​​របូត​ ២ គ្រាប់​ គ្រូ​ឥណ្ឌា​ថា​អាច​ស៊ី​លើសពីរ​គ្រាប់ ខណៈ​គ្រូកម្ពុជា​សោកស្តាយ​បាត់​ឱកាស

កីឡាករ Sunil Chhetri បានក្លាយជាវីរបុរសសម្រាប់ឥណ្ឌា ក្រោយរកបាន ២គ្រាប់ជួយក្រុមឈ្នះកម្ពុជា ២-០ ក្នុងជំនួបដំបូងពូល D វគ្គជម្រុះជុំចុងក្រោយ ជើងឯកទ្វីបអាស៊ី (AFC Asian Cup 2023 Qualifiers Final Round) កាលពីយប់ថ្ងៃទី០៨ ខែមិថុនា ឆ្នាំ២០២២។

ក្រោយចប់ការប្រកួត លោក Ryu Hirose បានសម្ដែងក្ដីសោកស្ដាយ និងយល់ថាកូនក្រុមមានជំហរដើម្បីបង្កើតឱកាស ប៉ុន្តែបែរជាធ្វើមិនបាន។

លោក Ryu Hirose គ្រូបង្គោលក្រុមបាល់ទាត់ជម្រើសជាតិកម្ពុជាបាននិយាយដូច្នេះថា៖ «ជាក់ស្តែង វាមិនមែនជាលទ្ធផលដែលយើងចង់បាន និងមិនចង់ចាញ់ការប្រកួតដំបូងក្នុងវគ្គជម្រុះនោះទេ។ យើងមានជំហរសម្រាប់បង្កើតឱកាស ប៉ុន្តែយើងមិនអាចធ្វើអ្វីបាន»។

ដោយឡែកគ្រូបង្វឹករបស់ក្រុមជម្រើសជាតិឥណ្ឌា លោក Igor Stimac បានលើកឡើងផងដែរថា៖ «កីឡាករបានធ្វើអស់ពីសមត្ថភាពដែលពួកគេអាចធ្វើបាននៅថ្ងៃនេះ ហើយទទួលបានលទ្ធផលដែលយើងចង់បាន។ ពួកគេបានធ្វើការងារដែលមានសារៈសំខាន់ណាស់។ ខ្ញុំបានសុំរឿងពីរក្នុងថ្ងៃនេះ គឺការរកគ្រាប់បាល់ និងការមិនរបូតគ្រាប់បាល់។ ខ្ញុំនឹងសប្បាយចិត្តជាងនេះ ជាមួយគ្រាប់បាល់ ៣ទៅ៤គ្រាប់ ប៉ុន្តែក៏សប្បាយចិត្តជាមួយគ្រាប់បាល់ ២គ្រាប់នេះផងដែរ»។

លោក Igor Stimac ក៏មានអារម្មណ៍ថាក្រុមរបស់ខ្លួន អាចស៊ុតបញ្ចូលទីបានច្រើនជាងមុន ហើយបានពន្យល់ពីការផ្លាស់ប្ដូរកីឡាករ Sunil Chhetri បន្ទាប់ពីរកបាន ២គ្រាប់ ដោយលោកបានបន្ថែមថា «លទ្ធផលដ៏រឹតតែគួរឲ្យពេញចិត្តនឹងកើតឡើងប្រសិនបើយើងឈ្នះ ៤-០។ យើងមានឱកាសច្បាស់ៗ ៤ទៅ៥ដង  ដូច្នេះបើមានគ្រាប់បាល់ ២គ្រាប់ទៀតនឹងកាន់តែល្អ។ ប៉ុន្តែ យើងត្រូវតែបន្ទាបខ្លួន។ កីឡាករបានព្យាយាម ប៉ុន្តែនៅតែមិនអាចរកវិធីដើម្បីរកគ្រាប់បាល់។»

គួរ​បញ្ជាក់ថា កម្ពុជា នៅសល់២ប្រកួតទៀតក្នុងពានរង្វាន់នេះ ដោយត្រូវជួបហុងកុង ថ្ងៃទី១១ និងជួបអាហ្វហ្គានីស្ថាន ថ្ងៃទី១៤ ហើយត្រូវការឈ្នះទាំង ២ប្រកួតដើម្បីអាចរកកៅអីយ៉ាងហោចណាស់ជាក្រុមលេខ២ល្អ ឡើទៅជុំផ្ដាច់ព្រ័ត្រ៕

អត្ថបទ៖ មន្នីរ័ត្ន