កីឡា

អត្តពលិកឈ្នះមេដាយស៊ីហ្គេម២០២២ ទទួលបានប្រាក់រង្វាន់ពីសម្តេចតេជោ និងសម្តេចកិត្តិព្រឹទ្ធបណ្ឌិត

បានផុស

២ ខែ មុន

នៅ

ថ្ងៃសៅរ៍ ១ មេសា ២០២៣

ដោយ

ជយលាភីមេដាយមាស ប្រាក់ និងសំរឹទ្ធ ពីការប្រកួតកីឡាស៊ីហ្គេម លើកទី៣១ ឆ្នាំ២០២២ នៅប្រទេសវៀតណាមទទួលបានប្រាក់រង្វាន់លើកទឹកចិត្តពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ហ៊ុន រ៉ានីហ៊ុន សែន កាលពីព្រឹកថ្ងៃទី១ ខែមេសានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីប្រគល់ប្រាក់រង្វាន់ត្រូវបានប្រារព្ធនៅទីស្តីការក្រសួងការពារជាតិក្រោមវត្តមានដ៏ខ្ពង់ខ្ពស់របស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC-CAMAPGOC តំណាងដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី ហ៊ុន សែន និងសម្តេចកិត្តិព្រឹទ្ធបណ្ឌិត ហ៊ុន រ៉ានីហ៊ុន សែន។

ម្ចាស់មេដាយមាស១គ្រឿងទទួលបាន ៥០០០ដុល្លារ មេដាយប្រាក់ ៣០០០ដុល្លារ និងមេដាយសំរឹទ្ធិ ២០០០ដុល្លារ ដែលសរុប ៤១១,២០០ ដុល្លារអាមេរិក។ ចំណែកគ្រូបង្វឹកទទួលបានរង្វាន់ដូចអត្តពលិករបស់ខ្លួនដែលទទួលបានមេដាយខ្ពស់បំផុត ហើយគ្រូជំនួយទទួល ៧០%។

ខាងលើជាប្រាក់រង្វាន់របស់សម្តេចតេជោនាយករដ្ឋមន្ត្រី ហ៊ុន សែន និងសម្តេចកិត្តិព្រឹទ្ធបណ្ឌិត ហ៊ុន រ៉ានីហ៊ុន សែន ជូនជយលាភីមេដាយ ខណៈកន្លងមកពួកគាត់ធ្លាប់បានទទួលប្រាក់រង្វាន់ពីរាជរដ្ឋាភិបាលកម្ពុជាតាមរយៈក្រសួងអប់រំ យុវជន និងកីឡា ដែលមានសរុបចំនួន ៣,៤៥៨,២០០,០០០ រៀល រួចរាល់ហើយ។

កម្ពុជាបានបញ្ជូនប្រតិភូកីឡា៥៦០នាក់ទៅប្រកួតកីឡាស៊ីហ្គេម លើកទី៣១ នៅទីក្រុងហាណូយ ប្រទេសវៀតណាម ពីថ្ងៃទី១២ ដល់ថ្ងៃទី២៣ ខែឧសភា ឆ្នាំ២០២២ដោយទទួលបានសរុប៦៣គ្រឿងគឺ មាស ៩ ប្រាក់ ១៣ និងសំរឹទ្ធិ ៤១៕