ្លួនបានសម្រេចរបស់វិសាខា។

ព្រះខន្ធរាជស្វាយរៀង ស៊ុតបានសម្រេច៤គ្រាប់

សឿយ វិសាល បានសម្រេច
សារ៉េត គ្រីយ៉ា បានសម្រេច
អៀង ពិសិ បានសម្រេច
សួន សុវណ្ណ មិនសម្រេច
ត្រាយ វិចិត្រ បានសម្រេច

វិសាខា ស៊ុតបានសម្រេច៥គ្រាប់
ទិត្យ ទីណា បានសម្រេច
អ៊ិន វិច្ឆ័យ បានសម្រេច
ស៊ិន សុផាណាត បានសម្រេច
អ៊ិន សុដាវិត បានសម្រេច
អ៊ុក សុវណ្ណ បានសម្រេច

ដោយឡែកសម្រាប់ចំណាត់ថ្នាក់លេខ៣វិញបានទៅក្រុមបឹងកេត បន្ទាប់ពីបានយកឈ្នះក្រុមភ្នំពេញក្រោនដោយលទ្ធផល ២-០។

ក្រុមជយលាភីទទួលបាន

ជើងឯក៖ វិសាខា ទទួលបានពាន១ មេដាយមាស និងប្រាក់រង្វាន់ ១០០លានរៀល។
ជើងឯករង៖ ព្រះខន្ធរាជស្វាយរៀង ទទួលបានមេដាយប្រាក់ និងប្រាក់រង្វាន់ ៦០លានរៀល។
លេខ៣៖ បឹងកេត ទទួលបានមេដាយសំរឹទ្ធ និងប្រាក់រង្វាន់ ៣០លានរៀល។
ក្រុមលេងគោរពវិន័យល្អ (Fair Play) ៖ ភ្នំពេញក្រោន ទទួលបានប្រាក់រង្វាន់ ៨លានរៀល។
អ្នកចាំទីល្អ៖ កែវ សុខសិលា របស់ក្លឹបវិសាខា ទទួលបានស្រោមដៃមាស និងប្រាក់រង្វាន់ ៣លានរៀល។
អ្នកស៊ុតចូលទីច្រើនជាងគេ៖ កែវ សុខផេង ទទួលបានស្បែកជើងមាស និងប្រាក់រង្វាន់ ៣លានរៀល។
កីឡាករល្អប្រចាំព្រឹត្តិការណ៍៖ អ៊ុក សុវណ្ណ របស់វិសាខា ទទួលបានប្រាក់រង្វាន់ ៣លានរៀល។
គ្រូបង្វឹកល្អ៖ លោក Akeeb Tunji Ayoyinka គ្រូបង្វឹកវិសាខា ទទួលបានប្រាក់រង្វាន់ ៣លានរៀល។
ក្រុមអាជ្ញាកណ្តាលល្អ៖ ហោ ប៊ុនថង, ហេង សុខលី, ហែម ចិត្រា និង អ៉ីវ ទីណា ទទួលបានប្រាក់រង្វាន់ ៥លានរៀល។