កីឡា

លោក Conor Nestor យកការបរាជ័យក្រោមថ្វីជើងវិសាខា ជាមេរៀនកែតម្រូវក្នុងលីគ

បានផុស

៤ សប្តាហ៍ មុន

នៅ

ថ្ងៃពុធ ២៥ ឧសភា ២០២២

ដោយ

ក្លិបព្រះខ័នរាជស្វាយរៀង បានជ្រុះចេញពីពានរង្វាន់ខេមបូឌានលីគខាប់ (Cambodian League Cup) ឆ្នាំ២០២២ បន្ទាប់ពីចាញ់ ក្លិបវិសាខា ០-២ នៅកីឡដ្ឋានកងយោធពលខេមរភូមិន្ទ ក្នុងវគ្គពាក់កណ្ដាលផ្ដាច់ព្រ័ត្រ កាលពីម្សិលមិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជុំវិញការបាត់បង់កៅអីឡើងវគ្គបន្ត លោក Conor Nestor បានប្រាប់ ‘កម្ពុជាថ្មី’ ដូច្នេះថា៖ «វាមិនមែនជាការបង្ហាញទម្រង់លេងដ៏អស្ចារ្យពីយើងទេ។ ប៉ុន្តែយើងនឹងប្រើវាជាបទពិសោធន៍សិក្សា និងកែលម្អសម្រាប់ការប្រកួតក្នុងលីគវិញ។»

«អារម្មណ៍សំខាន់គឺថាយើងមិនបានចាញ់ការប្រកួតប្រជែងតាំងពីខែវិច្ឆិកា មុនការចាញ់នេះ។ ដូច្នេះឥឡូវនេះ យើងផ្តោតលើការធ្វើឱ្យប្រាកដថា វានឹងមានរយៈពេលយូរជាងនេះទៀត មុនពេលបរាជ័យបន្ទាប់របស់យើង។» គ្រូបង្វឹកសញ្ជាតិអៀរឡង់ខាងជើងរូបនេះបានបន្ថែម។

គួរដឹងដែរថា ព្រះខ័នរាជស្វាយរៀង ប្រកួតក្នុងពានរង្វាន់នេះដោយស្ថិតនៅពូល A ជាមួយនឹងលទ្ធផលឈ្នះ២ និងស្មើ១ នៅក្នុងពូល។ លុះចូលដល់វគ្គ ៨ក្រុមចុងក្រោយបានយកឈ្នះ គីរីវង់សុខសែនជ័យ និងវគ្គពាក់កណ្ដាលផ្ដាច់ព្រ័ត្រ បានចាញ់វិសាខា នេះផ្ទាល់តែម្ដង។

យ៉ាងណាមិញ ព្រះខ័នរាជស្វាយរៀង ហាក់ធ្វើបានល្អជាងនៅក្នុងលីគកំពូលកម្ពុជា ដោយត្រឹមជុំទី១ បានឈរកំពូលតារាង ក្រោយប្រកួត ៧ដង ឈ្នះ ៦ដង និងស្មើ ១ដង មាន ១៩ពិន្ទុ នាំមុខក្រុមលេខ២ បឹងកេត ដល់ទៅ ៦ពិន្ទុ៕

អត្ថបទ ៖ មន្នីរ័ត្ន