កីឡា

មុនឈ្នះជើងឯកលីគទី២ ក្រុម EDC គិតថា ខ្លួនស្ទើរតែអស់ឱកាសឈ្នះទៅហើយ

បានផុស

១ year មុន

នៅ

ថ្ងៃចន្ទ ៣១ តុលា ២០២២

ដោយ

ក្រុមអគ្គិសនីកម្ពុជាបានគ្រងជើងឯកលីគកម្ពុជាទី២ បន្ទាប់ពីប្រកួតចុងក្រោយបានយកឈ្នះលើក្រុមខេត្តត្បូងឃ្មុំដោយលទ្ធផល ១-០ ប៉ុន្តែក្រុមមួយនេះគិតថា ខ្លួនស្ទើរតែបាត់បង់ឱកាសឈ្នះជើងឯកទៅហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ទុំ សារ៉ាយ គ្រូបង្វឹកអគ្គិសនីកម្ពុជាបានប្រាប់ថា ៖«និយាយពីអារម្មណ៍គឺ សប្បាយចិត្តខ្លាំងណាស់ ដោយសារក្រុមធ្វើបានល្អ ហើយក្រុមយើងសុទ្ធតែយុវជនខ្មែរសុទ្ធទៀត។ អីចឹងដណ្តើមបានជើងឯកលីគទី២នេះគឺល្អមែនទែនដើម្បីឈានទៅការលេងលីគកំពូល»។

ទោះបីជាយ៉ាងណាឈានដល់វិនាទីចុងក្រោយទើបក្រុមនេះដឹងថា ខ្លួនបានក្លាយជាជើងឯកដោយសារពិន្ទុប្រទាញប្រទង់គ្នាខ្លាំងសម្រាប់ក្រុមកំពូលទាំង៣។

លោកគ្រូបង្វឹករូបនេះបាននិយាយថា ៖«តាំងពីដើមមក ក្រុមកំពូលតារាងទាំង៣មានពិន្ទុប្រទាញប្រទង់គ្នា។ ក្រុមអគ្គិសនីគិតថា បាត់បង់ឱកាសដណ្តើមយកពាននេះទៅហើយ តែដោយសារមានការខំប្រឹងប្រែងរបស់កីឡាករដែលពួកគាត់បានស្រោចស្រង់ពិន្ទុប្រកៀកប្រកិតជាមួយក្រុម អាយអេសអាយ ដង្កោសែនជ័យ និង ក្រុមប៉ូលិស ហើយសំណាងបែរជាទទួលបានមកក្រុមយើងវិញ ដោយសារអគ្គិសនីមានប្រៀបនៅក្រៅដី»។

ចំណុចមានប្រៀបគឺ ក្រុមអគ្គិសនីកម្ពុជាបានយកឈ្នះក្រុម អាយអេសអាយ ដង្កោសែនជ័យ ដោយលទ្ធផល ៣-០ នៅក្នុងដីរបស់ខ្លួន ប៉ុន្តែក្រុម អាយអេសអាយ ដង្កោសែនជ័យ បានយកឈ្នះ អគ្គិសនីកម្ពុជា តែ ១-០ ប៉ុណ្ណោះនៅក្នុងដីរបស់ខ្លួន។ ប្រការនេះហើយបានជាអគ្គិសនីកម្ពុជាបានក្លាយជាជើងឯក។

រឿងគួរឲ្យកត់សំគាល់មួយទៀតនោះគឺ ការប្រកួតម្សិលមិញ ប្រសិនបើក្រុមប៉ូលិសឈ្នះ អាយអេសអាយ ដង្កោសែនជ័យ គឺក្រុមប៉ូលិស នឹងក្លាយជាជើងឯក ដោយសារប៉ូលិសមានប្រៀប ប៉ុន្តែប៉ូលិសបានចាញ់ ៥-១៕

អត្ថបទ៖ វីរបុត្រ