ប៉េតង់កម្ពុជា ទទួលបានមេដាយសំរឹទ្ធ២ លើវិញ្ញាសាវាយយកពិន្ទុឯកត្តជន ស៊ីហ្គេមវៀតណាម

កីឡាករ-កីឡាការិនីប៉េតង់កម្ពុជា បានត្រឹមមេដាយសំរឹទ្ធ នៅក្នុងថ្ងៃទី១៣ ខែឧសភា ឆ្នាំ២០២២ នេះ សម្រាប់ព្រឹត្តិការណ៍កីឡាស៊ីហ្គេម លើកទី៣១ នៅប្រទេសវៀតណាម បន្ទាប់ពីជ្រុះចេញត្រឹមវគ្គពាក់កណ្ដាលផ្ដាច់ព្រ័ត្រ ក្នុងវិញ្ញាសាវាយយកពិន្ទុឯកត្តជនបុរស-នារី។

កីឡាការិនី អ៊ុក ស្រីមុំ ដែលជាម្ចាស់មេដាយមាសពិភពលោក បានត្រឹមមេដាយសំរឹទ្ធ ក្រោយប្រកួតចាញ់កីឡាការិនី មីយ៉ាន់ម៉ា ដោយលទ្ធផល ២៨-៤០ ក្នុងវគ្គពាក់កណ្ដាលផ្ដាច់ព្រ័ត្រ វិញ្ញាសាវាយយកពិន្ទុឯកត្តជននារី នាំឱ្យកីឡាការិនី អ៊ុក ស្រីមុំ ទទួលបានមេដាយសំរឹទ្ធ ទី២ សម្រាប់កម្ពុជា។

ដោយឡែកកីឡាករ សុខ ចាន់មាន ដែលជាម្ចាស់មេដាយមាសពិភពលោកដូចគ្នាផងដែរនោះ ក៏បានត្រឹមមេដាយសំរឹទ្ធដូចគ្នា ក្រោយប្រកួតចាញ់កីឡាករថៃ វិញ្ញាសាវាយយកពិន្ទុឯកត្តជនបុរស ក្នុងលទ្ធផលដាច់ ៤៣-១៩។ យ៉ាងណា​មិញ ប៉េតង់កម្ពុជានៅមានវិញ្ញាសាប្រកួតជាច្រើនទៀត ដែលតាមគម្រោងនឹងបន្តការប្រកួតនៅថ្ងៃស្អែក៕

អត្ថបទ៖ មន្នីរ័ត្ន