Cafu រំលង Mbappe, Vini ដោយជ្រើសរើស​កីឡាករម្នាក់ ជាអ្នកមានឥទ្ធិពលបំផុតនៅ Real Madrid

អតីតខ្សែការពារស្លាបស្តាំរបស់ជម្រើសជាតិ ប្រេស៊ីល លោក Cafu បានបង្ហាញទស្សនៈយ៉ាងចាប់អារម្មណ៍មួយ ដោយលោកចាត់ទុកខ្សែប្រយុទ្ធស្លាប Rodrygo ជាកីឡាករ ដែលមានឥទ្ធិពលធំបំផុតក្នុងក្រុម Real Madrid នា​ពេល​បច្ចុប្បន្ន។

ថ្លែងប្រាប់សារព័ត៌មានកីឡា អេស្ប៉ាញ SPORT លោក Cafu បានមានប្រសាសន៍ថា៖ «នៅពេល Rodrygo លេង គឺ Vinicius ប្រឹងធ្វើការ។ ចំណែក Valverde ក៏ដូចគ្នា ហើយស្ថានភាពនេះក៏ដូចគ្នានឹង Mbappe និង Bellingham ផងដែរ។ ដោយឡែកនៅពេល Rodrygo លេងមិនបានល្អវិញ គឺ Real Madrid ទាំងមូលដូចជាពិបាកបង្ហាញទម្រង់លេងឱ្យល្អប្រសើរខ្លាំងណាស់។ គាត់បានក្លាយជាផ្នែកដ៏សំខាន់របស់ក្រុម»។

តាមរយៈទស្សនៈនេះ អាចជារឿងចាប់អារម្មណ៍មួយដែរ ដោយសារ Real Madrid បច្ចុប្បន្នមានកីឡាករល្បីៗ ដែល​ពោរពេញដោយសមត្ថភាពជាច្រើន ដូចជា Kylian Mbappe, Vinicius, Jude Bellingham និង Federico Valverde ជាដើម ប៉ុន្តែផ្ទុយទៅវិញលោកបានជ្រើសរើស Rodrygo ទើបជាកីឡាករ ដែលអាចកំណត់ភាពចាញ់-ឈ្នះក្នុងក្រុម Real Madrid៕

ប្រែសម្រួលអត្ថបទ៖ សេម កុសល
ប្រភព៖ Sportskeeda