កីឡា

គោលដៅសំខាន់២ កម្ពុជាត្រូវការឈ្នះ ម៉ុងហ្គោលី ល្ងាចនេះ

បានផុស

២ years មុន

នៅ

ថ្ងៃសុក្រ ៧ មិថុនា ២០២៤

ដោយ

ក្រុមបាល់ទាត់ជម្រើសជាតិកម្ពុជាមានគោលដៅសំខាន់២ក្នុងជំនួបមិត្តភាពអន្តរជាតិជាមួយ ម៉ុងហ្គោលី វេលាម៉ោង៦ល្ងាច ថ្ងៃសុក្រ ទី៧ ខែមិថុនា ឆ្នាំ២០២៤ នៅពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាលើកទី២ហើយដែលក្រុមទាំងពីរជួបគ្នា។ លើកទី១ ក្រុមទាំងពីរស្មើគ្នាដោយលទ្ធផល ១-១ ក្នុងជំនួបមិត្តភាពអន្តរជាតិកាលពីឆ្នាំ២០១៩ ដែលពេលនោះ ក្រុមភ្ញៀវម៉ុងហ្គោលី បានបើកការនាំមុខ ០-១ នៅនាទី២១ ប៉ុន្តែនៅនាទី៣៥ កីឡាករ កែវ សុខផេង របស់កម្ពុជាធ្វើសម្រេចតាមស្មើវិញ ដោយបាល់ពិន័យ១១ម៉ែត្រ។

ទី១ ការបង្កើនទំនុកចិត្ត

ថ្វីបើការប្រកួតមិត្តភាពដកស្រង់បទពិសោធ ប៉ុន្តែក្រុមទាំងពីរសុទ្ធតែត្រូវការជ័យជម្នះរៀងៗខ្លួនដោយផ្តោតលើគោលដៅសំខាន់ពីរយ៉ាង។ ជ័យជម្នះដើម្បីបង្កើនទំនុកចិត្តខ្លួនឯង។ ក្រុមបាល់ទាត់ជម្រើសជាតិកម្ពុជាខកចិត្តខ្លាំងមែនទែនពីការធ្លាក់ចេញពីជម្រុះជើងឯកពិភពលោកឆ្នាំ២០២៦ តាំងពីជុំដំបូងដោយចាញ់ប៉ាគីស្ថាន។ ៥ប្រកួតចុងក្រោយ កម្ពុជាស្មើ១ និងចាញ់៤ មិនស្គាល់ជ័យជម្នះសោះ។

តាមរយៈលទ្ធផលមិនល្អប្រសើរមួយរយៈពេលចុងក្រោយនេះបានធ្វើឲ្យក្រុមកម្ពុជាស្ទើរតែរកទម្រង់ប្រកួតណាមួយឲ្យមានការជឿជាក់ និងស្មារតីប្រកួតរឹងមាំឡើយ ដូច្នេះការប្រកួតមិត្តភាពលើកនេះពិតជាចាំបាច់ណាស់ក្នុងការបង្កើនភាពជឿជាក់ ទំនុកចិត្ត និងក្តីសង្ឃឹមសម្រាប់ការប្រកួតសំខាន់នាខែកញ្ញាខាងមុខនេះដោយត្រូវជួប ស្រីលង្កា ក្នុងជម្រុះជើងឯកអាស៊ី 2027 AFC Asian Cup។

ខ្សែបម្រើប្រយុទ្ធស្លាបខ្មែរ-អាមេរិក Nick Taylor បាននិយាយថា ៖«ការប្រកួតមិត្តភាពនេះ យើងត្រូវការជ័យជម្នះ ពីព្រោះជ័យជម្នះនឹងផ្តល់ឲ្យយើងមានទំនុកចិត្ត ជឿជាក់លើខ្លួនឯងសម្រាប់ការប្រកួតជម្រុះ Asian Cup»។

ទី២ ការស្តាទឹកចិត្តអ្នកគាំទ្រឡើងវិញ

ក្រុមកម្ពុជាត្រូវការជ័យជម្នះដើម្បីស្តាអ្នកគាំទ្រឡើង។ តាមរយៈលទ្ធផលមិនល្អទាំងក្រុមជម្រើសជាតិធំ និងក្រុមយុវជនបានធ្វើឲ្យទឹកចិត្តអ្នកគាំទ្រហាក់ដូចជាថយចុះខ្លះនៅពេលមានការប្រកួតរបស់កម្ពុជា។ ជាក់ស្តែង ការប្រកួតរបស់កម្ពុជាប៉ុន្មានលើកចុងក្រោយមានការថយចុះចំនួនអ្នកគាំទ្រគួរឲ្យកត់សំគាល់ បើប្រៀបធៀបនឹងកីឡាប្រដាល់ និងបាល់ទះកំពុងកើនឡើង។

សូម្បីកីឡាករជម្រើសជាតិផ្ទាល់ក៏បាននិយាយពីការប្តេជ្ញាចិត្តដើម្បីស្វែងរកជ័យជម្នះជូនអ្នកគាំទ្រ។ ខ្សែប្រយុទ្ធ សៀង ចន្ធា បាននិយាយថា ការប្រកួតនេះពិតជាសំខាន់ណាស់ ដូច្នេះត្រូវតែរកជ័យជម្នះឲ្យបានដើម្បីស្តាទឹកចិត្តអ្នកគាំទ្រឡើងវិញ។

សម្រាប់ការប្រកួតមិត្តភាពអន្តរជាតិជាមួយម៉ុងហ្គោលីនេះធ្វើឡើងពីរលើកគឺលើកទី១ ថ្ងៃទី៧ ខែមិថុនា ឆ្នាំ២០២៤ នៅទឹកដីកម្ពុជា និងលើកទី២ ថ្ងៃទី១១ ខែមិថុនា ឆ្នាំ២០២៤ នៅទឹកដីម៉ុងហ្គោលីវិញម្តង។

ក្រុមជម្រើសជាតិម៉ុងហ្គោលីដែលចាញ់៥លើកចុងក្រោយក៏ត្រូវការជ័យជម្នះដើម្បីផ្តល់ទំនុកចិត្តខ្លួនឯងដែរ ខណៈពួកគេក៏មានកាតព្វកិច្ចជម្រុះ 2027 AFC Asian Cup ដូចកម្ពុជាដែរដោយត្រូវជួបទីម័រខាងកើត៕

អត្ថបទ៖ វីរបុត្រ

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា