កីឡា

យល់ស្របទេ ឥឡូវនេះ ប្រដាល់កំពុងទទួលបានការគាំទ្រជាងបាល់ទាត់?

បានផុស

៣ years មុន

នៅ

ថ្ងៃព្រហស្បតិ៍ ២ មីនា ២០២៣

ដោយ

ចូលឆ្នាំថ្មី២០២៣នេះ កីឡាប្រដាល់គុនខ្មែរកំពុងទទួលបានការចាប់អារម្មណ៍យ៉ាងខ្លាំងពីអ្នកគាំទ្រទាំងក្នុង និងក្រៅប្រទេស ហើយនឹងកំពុងមានប្រជាប្រិយភាពជាងកីឡាបាល់ទាត់ថែមទៀត។

នៅកម្ពុជា បាល់ទាត់ត្រូវបានចាត់ទុកជាកីឡាមានប្រជាប្រិយភាពបំផុត ខណៈកីឡាប្រដាល់អាចស្ថិតនៅលំដាប់ទី២ ឬប្រហាក់ប្រហែលនឹងកីឡាបាល់ទះដែរ។ យ៉ាងណា មួយរយៈពេលចុងក្រោយនេះ កីឡាប្រដាល់គុនខ្មែរមានសន្ទុះនៃការគាំទ្រខ្លាំងគួរឲ្យកត់សំគាល់មិនធ្លាប់មាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«កម្ពុជាថ្មី»សូមលើកយកសកម្មភាពខ្លះៗដែលអាចបញ្ជាក់ថា ប្រដាល់គុនខ្មែរកំពុងមានសន្ទុះកើនឡើងខ្លាំង។

ចូលស៊ីហ្គេមផ្លូវការ

កម្ពុជាក្នុងនាមជាម្ចាស់ផ្ទះរៀបចំការប្រកួតកីឡាស៊ីហ្គេម លើកទី៣២ បានដាក់បញ្ចូលកីឡាអត្តសញ្ញាណជាតិ៣ក្នុងនោះមានគុនខ្មែរ។ តាមរយៈការបញ្ចូលគុនខ្មែរជាផ្លូវការនេះហើយដែលបានធ្វើឲ្យប្រជាជនទូទាំងប្រទេសសាទរយ៉ាងខ្លាំង ហើយប្រទេសតំបន់អាស៊ានចាប់អារម្មណ៍មិនស្ទើរដែរ។ ទន្ទឹមជាមួយគ្នានេះ ប្រទេសជាច្រើននៅលើពិភពលោកក៏បានកំពុងចាប់អារម្មណ៍គុនខ្មែរដែរ។

សមិទ្ធផល

កីឡាករប្រដាល់គុនខ្មែរទទួលបានជោគជ័យនៅក្រៅប្រទេសបានធ្វើឲ្យអ្នកគាំទ្រក្នុងស្រុក និងប្រទេសខាងក្រៅចាប់អារម្មណ៍គុនខ្មែរកាន់តែខ្លាំងទ្វេឡើងក្នុងរយៈពេលដ៏ខ្លី។ ធឿន ធារ៉ា បានឈ្នះខ្សែក្រវាត់អន្តរជាតិនៅសង្វៀន Thai Fight និងខ្សែក្រវាត់អន្តរជាតិក្នុងស្រុក២គ្រឿងទៀត។ ជាមួយគ្នានេះ ព្រំ សំណាង និងកីឡាករមួយចំនួនទៀតបានចេញទៅប្រកួតនៅក្រៅប្រទេស និងទទួលបានលទ្ធផលគាប់ប្រសើរដែរ។

កម្មវិធីប្រកួត

ជាមួយគ្នានេះ កម្ពុជាមានកម្មវិធីប្រកួតលំដាប់អន្តរជាតិកាន់តែច្រើនទាំងរៀបចំឡើងដោយម្ចាស់ស្ថានីយ៍ទូរទស្សន៍ និងបុគ្គលក្រៅសង្វៀន ដូចជា Kun Khmer All Star ជាដើមដែលរៀបចំការប្រកួតបានល្អ និងទទួលបានការចាប់អារម្មណ៍យ៉ាងខ្លាំង។ ថ្វីបើកម្មវិធីប្រកួតនេះលក់សំបុត្រចូលទស្សនាគឺមានអ្នកគាំទ្រចូលពេញសង្វៀនស្តាតចាស់។ ជាពិសេសគូប្រកួតសុទ្ធតែមានគុណភាព។

ប្រកួតក្រៅប្រទេស

ច្រើនឆ្នាំមកហើយ កីឡាករ កីឡាការិនីប្រដាល់កម្ពុជាមិនសូវបានចេញទៅប្រកួតច្រើនទេនៅក្រៅប្រទេស។ យូរៗម្តងគេឃើញមានកីឡាករ កីឡាការិនីកម្ពុជាចេញទៅប្រកួតនៅក្រៅប្រទេសដូចជា ថៃ ម៉ាឡេស៊ី បារាំង និងអាមេរិកជាដើម។ ផ្ទុយទៅវិញ កីឡាករបរទេសដូចជាថៃជាដើមមកប្រកួតនៅខ្មែរច្រើននាក់ជារៀងរាល់សប្តាហ៍។ ទោះបីជាយ៉ាងណា មួយរយៈពេលចុងក្រោយនេះ កីឡាករប្រដាល់ខ្មែរច្រើនចេញទៅប្រកួតនៅក្រៅប្រទេសដូចជានៅថៃជារៀងរាល់សប្តាហ៍។ ទាំងអស់នេះរឹតតែធ្វើឲ្យពិភពខាងក្រៅស្គាល់គុនខ្មែរកាន់តែច្រើន។ អ្នកគាំទ្រកម្ពុជាកាន់តែចាប់អារម្មណ៍តាមគុនខ្មែរកាន់តែខ្លាំង។

ការឧបត្ថម្ភគាំទ្រ

ពីមុនមិនសូវមានអ្នកឧបត្ថម្ភគាំទ្រជាថវិកាច្រើនទេ ប៉ុន្តែបច្ចុប្បន្នមានការឧបត្ថម្ភដល់អ្នកប្រដាល់ និងកម្មវិធីប្រកួតច្រើនគួរឲ្យកត់សំគាល់។ ឯកឧត្តម លោកជំទាវ ឧកញ៉ា និងអ្នកមានទ្រព្យច្រើនបានចូលរួមឧបត្ថម្ភគាំទ្រដល់សាមីខ្លួនកីឡាករផ្ទាល់ និងកម្មវិធីប្រកួត។ ឥឡូវនេះឃើញថា កីឡាករដែលមានសមត្ថភាពខ្លាំងទទួលបានទាំងតម្លៃខ្លួនច្រើន ហើយទទួលបានប្រាក់ឧបត្ថម្ភច្រើនពីសប្បុរសជនថែមទៀត។ ការឧបត្ថម្ភគាំទ្របែបនេះផ្តល់ឲ្យកីឡាករមានជីវភាពធូរធារ និងមានកម្លាំងចិត្តទ្វេឡើងក្នុងការហ្វឹកហាត់។ កីឡាករប្រដាល់ខ្លះទទួលបានឱកាសថតផ្សាយពាណិជ្ជកម្មឲ្យផលិតផលផ្សេងៗទៀតផង ដូច្នេះកេរ្តិ៍ឈ្មោះរបស់ពួកគេកាន់តែល្បី។

សារព័ត៌មានផ្សព្វផ្សាយច្រើនពីប្រដាល់

មួយរយៈពេលចុងក្រោយនេះ សារព័ត៌មានក្នុងស្រុកបានផ្សព្វផ្សាយច្រើនណាស់ពីវិស័យកីឡាប្រដាល់គុនខ្មែរ បន្ទាប់ពីគុនខ្មែរបានចូលស៊ីហ្គេម។ ជាពិសេសរាល់មានកីឡាករខ្មែរចេញទៅប្រកួតនៅក្រៅប្រទេស និងឈ្នះខ្សែក្រវាត់ជាដើម សារព័ត៌មានចេញផ្សាយច្រើនណាស់។ ជាមួយគ្នានេះ សារព័ត៌មានក្រៅប្រទេសជាច្រើនក៏បានចាប់អារម្មណ៍ និងផ្សព្វផ្សាយពីគុនខ្មែរជាបន្តបន្ទាប់ដែរ។

ទោះបីជាយ៉ាងណា មិនអាចនិយាយបានថា កីឡាបាល់ទាត់កំពុងធ្លាក់ចុះប្រជាប្រិយភាពនោះទេ ខណៈការប្រកួតបាល់ទាត់លត់សំបុត្រ ហើយមានអ្នកគាំទ្រចូលទស្សនាផ្ទាល់ច្រើនដែរ។ គ្រាន់តែថា ប្រដាល់គុនខ្មែរបានក្លាយជាកីឡាថ្មីមួយនៅក្នុងស៊ីហ្គេម ដូច្នេះជាកីឡាអត្តសញ្ញាណជាតិដែលប្រជាជនកម្ពុជាចង់ឃើញបំផុតក្នុងការវិវឌ្ឍលើផ្លូវរីកចម្រើនលំដាប់អន្តរជាតិ៕

អត្ថបទ៖ វីរបុត្រ

Related Topics:កីឡាប្រដាល់គុនខ្មែរ កីឡាស៊ីហ្គេម

សេចក្ដីជូនដំណឹង១ សប្តាហ៍ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា