ស៊ីហ្គេម៖ បញ្ចប់ការប្រកួត​ប្រណាំង​ទូក កម្ពុជា​ដណ្តើម​មេដាយ​សរុប ៨ គ្រឿង

ការប្រកួតកីឡាករទូកក្នុងព្រឹត្តិការណ៍ស៊ីហ្គេមលើកទី ៣២ ឆ្នាំ២០២៣ នៅទឹកដី​ខេត្តកំពតដែលបានចាប់ផ្ដើមកាលពីថ្ងៃទី ១៣ រហូតមកដល់ថ្ងៃទី ១៦ ខែឧសភា ឆ្នាំ២០២៣ បានបិទបញ្ចប់ដោយក្រុមកីឡាករទូកកម្ពុជាអាចរកបានមេដាយ​សរុប ៨ គ្រឿងក្នុងនោះមានមេដាយមាសចំនួន ២ គ្រឿង មេដាយប្រាក់ចំនួន ២ គ្រឿង និងមេដាយសំរិទ្ធចំនួន ៤ គ្រឿង ឈរនៅលំដាប់ទី៤ នៅក្នុងចំណោមប្រទេសចូលរួមប្រកួតសរុបចំនួន ៩។

ការប្រកួតកីឡាទូក នៅក្នុងព្រឹត្តិការណ៍ស៊ីហ្គេម ២០២៣ នៅ​ខេត្តកំពត ដែលមានរយៈពេល ៣ ថ្ងៃ បានបញ្ចប់ជាស្ថាពរ។ នៅ​ថ្ងៃទី៣ កម្ពុជារកបានមេដាយមាស ១ គ្រឿង និងសំរិទ្ធ ១ គ្រឿងបន្ថែមទៀតធ្វើឲ្យក្រុមកីឡាករទូកកម្ពុជា ទទួលបានមេដាយ ៨ គ្រឿង មានមាស ២ ប្រាក់ ២ និងសំរិទ្ធ ៤ គ្រឿង។

សម្រាប់ការប្រកួតកីឡាទូក ក្រុមកីឡាករទូកប្រទេសថៃ ឈរនៅលំដាប់លេខ១ ទទួលបានមេដាយមាស ៤ ប្រាក់ ៣ សរុប ៧ គ្រឿង, ឥណ្ដូនេស៊ី ឈរលំដាប់លេខ២ ទទួលបានមេដាយមាស ៣ គ្រឿង ប្រាក់១ និងសំរិទ្ធ៤ សរុប ៨ គ្រឿង, វៀតណាមឈរលំដាប់លេខ ៣ ទទួលបានមេដាយមាស ៣ ប្រាក់១ សរុប៤គ្រឿង ខណៈដែលក្រុមកីឡាករ​មីយ៉ាន់ម៉ា ឈរលេខទី៥ នៅក្រោមកម្ពុជា ទទួលបានមេដាយមាស១ ប្រាក់៥ និងសំរិទ្ធ២ សរុប ៨ គ្រឿង, ម៉ាឡេស៊ី ឈរដំដាប់ទី៦ ទទួលបានមេដាយប្រាក់១ សំរិទ្ធ៣ សរុប ៤គ្រឿង។

ដោយឡែកក្រុមកីឡាករហ្វីលីពីន និងសិង្ហាបុរី មិនទទួលបានមេដាយទេ ខណៈដែលក្រុមកីឡាករប្រទេសឡាវ អវត្តមានក្នុងការបញ្ជូនក្រុមកីឡាករមកចូលរួមក្នុងការប្រកួត៕

អត្ថបទ៖ សឹង រ៉ាត់