ថៃ នឹងត្រូវ AFF ពិន័យជាប្រាក់ជិត ៣ម៉ឺនដុល្លារបន្ទាប់ពីការដុតភ្លើងអំឡុងពេលប្រកួតឈ្នះហ្វីលីពីន

អ្នកគាំទ្រថៃ បានដុតភ្លើងអំឡុងការប្រកួតជាមួយហ្វីលីពីន នៅថ្ងៃប្រកួតទី៣ នៃពានរង្វាន់ AFF Mitsubishi Electric Cup 2022 ខណៈដែលការទាត់ចូលរបស់ Teerasil Dangda ពី Adisak Kraisorn ​និង​Suphanan Bureerat បានធានាឱ្យក្រុមរហ្សនាម ដំរីសឹកថៃ ឈរនៅកំពូលតារាងមុនការធ្វើដំណើរទៅប្រទេស​ឥណ្ឌូនេស៊ី។

ប៉ុន្តែចំពេលការអបអរនៅកីឡដ្ឋាន Thammasat Stadium អ្នកគាំទ្រម្នាក់ក្នុងក្រុម Ultras Thailand (អង្គុយនៅ zone S) បានសម្រេចចិត្តដុតភ្លើងដែលនៅសល់ប្រហែល ៥នាទីទៀតចប់ការប្រកួត។ ភ្លាមៗសន្តិសុខបានចុះអន្តរាគមន៍ ហើយស្ថានការណ៍ត្រូវបានដោះស្រាយយ៉ាងឆាប់រហ័ស ប៉ុន្តែការខូចខាតបានកើតឡើងរួចទៅហើយ។

យ៉ាងណាមិញ ការធ្វើបែបនេះនឹងត្រូវទួលការពិន័យ។ ការដុតកាំជ្រួច និងភ្លើង ត្រូវបានហាមឃាត់យ៉ាងតឹងរ៉ឹងនៅក្នុងកីឡដ្ឋានក្រោមច្បាប់របស់សហព័ន្ធអាស៊ាន (AFF) និងសហព័ន្ធអាស៊ី (AFC) ដោយសារតែគ្រោះថ្នាក់ដែលពួកគេបង្ក។

សមាគមកីឡាបាល់ទាត់ថៃ ត្រូវបានពិន័យ ២ដងក្នុងប៉ុន្មានឆ្នាំចុងក្រោយសម្រាប់ឧប្បត្តិហេតុស្រដៀងគ្នានេះ។ លើកទី១ គឺពិន័យ ១១,០០០ដុល្លារ អំឡុងពេលប្រកួត AFC U-16 ឆ្នាំ២០១៤។ ទន្ទឹមនឹងនោះ លើកទី២ គឺពិន័យ ៣០,០០០ដុល្លារ ពីការប្រកួតវគ្គផ្តាច់ព្រ័ត្រ AFF Cup ដូចគ្នានេះ កាលពីឆ្នាំ២០១៦ ជាមួយឥណ្ឌូនេស៊ី។

ដូច្នេះការប្រព្រឹត្តខុសលើកទី៣ ទំនងជានឹងធ្វើឲ្យសហព័ន្ធបាល់ទាត់ថៃ ខាតបង់យ៉ាងហោចណាស់ ៣០.០០០ ដុល្លារទៀត ឬជាង ១.០០០.០០០ បាត។ ការផាកពិន័យនឹងត្រូវដាក់បន្ទាប់ពីការបញ្ចប់នៃការប្រកួតនៅឯកិច្ចប្រជុំបន្ទាប់របស់ AFC ក្នុងខែមករា៕

ប្រភព៖ mainstand.co.th

អត្ថបទ៖ មន្នីរ័ត្ន