កីឡា

អេស្ប៉ាញបានលេខ១ក្នុងពូលឡើងវគ្គ១៦ក្រុមអឺរ៉ូ ខណៈអង់គ្លេសបង្ហាញទម្រង់មិនសូវល្អ

បានផុស

២ years មុន

នៅ

ថ្ងៃសុក្រ ២១ មិថុនា ២០២៤

ដោយ

ក្រុមបាល់ទាត់ជម្រើសជាតិអេស្ប៉ាញបានក្លាយជាក្រុមទី២បានឡើងទៅកាន់វគ្គ១៦ក្រុមចុងក្រោយពានរង្វាន់អឺរ៉ូ ឆ្នាំ២០២៤ បន្ទាប់ពីទទួលបានជ័យជម្នះ២លើកជាប់គ្នានៅសន្សំពិន្ទុក្នុងពូល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតសន្សំពិន្ទុលើកទី១ អេស្ប៉ាញបានយកឈ្នះក្រូអាតដោយលទ្ធផល ៣-០ កាលពីថ្ងៃទី១៥ ខែមិថុនា និងការប្រកួតលើកទី២បានយកឈ្នះអ៉ីតាលីដោយលទ្ធផល ១-០។ គ្រាប់បាល់ជ័យជម្នះរបស់អេស្ប៉ាញកាលពីយប់មិញគឺជាការធ្វើឲ្យចូលទីខ្លួនឯងរបស់ខ្សែការពារអ៉ីតាលី Calafiori នៅនាទី៥៥។

តាមរយៈជ័យជម្នះលើអ៉ីតាលីនេះបានធ្វើឲ្យអេស្ប៉ាញឈរលេខ១ក្នុងពូល B បើទោះបីជានៅសល់១ប្រកួតទៀត ពីព្រោះអ៉ីតាលី ដែលមាន៣ពិន្ទុ កំពុងឈរលេខ២ក្នុងពូលមិនអាចឡើងទៅកាន់លេខ១ក្នុងពូលបានទេ។ បើគិតតាមរូបមន្ត Head to Head អ៉ីតាលីបានចាញ់អេស្ប៉ាញ ដូច្នេះការប្រកួតសន្សំពិន្ទុចុងក្រោយ ក្នុងករណី អ៉ីតាលី ឈ្នះក្រូអាត ហើយអេស្ប៉ាញចាញ់អាល់បានី មាន៦ពិន្ទុស្មើគ្នា ក៏អេស្ប៉ាញនៅតែឈរលេខ១ក្នុងពូល។

ចំណែកនៅពូលជាមួយគ្នា អាល់បាលី និងក្រូអាត មាន១ពិន្ទុដូចគ្នា បន្ទាប់ពីស្មើ១ប្រកួត និងចាញ់១ប្រកួត ដូច្នេះអស់ឱកាសប្រជែងលេខ១ក្នុងពូលហើយ។

កាលពីយប់មិញនេះដែរ អង់គ្លេស បានត្រឹមស្មើជាមួយ ដាណឺម៉ាក ដោយលទ្ធផល ១-១។ មើលតាមទម្រង់លេង អង់គ្លេសគ្មានអ្វីគួរឲ្យចាប់អារម្មណ៍ ឬបង្ហាញពីភាពរឹងមាំតំបន់ការពារ ឬប្រយុទ្ធដ៏គ្រោះថ្នាក់ឡើយ។ ផ្ទុយទៅវិញ ដាណឺម៉ាក ហាក់មានសន្ទុះគួរឲ្យកត់សំគាល់។ ទោះបីជាយ៉ាងណា អង់គ្លេស កំពុងឈរលើកំពូលតារាងពូល C ដោយមាន៤ពិន្ទុ បន្ទាប់ពីឈ្នះ១ប្រកួត និងស្មើ១ប្រកួត។

គិតត្រឹមថ្ងៃទី២១ ខែមិថុនា ឆ្នាំ២០២៤ មានក្រុមពីរហើយបានកក់កៅអីឡើងវគ្គ១៦ក្រុមចុងក្រោយគឺម្ចាស់ផ្ទះអាល្លឺម៉ង់ និងអេស្ប៉ាញ ប៉ុន្តែអាល្លឺម៉ង់នៅមិនទាន់ដឹងថាតើស្ថិតនៅលេខ១ ឬលេខ២ក្នុងពូលទេ ដោយត្រូវចាំអ៊ុតការប្រកួតចុងក្រោយ៕