កីឡា

យប់នេះ ក្រុមជើងឯក ជើងឯករងឆ្នាំចាស់ប៉ះគ្នាពាន AFC-U23

បានផុស

១ year មុន

នៅ

ថ្ងៃសុក្រ ២៦ មេសា ២០២៤

ដោយ

យប់នេះវេលាម៉ោង៩ ក្រុមអ៊ូបេគីស្ថានត្រូវជួបក្រុមអារ៉ាប៊ីសាអ៊ូឌីត វគ្គ៨ក្រុមចុងក្រោយពានរង្វាន់យុវជនអាយុក្រោម២៣ឆ្នាំទ្វីបអាស៊ី (AFC U23 Asian Cup) នៅប្រទេសកាតារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតយប់នេះជាជំនួបសងសឹករបស់អ៊ូបេគីស្ថាន បន្ទាប់ពីពួកគេបានចាញ់អារ៉ាប៊ីសាអ៊ូឌីត ក្នុងវគ្គផ្ដាច់ព្រ័ត្រ ២-០ AFC U23 Asian Cup កាលពីរដូវកាលមុន។ ក្រុមទាំង២សុទ្ធតែធ្លាប់ឈ្នះជើងឯកពានរង្វាន់នេះ១លើកដូចគ្នា ដូច្នេះការប្រកូតយប់នេះកាន់តែតានតឹងខ្លាំង។ ក្រុមទាំងពីរព្យាយាមស្វែងរកឱកាសឡើងទៅវគ្គពាក់កណ្ដាលផ្ដាច់ព័្រត្រ ក្នុងនាមជាម្ចាស់ការពារជើងឯកឆ្នាំចាស់ និងជើងឯករងឆ្នាំចាស់។

ប្រវត្តិជួបគ្នា៦លើករបស់ក្រុមទាំង២ អ៊ូបេគីស្ថានឈ្នះ១ អារ៉ាប៊ីសាអ៊ូឌីតឈ្នះ៤ និងស្មើគ្នា១។ ការប្រកួតយប់នេះក្រុមអ៊ូបេគីស្ថានត្រូវធ្វើការធ្ងន់ បើប្រៀបធៀបពីប្រវត្តិជួបគ្នាកន្លងមក។ ការប្រកួត៥លើកចុងក្រោយរបស់អ៊ូបេគីស្ថានគឺឈ្នះទាំង៥ ខណៈអារ៉ាប៊ីសាអ៊ូឌីតឈ្នះ៤និងចាញ់១។

ការប្រកួតឆ្នាំនេះ វគ្គសន្សំពិន្ទុក្នុងពូល អ៊ូបេគីស្ថានធ្វើបានល្អ ក្រោយ៣ប្រកួត ឈ្នះទាំង៣ រកបាន៩ពិន្ទុ ឈរលេខ១ក្នុងពូលD។ អារ៉ាប៊ីសាអ៊ូឌីត ឈរលេខ២ក្នុងពូល C បន្ទាប់ពីរកបាន៦ពិន្ទុ ពីការឈ្នះ២ និងចាញ់១។

វគ្គពាក់កណ្ដាលផ្ដាច់ព្រ័ត្រ AFC U23 Asian Cup ឆ្នាំ២០២៤ រកឃើញ២ក្រុមហើយគឺ ឥណ្ឌូណេសុី និង ជប៉ុន។ យប់នេះនឹងរកឃើញ១ក្រុមទៀត និង១ក្រុមទៀតរកឃើញនៅថ្ងៃស្អែក៕

អត្ថបទ៖ ផា រតនា