កីឡា

មនុស្សដែក Rodtang ប្រាប់ថា ភ័យខ្លាំងប៉ះអ្នកគុនចម្រុះ Johnson វ៉ៃកូនកាត់

បានផុស

៤ years មុន

នៅ

ថ្ងៃសុក្រ ១៨ មីនា ២០២២

ដោយ

ជើងខ្លាំងមួយថៃដែលគ្រប់គ្នាស្គាល់រហស្សនាម«មនុស្សដែក» Rodtang Jitmuangnon នឹងប្រកួតជាមួយជើងខ្លាំងគុនចម្រុះចាស់វស្សា Demetrious Johnson ក្នុងព្រឹត្តិការណ៍ខួប ១០ ឆ្នាំ ONE X នាថ្ងៃសៅរ៍ទី ២៦ ខែមីនា ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួបជើងខ្លាំងខុសជំនាញគ្នាទាំងពីររូប ត្រូវបានប្រកាសជាច្រើនខែមកហើយ។ ការប្រកួតនេះត្រូវបានដាក់លក្ខន្តិកៈពិសេសមិនធ្លាប់មានដែលត្រូវបានគេហៅថា ការប្រកួតកូនកាត់គុនចម្រុះ និងមួយថៃ។ ការប្រកួតត្រូវធ្វើឡើងចំនួន ៤ ទឹកដែលក្នុង ១ ទឹកមាន៣នាទី។ ទឹកទី ១ និងទី ៣ គឺប្រកួតច្បាប់មួយថៃ ខណៈទឹកទី ២ និងទី ៤ គឺប្រកួតច្បាប់គុនចម្រុះ ហើយគ្មានចៅក្រមកាត់សេចក្តីទេ។

សម្រាប់ការត្រៀមខ្លួនជាច្រើនខែកន្លងទៅនេះ ជើងខ្លាំងមួយថៃ Rodtang បានបង្ហាញអារម្មណ៍ពិត និងអ្វីដែលរូបគេជួបក្នុងការត្រៀមខ្លួនសម្រាប់ប្រកួតយ៉ាងពិសេសនេះ។ Rodtang បាននិយាយថា ៖«ខ្ញុំមានអារម្មណ៍អស់កម្លាំងខ្លាំងណាស់ ពេលហាត់គុនចម្រុះ ដោយសារមិនធ្លាប់ហាត់ពីមុន។ ខ្ញុំក៏រីករាយចំពោះការហ្វឹកហាត់ជំនាញថ្មីនេះដែរ»។

ទោះជាយ៉ាងណានៅពេល«មនុស្សដែក»រូបនេះបានមើលវីដេអូប្រកួតកន្លងមករបស់ Johnson បានធ្វើឲ្យរូបគេភ័យខ្លាច និងសួរខ្លួនឯងថាតើត្រូវទប់ទល់ដោយរបៀបណា? «ប៉ុន្តែនៅពេលខ្ញុំមើលវីដេអូរបស់គាត់ធ្វើឲ្យខ្ញុំភ័យ។ តើខ្ញុំប្រើក្បាច់អ្វីការពារល្បឿនដ៏លឿនរបស់គាត់? តើខ្ញុំទប់ទល់ដោយរបៀបណា? ដោយសារ DJ អាចចាប់ផ្តួលដៃគូ ហើយគាត់មានចលនា និងផ្លាស់ប្តូរគោលជំហរគ្រប់ពេលវេលា។ មើលទៅផ្លាស់ប្តូរលឿន រកតែឃ្លេ-ក ហើយខ្ញុំអត់មានបទពិសោធគុនចម្រុះផង។ តែខ្ញុំក៏ហាត់គុនចម្រុះ និងមួយថៃផងដែរ»។

ទោះជាយ៉ាងណា កីឡាករថៃរូបនេះបានប្តេជ្ញាថា រូបគេនឹងតស៊ូរហូតដល់ដង្ហើមចុងក្រោយ។ កីឡាករនិយាយថា ៖«ខ្ញុំនឹងមិនបោះបង់ចោលងាយៗនោះទេ។ បើគាត់អាចចាប់ផ្តួលខ្ញុំ និងឃ្លេខ្ញុំបាននោះ ខ្ញុំនឹងមិនបោះបង់ទេ បើគាត់មិនឃ្លេខ្ញុំឲ្យស្លាប់ ឬរឹត-កដល់សន្លប់»។

ផ្ទុយទៅវិញ Rodtang បញ្ជាក់ថា ប្រសិនបើកីឡាករអាមេរិកអាចចូលកៀក រូបគេនឹងមិនបណ្តោយឲ្យចាប់ផ្តួលដោយស្រួលៗនោះទេ។ «បើគាត់ចូលកៀក រកចាប់ផ្តួលខ្ញុំ ទទួលយកកណ្តាប់ដៃរបស់ខ្ញុំជាមុនសិន។ គាត់នឹងស្គាល់ថ្នាំខ្លាំងថាតើហ៊ានចូលជិតឬអត់»។

ជើងឯកមួយថៃពិភពលោកផ្តោតចម្បងលើការប្រកួតក្នុងទឹកទី១ ពីព្រោះជាទឹកមួយថៃដែលរូបគេមានប្រៀប។ រូបគេត្រៀមវ៉ៃសន្ធាប់ឲ្យ Johnson អស់កម្លាំងដែលមិនអាចមានកម្លាំងគ្រប់គ្រាន់សម្រាប់ទឹកទី២។

កីឡាករនិយាយថា ៖«បើគាត់អាចទប់ទល់កណ្តាប់ដៃរបស់ខ្ញុំបាននៅទឹកទី១ គាត់ត្រូវការឃ្លេខ្ញុំឲ្យចុះចាញ់ក្នុងទឹកទី២។ យ៉ាងណា បើដល់ទឹកទី២ ចាត់ទុកសំណាងហើយ។ ខ្ញុំគ្រោងវ៉ៃសន្ធាប់ខ្លាំងនៅទឹកទី១ ដូច្នេះគាត់អស់កម្លាំងស៊ុហ្វដែលមិនមានកម្លាំងគ្រប់គ្រាន់វ៉ៃក្នុងទឹកទី២ឡើយ»។

Rodtang បានបញ្ជាក់បន្ថែមថា ៖«Johnson គ្រោងឃ្លេខ្ញុំឲ្យចុះចាញ់ទឹកទី២។ អូ? ហេតុអ្វី គាត់មិនគិតផងថា ជើងរបស់គាត់ ឬឆ្អឹងជំងឺ ត្រូវខ្ញុំទាត់ឡើងបាក់ ឬជាំ ឬក៏បែកដោយសារកែងរបស់ខ្ញុំនៅទឹកទី១។ គាត់ត្រៀមរត់ពេញសង្វៀនឲ្យហើយទៅក្នុងទឹកទី១»៕

Related Topics:កីឡាប្រដាល់