Benzema អរគុណ Ronaldo ក្រោយឈ្នះពាន UEFA Player of the Year

Karim Benzema បានអះអាងថា រូបគេមានទម្រង់លេងល្អបំផុតក្នុងអាជីពរបស់គេនៅ Real Madrid ទោះបីជាមានវ័យ ៣៤ ឆ្នាំក៏ដោយ។ កីឡាករសញ្ជាតិបារាំងរូបនេះត្រូវបានជាប់ជាកីឡាករឆ្នើមប្រចាំឆ្នាំរបស់ UEFA (UEFA Player of the Year) សម្រាប់ឆ្នាំ២០២១/២២ បន្ទាប់ពីជួយ Real Madrid ឈ្នះលីគកំពូលអ៉េស្បាញ និងពានរង្វាន់ UEFA Champions League កាលពីរដូវកាលមុន។

កីឡាករសញ្ជាតិបារាំងរូបនេះក៏បានសង្កត់ធ្ងន់ថា លោកមិនបានផ្លាស់ប្តូរការប្រកួតរបស់ខ្លួន បន្ទាប់ពីការចាកចេញរបស់ Cristiano Ronaldo ពីក្លិប Real Madrid ក្នុងឆ្នាំ២០១៨។

Benzema បានបញ្ជាក់ថា៖ “Cristiano បានជួយខ្ញុំច្រើនណាស់។ ជាមួយគាត់ ខ្ញុំមានតួនាទីមួយទៀត ហើយនៅពេលដែលគាត់ចាកចេញ ខ្ញុំដឹងថា ខ្ញុំអាចបោះជំហានទៅមុខក្នុងការស៊ុតបាល់បញ្ចូលទី ប៉ុន្តែនៅតែលេងបាល់ទាត់”។

Benzema បានប្រាប់សារព័ត៌មាន European Sports Media (ESM) ថា៖ “ឥឡូវនៅអាយុ ៣៤ ខ្ញុំមានអារម្មណ៍ថា ខ្ញុំប្រសើរ ខ្ញុំលេងបានល្អជាង។ វាជារឿងពិតដែលថាក្នុងន័យផ្ទាល់ខ្លួន នេះគឺជារដូវកាលដ៏ល្អបំផុតនៃអាជីពរបស់ខ្ញុំ ប៉ុន្តែមានរឿងមួយដែលមិនផ្លាស់ប្តូរ ខ្ញុំទៅទីលានគិតអំពីអ្វីដែលខ្ញុំត្រូវធ្វើដើម្បីឈ្នះការប្រកួត ខ្ញុំគិតអំពីក្រុម មិនមែនតែខ្លួនខ្ញុំទេ”។

Benzema បានបន្តសារភាពថា ពានរង្វាន់ Champions League កាលពីរដូវកាលមុន គឺជាពានរង្វាន់ដ៏មានន័យបំផុតដែលគេបានឈ្នះក្នុងអាជីពរបស់ខ្លួន ដោយសារតែរបៀបដែល Real Madrid ធ្វើឱ្យផ្លាស់ប្ដូរការប្រកួតនៅវគ្គចាញ់ធ្លាក់។

Benzema បន្ថែម៖ “ទោះបីជាគ្រប់ពានទាំងអស់មានប្រវត្តិ និងខុសគ្នាក៏ដោយ វាច្បាស់ណាស់ថា Champions League នេះគឺពិបាកបំផុតក្នុងចំណោមពាន ៥ ដែលខ្ញុំបានឈ្នះ ហើយសម្រាប់ខ្ញុំ វាក៏ពិសេសបំផុតដោយសារតែការវាយបកត្រលប់មកយកឈ្នះវិញ និងដោយសារតែពួកយើងមិនបោះបង់”។

Benzema រដូវកាលមុន បានបង្ហាញសមត្ថភាពលេចធ្លោខ្លាំង ជួយ Madrid ឈ្នះពានធំៗដូចជា La Liga និង UCL។ វ័យ ៣៤ ឆ្នាំគេរកបាន ១៥ គ្រាប់ឱ្យ Madrid ក្នុងយុទ្ធនាការ Champions League រដូវកាលមុន ២ គ្រាប់ តិចជាងកំណត់ត្រារបស់ Cristiano Ronaldo ធ្លាប់ធ្វើបានកាលពីរដូវកាល២០១៣-១៤។ មិនតែប៉ុណ្ណោះ គេក៏ឈរជាកីឡាកររកបានគ្រាប់បាល់ច្រើនជាងគេនៅ La Liga រដូវកាលនេះមាន ២៧ គ្រាប់ផងដែរ៕

អត្ថបទ៖ មន្នីរ័ត្ន