កីឡា

កាសែតឥណ្ឌូណេស៊ី វិភាគថា កម្ពុជា លេងគ្មានសម្ពាធ ទោះចាញ់ក៏ធម្មតា អាចជាមូលហេតុធ្វើឲ្យ ឥណ្ឌូណេស៊ី ពិបាកយកឈ្នះ

បានផុស

១ year មុន

នៅ

ថ្ងៃសុក្រ ២៣ ធ្នូ ២០២២

ដោយ

សារព័ត៌មានឥណ្ឌូណេស៊ីមួយ ឈ្មោះថា bola.okezone បានធ្វើការវិភាគពីការប្រកួតរវាងប្រទេសរបស់ខ្លួន ជាមួយកម្ពុជា ដែលគ្រោងធ្វើឡើងនៅល្ងាចនេះ ខណៈគេបានលើកហេតុផលចំនួន ៥ ថា កម្ពុជា នឹងធ្វើឥណ្ឌូណេស៊ី ពិបាកយកឈ្នះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតរវាងក្រុមជម្រើសជាតិឥណ្ឌូណេស៊ី ទល់នឹង កម្ពុជា នឹងប្រព្រឹត្តទៅនៅកីឡដ្ឋាន Bung Karno Main Stadium នៅថ្ងៃសុក្រ ទី ២៣ ខែធ្នូ ឆ្នាំ ២០២២ វេលាម៉ោង ១៦ និង ៣០ នាទី។ ជាការពិតណាស់ គេសង្ឃឹមថា ទ័ពរបស់ លោក Shin Tae-yong អាចឈ្នះបានយ៉ាងងាយ លើសពីនេះ លោកជ្រើសរើសយកក្រុម Garuda ‘មហាគ្រុឌ’ ដែលល្អបំផុតមួយ ដើម្បីអាចឈ្នះពាន ក្នុងព្រឹត្តិការណ៍នេះ។

យ៉ាងណាមិញ គេក៏បានសរសេរថា កម្ពុជា អាចធ្វើឲ្យក្រុមឥណ្ឌូណេស៊ី មានការភ្ញាក់ផ្អើល និងស្មុគស្មាញ។ ដូច្នេះតើអ្វីបណ្ដាលឲ្យវា? ខាងក្រោមនេះជាហេតុផល ៥ យ៉ាង ដែលកាសែតឥណ្ឌូណេស៊ី បានវិភាគថា ក្រុមជម្រើសជាតិឥណ្ឌូណេស៊ី អាចជួបការលំបាកពេលប៉ះ កម្ពុជា ក្នុងពាន AFF Cup ឆ្នាំ ២០២២ ៖

១.កម្ពុជា នឹងលេងដោយគ្មានសម្ពាធ ៖

ក្រុមជម្រើសជាតិកម្ពុជា ត្រូវបានគេព្យាករថា នឹងលេងដោយធូររលុង។ អ្នកអាចនិយាយថា ពួកគេមិនមានសម្ពាធអ្វីទេ ព្រោះនៅលើក្រដាស ក្រុមជម្រើសជាតិឥណ្ឌូណេស៊ី គឺល្អជាងឆ្ងាយណាស់។ មានន័យថា កម្ពុជា នឹងលេងមិនចាញ់អ្វីឡើយ។

ព្រោះបើទោះ កម្ពុជា ចាញ់ ក៏មិនគួរឲ្យភ្ញាក់ផ្អើលដែរ។ ដោយលេងរលុង កម្ពុជា អាចលេងបានល្អបំផុត។

២.ក្រុមជម្រើសជាតិកម្ពុជាកំពុងឡើងជើង ៖

ការលេងធូររលុងៗដែលកម្ពុជាបានបង្ហាញក៏ត្រូវបានគេមើលឃើញដែរពេលពួកគេឈ្នះហ្វីលីពីន ៣-២។ ដំបូងឡើយ កម្ពុជាមិនត្រូវបានគេគិតថាឈ្នះនោះទេ ប៉ុន្តែនៅទីបំផុតក្រុមដែលមានរហស្សនាមថា អ្នកចម្បាំងអង្គរ អាចញញឹមនៅចុងបញ្ចប់។

ជាការពិតណាស់ កម្ពុជា ចង់បង្ហាញលទ្ធផលទាំងនេះឡើងវិញពេលលេងនៅផ្ទះជាមួយក្រុមជម្រើសជាតិឥណ្ឌូណេស៊ី។ ដូច្នេះហើយពួកគេនឹងព្យាយាមលេងឲ្យអស់ពីសមត្ថភាព ដើម្បីឲ្យកម្ពុជា អាចយកឈ្នះលើក្រុមជម្រើសជាតិឥណ្ឌូណេស៊ី។

៣.ក្រុមជម្រើសជាតិឥណ្ឌូណេស៊ី ស្ថិតក្រោមសម្ពាធ ៖

ក្រុមជម្រើសជាតិឥណ្ឌូណេស៊ី នឹងប្រកួតនៅសង្វៀន SUGBK ម្ដងទៀតក្នុងលក្ខខណ្ឌដែលមានអ្នកទស្សនា។ ជាការពិតណាស់ Shin Tae-yong និងកូនក្រុមរបស់លោក ស្ថិតនៅក្រោមសម្ពាធយ៉ាងខ្លាំង។

គេសង្ឃឹមថា ក្រុមជម្រើសជាតិឥណ្ឌូណេស៊ី អាចឈ្នះក្នុងការប្រកួតនេះ។ ការរំពឹងទុកនេះ នឹងដាក់សម្ពាធយ៉ាងច្បាស់លាស់ទៅលើកីឡាករ។ ប្រសិនបើអ្នកមិនអាចទប់ទល់នឹងសម្ពាធនោះ ការប្រកួតរបស់ក្រុមជម្រើសជាតិឥណ្ឌូណេស៊ីអាចនឹងមានឥទ្ធិពល។

៤.ឥទ្ធិពល Keisuke Honda និង Ryu Hirose ៖

កិច្ចសហការរបស់ Keisuke Honda ជាមួយ Ryu Hirose បានធ្វើឲ្យកម្ពុជាបច្ចុប្បន្នមានការអភិវឌ្ឍជាច្រើន។ ការប្រកួតរបស់កម្ពុជា មានភាពល្អប្រសើរជាងមុន សូម្បីតែហ្វីលីពីន ក៏បានយកឈ្នះក្នុងលទ្ធផល ៣-២ នៅដើមការប្រកួត AFF Cup ឆ្នាំ ២០២២។

ពេលនេះក្រុមជម្រើសជាតិឥណ្ឌូណេស៊ី នឹងក្លាយជាបញ្ហាប្រឈមសម្រាប់គ្រូបង្វឹកជនជាតិជប៉ុនទាំងពីរ។ រហូតមកដល់ពេលនេះ Hirose សារភាពថា លោកមិនខ្លាចទេ ហើយត្រៀមខ្លួនធ្វើឲ្យមានការភ្ញាក់ផ្អើល ទល់នឹងក្រុមមហាគ្រុឌមួយនេះ។

Ryu Hirose បាននិយាយក្នុងសន្និសីទសារព័ត៌មានមុនការប្រកួតថា “កំណត់ត្រាជួបគ្នា (រវាងកម្ពុជា និងក្រុមជម្រើសជាតិឥណ្ឌូណេស៊ី) មិនមែនមានន័យថា យើងមិនអាចរកចន្លោះប្រហោងដើម្បីឈ្នះនោះទេ”។

៥.ទម្រង់លេងរបស់ក្រុមជម្រើសជាតិឥណ្ឌូណេស៊ីកំពុងធ្លាក់ចុះ ៖

ក្នុងការរៀបចំក្រុមជម្រើសជាតិឥណ្ឌូណេស៊ីសម្រាប់ពានរង្វាន់ AFF Cup ឆ្នាំ 2022 កងទ័ពរបស់ lok Shin Tae-yong បានត្រឹមតែធ្វើការបោះជំរំហ្វឹកហាត់នៅកោះបាលីប៉ុណ្ណោះ។ មិនមានការប្រកួតសាកល្បងទេ ដែលធ្វើឲ្យ lok Shin Tae-yong មានអារម្មណ៍ថា ការបង្ហាញទម្រង់លេងរបស់កីឡាកររបស់លោកបានថយចុះបន្តិច។

ជាងនេះទៅទៀត កីឡាករជម្រើសជាតិឥណ្ឌូណេស៊ីជាច្រើននាក់មិនបានប្រកួតទេ បន្ទាប់ពីការប្រកួតលីគទី ១ ឆ្នាំ ២០២២-២៣ ត្រូវបានពន្យារពេលដោយសារសោកនាដកម្ម នៅកីឡដ្ឋាន Kanjuruhan។ ជាការពិតណាស់ នេះនឹងប៉ះពាល់ដល់ការប្រកួតរបស់ក្រុមជម្រើសជាតិឥណ្ឌូណេស៊ី។

លោក Shin Tae-yong បាននិយាយមុនការប្រកួតទល់នឹងក្រុមរបស់យើងថា “សម្រាប់ការប្រកួតដំបូង ខ្ញុំគិតថា វាអាចជាការប្រកួតដ៏លំបាកមួយសម្រាប់ក្រុមរបស់យើង។ ដូច្នេះអ្វីដែលលើសពីនេះទៅទៀត គឺគ្មានការប្រកួតសាកល្បងទល់នឹងក្រុមណានោះទេ។ ដូច្នេះហើយទម្រង់លេងនឹងថយចុះ»។

សូមបញ្ជាក់ថា ការប្រកួតរវាង ឥណ្ឌូណេស៊ី ជាមួយ កម្ពុជា នឹងធ្វើឡើងនៅកីឡដ្ឋាន Gelora Bung Karno Main Stadium ទីក្រុងហ្សាកាតា ប្រទេសឥណ្ឌូណេស៊ី នាវេលាម៉ោង ៤ និង ៣០ នាទីល្ងាច ត្រូវនឹងម៉ោងកម្ពុជាដូចគ្នា ហើយការប្រកួតមានផ្សាយបន្តផ្ទាល់តាមរយៈទូរទស្សន៍ BTV News៕

ប្រភព ៖ bola.okezone.com

អត្ថបទ ៖ មន្នីរ័ត្ន