កីឡា

លោក កែវ សារ៉េត បញ្ជាក់ កម្ពុជា ពិតជាប្រកួតមិត្តភាពជាមួយ ហុងកុង នៅខែមិថុនា

បានផុស

៣ ខែ មុន

នៅ

ថ្ងៃចន្ទ ៣០ មីនា ២០២៦

ដោយ

ក្រុមបាល់ទាត់ជម្រើសជាតិកម្ពុជា នឹងប្រកួតមិត្តភាពអន្តរជាតិជាមួយ ហុងកុង នៅខែមិថុនា ឆ្នាំ ២០២៦ ដើម្បីត្រៀមខ្លួនប្រកួតពានរង្វាន់អាស៊ាន ASEAN Championship ឆ្នាំ ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា បានប្រាប់ថា កម្ពុជា ពិតជាជ្រើសរើស ហុងកុង សម្រាប់ការប្រកួតមិត្តភាពអន្តរជាតិមែន។ ក្រុមហុងកុង នឹងធ្វើដំណើរមកប្រកួតជាមួយ កម្ពុជា នៅថ្ងៃទី៩ ខែមិថុនា ឆ្នាំ ២០២៦ ក្នុងរាជធានីភ្នំពេញ។

នៅក្នុងខែមីនា ឆ្នាំ ២០២៦ ជាពេលវេលា FIFA Day ក្រុមបាល់ទាត់ជម្រើសជាតិកម្ពុជាមិនមានការប្រកួតមិត្តភាពអន្តរជាតិទេ ដោយសារពេលវេលាខ្លី ហើយរកដៃគូប្រកួតមិនបាន។ ស្របពេលជាមួយគ្នានេះ ក្លិបបាល់ទាត់កម្ពុជា កំពុងមមារញឹកក្នុងការប្រកួតលីគកំពូលកម្ពុជា ពានរង្វាន់សម្តេចតេជោ ហ៊ុន សែន និងពានរង្វាន់អន្តរជាតិ AFC Challenge League។

ដោយសារការស្វះស្វែងដៃគូប្រកួតមិត្តភាពតាំងពីដើមខែមីនា ឆ្នាំ ២០២៦ ទើប កម្ពុជា រកបានដៃគូរួចជាស្រេចសម្រាប់ខែមីនាខាងមុខដែលនៅសល់ ៣ ខែទៀត។

ក្រុមបាល់ទាត់ជម្រើសជាតិកម្ពុជា បានប្រកួតជាមួយ ហុងកុង ច្រើនលើកជាងគេទាំងការប្រកួតពានរង្វាន់ និងមិត្តភាពអន្តរជាតិ បើប្រៀបធៀបជាមួយ ក្រុមជម្រើសជាតិផ្សេងៗ។ គិតចាប់ទាំងពីឆ្នាំ ២០១៦ មក កម្ពុជា បានប្រកួតជាមួយ ហុងកុង ចំនួន ៧ លើកមកហើយ ប៉ុន្តែមិនធ្លាប់ឈ្នះ ហុងកុង ឡើយពោលគឺស្មើ ២ និងចាញ់ ៥។