គ្រូព្រះខ័នរាជស្វាយរៀង៖ ក្រោនគឺជាក្រុមដែលកំពុងឡើងជើងនៅក្នុងលីគ នាពេលឥឡូវនេះ

គ្រូបង្វឹកនៃក្លិបបាល់ទាត់ព្រះខ័នរាជស្វាយរៀង លោក Conor Nestor បាននិយាយថា «…ក្រោន (ភ្នំពេញក្រោន) គឺជាក្រុមដែលកំពុងឡើងជើងនៅក្នុងលីគនាពេលឥឡូវនេះ…» ខណៈក្រុមរបស់លោកត្រូវជួបក្នុងជំនួបសប្ដាហ៍ទី២៤ នៃលីគកំពូលកម្ពុជា ល្ងាចនេះ។ ការប្រកួតល្ងាចនេះរវាង ព្រះខ័នរាជស្វាយរៀង ជាមួយ ភ្នំពេញក្រោន នឹងធ្វើឡើងនៅវេលាម៉ោង ៦:៣០នាទីយប់ នាកីឡដ្ឋានខេត្តស្វាយរៀងផ្ទាល់។

លោក Conor Nestor បានលើកឡើងមុនការប្រកួតមកដល់ថា៖ «មែនទែនទៅ យើងមានពេលរៀបចំ និងប្រមូលកម្លាំងឡើងវិញពុំទាន់គ្រប់គ្រាន់ទេ ប៉ុន្តែពិតណាស់ក្រុមទាំងពីរបានស្គាល់ពីគ្នាបានច្បាស់ណាស់។ ក្រោន (ភ្នំពេញក្រោន) គឺជាក្រុមដែលកំពុងឡើងជើងនៅក្នុងលីគនាពេលឥឡូវនេះ»។ «យើងចាំបាច់ត្រូវតែ ជម្រុះចេញនូវចំណុចខ្វះខាតចេញ ហើយធ្វើការងារយើងអោយបានល្អ ហើយធ្វើអោយមានការគាំទ្របន្ថែមទៅកាន់ Marcus។» លោក Conor បានបន្ថែម។

គួររំលឹកថា ៣ប្រកួតចុងក្រោយរវាង ព្រះខ័នរាជស្វាយរៀង ជាមួយ ភ្នំពេញក្រោន នៅឆ្នាំ២០២២នេះ គឺព្រះខ័នរាជស្វាយរៀង មានប្រៀបជាងបន្តិចដោយបានឈ្នះ ២ដង ពោលគឺ ជើងទី១ ស្វាយរៀង ឈ្នះ ១-៣, ជើងទី២ ព្រះខ័នរាជស្វាយរៀង បន្តយកឈ្នះ ១-០ និងជើងទី៣ ភ្នំពេញក្រោន យកឈ្នះ ៣-០។ 

សូមបញ្ជាក់ជាថ្មីថា ព្រះខ័នរាជស្វាយរៀង, វិសាខា, ភ្នំពេញក្រោន និងបឹងកេត គឺជាក្រុមកំពូលទាំង ៤ ដែលបានកៅអីប្រកួតវគ្គ ៤ក្រុមចុងក្រោយ ឬជាវគ្គដែលប្រកួតដណ្ដើមជើងឯក ដោយក្រុមទាំង៤ ត្រូវជួបគ្នាចំនួន ២ជើងទៀត សរុបម្នាក់ ៦ប្រកួត៕

អត្ថបទ៖ មន្នីរ័ត្ន